بۇرىن سىبايلاس جەمقورلىق بويىنشا سوتتالعان جاقسىبەك قۇلەكەەۆ «قازمۇنايگاز» ۇك اق باسقارما توراعاسىنىڭ كەڭەسشىسى بولىپ تاعايىندالدى. بۇل تۋرالى chinovnik_kz تەلەگرام كانالى مالىمدەدى. 

2008 جىلى جاقسىبەك قۇلەكەەۆ سىبايلاس جەمقورلىق ايىبىمەن ءۇش جىلعا باس بوستاندىعىنان ايىرىلدى. وعان -  100 000 دوللار كولەمىندە پارا الدى دەگەن ايىپ تاعىلعان. بىراق، ول اتالعان باپ بويىنشا اقتالىپ شىقتى. دەگەنمەن، قۇلەكەەۆ تاعى ءۇش ەپيزود بويىنشا كىنالى دەپ تانىلدى: جەكە اۆتوكولىگىن ءوز كومپانياسىنا قىمباتتاتىلعان باعامەن ساتۋ، كۇزەت قىزمەتىن جەكە ماقساتتا پايدالانۋ جانە مەملەكەتتىك ساتىپ الۋ كونكۋرسىنىڭ قورىتىندىسىن تەرىس پايدالانۋ.

قارجى پوليتسياسى قىزمەتكەرلەرى 2008 جىلدىڭ 1 ساۋىرىندە جاقسىبەك قۇلەكەەۆتى ءۇيىنىڭ قاسىندا قىزمەتتىك كولىكتەن ءتۇسىپ كەلە جاتقاندا ۇستادى. كولىكتە اقشاسى بار باسقا بىرەۋدىڭ پورتفەلى بولدى، پورتفەلگە ميكروفون ورناتىلعان. ال، ونىڭ جۇرگىزۋشىسى ەسەنعالي وسپانوۆ پارا بەرۋدەگى دەلدالدىق بابى بويىنشا ايىپتالعان. كەيىننەن ول دا اقتالىپ شىقتى.

2009 جىلى 20 قازاندا جاقسىبەك قۇلەكەەۆ شارتتى تۇردە بوساتىلدى.

Abai.kz