بەلگىلى ايتىسكەر اقىن اسەلحان قالىبەكوۆا ومىردەن ءوتتى. بۇل تۋرالى شىمكەنت قالالىق مادەنيەت باسقارماسى مالىمدەدى.

اسەلحان قالىبەكوۆا - 1950 جىلى 22 ساۋىردە تۇركىستان وبلىسى، وتىرار اۋدانى، ءشاۋىلدىر اۋىلىندا تۋعان. ول بەلگىلى حالىق اقىنى ەرگوبەك قۇتتىبايۇلىنىڭ ۇرپاعى.

1966 جىلى كوكساراي ەلدى مەكەنىندەگى مۇحتار اۋەزوۆ اتىنداعى ورتا مەكتەبىن بىتىرگەن.

1970 جىلدارى اۋداندىق مادەنيەت بولىمىندە، اۋداندىق گازەت رەداكتسياسىندا قىزمەت ەتتى.

1971-91 جىلدارى ارالىعىندا اۋداندىق اۋا رايى مەكەمەسىندە باقىلاۋشى قىزمەتىن اتقارعان.

1981 – 1982 جىلدارى سۋىرىپ سالما ايتىس اقىندارىنىڭ دوداسىنا قاتىسا باستادى.

اسەلحاننىڭ ايتىس ونەرىنە قوسقان ۇلگى-ونەگەسى مول. اقىن اپا ايتىس الەمىندە الىپ سامۇرىققا ۇقسايتىن، قاناتىمەن داۋىل تۇرعىزىپ، ەكپىنىمەن نايزاعاي ويناتاتىن، ەلىنىڭ ەڭ سۇيىكتى پەرزەنتىنە اينالعان. رەسپۋبليكامىزعا تانىمال بەلگىلى اقىنداردىڭ بارىمەن كەزدەسىپ، ايماقتىق، رەسپۋبليكالىق، حالىقارالىق كوپتەگەن ءدۇبىرلى ايتىستاردا نامىستى قولدان بەرمەگەن، وت اۋىزدى وراق ءتىلدى، ارقالى اقىن.

سونىمەن قاتار، اسەلحان قالىبەكوۆا قازاق كسرنىڭ حالىق اقىنى (1990), قازاقستان جازۋشىلار وداعىنىڭ جامبىل اتىنداعى حالىقارالىق سىيلىعىنىڭ تۇڭعىش لاۋرەاتى (1989), وتىرار اۋدانىنىڭ قۇرمەتتى ازاماتى.

Abai.kz