جاڭاءوزەندە "كەزبي" مەكەمەسى جۇمىسشىلارى ەرەۋىلىنە بەس كءۇن تولدى. جۇمىسشىلار نارازىلىق باستالعاندا قۇرىلعان ءبىتىم كوميسسياسىنىڭ جۇمىسىنا كءوڭءىلى تولماي, تالابىن تءۇگەل ورىنداۋدى سۇرايدى.

"كەزبي" مەكەمەسىنىڭ جۇمىسشىلارى ۆيدەوۇندەۋ جاساپ، قازاقستان پرەزيدەنتى قاسىم-جومارت توقاەۆتى، پرەمەر-مينيستر اسقار ءماميندى، قازاقستان كاسىپوداقتارى فەدەراتسياسىنىڭ توراعاسى ساتىبالدى داۋلەتاليندى، "قازمۇنايگاز" ۇلتتىق كومپانياسىنىڭ باسشىسى اليك ايدارباەۆتى پروبلەماعا نازار اۋدارۋىن ءوتىندى.

ۆيدەوۇندەۋدە سونداي-اق جەرگىلىكتى باسىلىمداردا جۇمىسشىلاردىڭ تالاپتارى ورىندالدى دەگەن اقپار تاراعانى ايتىلادى. ەرەۋىلگە قاتىسۋشىلار مۇنى جوققا شىعارىپ وتىر.

ء"بىز، "كەزبي" مەكەمەسى جۇمىسكەرلەرى، قازقستان رەسپۋبليكاسى ەڭبەك كودەكسىنە ساي ءوزىمىزدىڭ نارازىلىعىمىزدى ءبىلدىرىپ، ەرەۋىلدەپ تۇرعانىمىزعا بەس تاۋلىككە قارادى. "كەزبي" باسشىلىعى كوميسسيادا ۇجىمدىق تالاپ ارىزعا ساي سۇراعان قۇجاتتاردى بەرمەي وتىر. 2011 جىلى دا ءدال وسىنداي نارازىلىق اكتسياسى ورىن الىپ، قارايعان باۋىرىمىزدان ايىرىلدىق. سول جاعداي قايتالانباس ءۇشىن 8 شىلدەگە دەيىن شەشىلمەسە، حالىقارالىق جۇمىسشىلار قاۋىمداستىعىنا ارىزدانامىز" دەپ مالىمدەدى جۇمىسشىلار ۆيدەوۇندەۋدە.

كۇننىڭ اپتابىندا ەرەۋىلدەپ وتىرعان جۇمىسشىلارعا 4 شىلدەدە "نۇر وتان" جانە "اق جول" پارتياسىنان ماسليحاتقا سايلانعان دەپۋتاتتار كەلدى.

ء"بىز سىزدەر سايلاعان دەپۋتاتتارمىز" دەپ ءسوز باستاعان ماڭعىستاۋ وبلىستىق ءماسليحاتىنىڭ دەپۋتاتى ماقسات ماقىشەۆتىڭ ءسوزىن نارازى جۇمىسشىلار ءبولىپ جىبەردى.

– سىزدەردى سول ورىنعا وتىرعىزدى، حالىق سايلاعان جوق. ءبىز سەندەردىڭ ايلىقتارىڭدى سۇراپ وتىرعان جوقپىز، ءوز اقشامىزدى سۇراپ وتىرمىز. جاعداي سۇراپ بيلىكتەن بىرەۋ كەلگەن جوق. مىنا جەرگە جەدەل جاردەم كەلسىن. انا پوليتسيا كولىگى كىمدى باقىلاپ تۇر؟ "كەزبي" قوجاسى ءبىتىم كەزباەۆتى ماڭعىستاۋ شەيحى دەۋگە دە بولادى. بىراق ول نەگە "قازمۇنايگاز" بەرگەن اقشانى حالىققا دۇرىستاپ بەرمەيدى؟ شەتەل كومپانياسى كەلسە الدىمەن جۇمىسشىلاردىڭ جاعدايىن جاسايدى، – دەدى "كەزبي" جۇمىسشىلارى كاسىپوداعىنىڭ توراعاسى لۇقپان جولمۇراتوۆ.

"كەزبي" مەكەمەسىنىڭ 600-دەن استام جۇمىسشىسى 30 ماۋسىمنان بەرى جۇمىستى تولىق توقتاتىپ، ەڭبەك جاعدايىن جاقسارتۋدى، جالاقىنى كوتەرۋدى تالاپ ەتىپ تۇر.

1992 جىلى قۇرىلعان "كەزبي" جاۋاپكەرشىلىگى شەكتەۋلى سەرىكتەستىگى ماڭعىستاۋ وبلىسىنداعى مۇناي كومپانيالارىنا ۇڭعىمالاردى جوندەۋ بويىنشا قىزمەت كورسەتەدى. ول – جاڭاوزەندەگى ەڭ ءىرى مۇناي كومپانياسى "وزەنمۇنايگاز" اكتسيونەرلىك قوعامىنىڭ مەردىگەر مەكەمەسى. وندا 27 بريگادا بار قىزمەت ەتەدى. كومپانيادا 1200-گە جۋىق جۇمىسشى بار.

Abai.kz