جۇمىس تولىق توقتاعان. ەرەۋىلدەگەندەر كەشكە قاراي تۇنگى اۋىسىم جۇمىسشىلارى كەلىپ ەرەۋىلدى تاڭ اتقانشا جالعاستىرعاندارىن ايتتى.
جاڭاوزەندە 1 شىلدە كۇنى "كەزبي" كومپانياسىنىڭ ەرەۋىلدەگەن 600-گە تارتا جۇمىسشىسى كەڭسە الدىنا قايتا جينالدى. سارسەنبى تۇنىندە تۇنگى اۋىسىمنىڭ جۇمىسشىلارى كومپانيا عيماراتى الدىندا تاڭدى اتىرعان. كومپانيادا جۇمىس تولىق توقتاعان.
- ماسەلە وتە كوپ. وسى جىگىتتەردىڭ ەڭبەگىن تابەلگە تۇسىرەمىن. بىزدەر باسشىلاردىڭ ايتۋى بويىنشا، 440-760 ساعات ءۇشىن 15% ۇستەمە قويۋىمىز كەرەك. بىراق ءىس جۇزىندە جوسپاردى 700-800 ساعاتقا ورىندايمىز، سول سەبەپتى 60% ۇستەمە قويامىز، ونى تولەمەيدى. ادامداردىڭ اقىسى تولەنبەي وتىر، - دەيدى ءوزىن 20 بريگادا شەبەرى باقىتجان بايجانوۆ دەپ تانىستىرعان جىگىت.
جينالعاندارعا وبلىس اكىمى سەرىكباي تۇرىموۆ كەلدى.
– قۇزىرلى ورىندارمەن قۇرىلعان كوميسسيامەن وتىرىپ قازىر جۇمىس جاسايمىز. سىزدەرگە شەشىمىن ايتامىز، - دەدى ول نارازى جۇمىسشىلارعا.
30 ماۋسىمدا ەڭبەك جاعدايىن جاقسارتۋدى تالاپ ەتىپ، جۇمىستى توقتاتقان "كەزبي" مەكەمەسى جۇمىسشىلارىمەن كەلىسسوز كوميسسياسى قۇرىلعان. وعان نارازى جۇمىسشىلار وكىلى رەتىندە ازامات جاپاروۆ، جولمۇرات ۇلىقپانوۆ، بايمۇرات اجەكەنوۆ، ءسابيت مولدابەكوۆ كىرگەن. كەشكى توعىزداردا اياقتالعان كوميسسيا جۇمىسىنا جينالعانداردىڭ كوڭىلى تولمادى. ولار تالاپتارىنىڭ بىردە-بىرەۋىنىڭ شەشىلمەگەنى ايتادى.
جۇمىسشىلاردىڭ تالاپتارى تومەندەگىدەي:
- جالاقىنى كوتەرىپ، سىياقى تولەۋ جۇيەسىن قايتا قاراستىرۋ;
- مەرەكە كۇندەرىندە جاسالعان جۇمىستار مەن زياندى ايماقتاعى جۇمىس ءۇشىن اقى تولەۋ;
- جۇمىسشىلاردى ەڭبەك وتىلىنە قاراي قىزمەت جاعىنان كوتەرمەلەۋ;
- ەڭبەك دەمالىسىنا قوسىمشا ساۋىقتىرۋ ورىندارىنا بارۋدى قامتاماسىز ەتۋ;
- ۇڭعىمالاردى جوندەيتىن شەبەرلەرگە جاعداي جاساۋ;
- بۇرعىشىلاردىڭ قاسىنا كومەكشى بەرۋ;
- ستاندارتقا ساي قۇرال-سايمانمەن قامتاماسىز ەتۋ;
- 2019 جىلدىڭ قاڭتارىنان باستاپ جۇمىسشىلارعا بەرىلەتىن قاراجات تۋرالى ەسەپ بەرۋ.
1992 جىلى قۇرىلعان "كەزبي" جاۋاپكەرشىلىگى شەكتەۋلى سەرىكتەستىگى ماڭعىستاۋ وبلىسىنداعى مۇناي كومپانيالارىنا ۇڭعىمالاردى جوندەۋ بويىنشا قىزمەت كورسەتەدى. ول جاڭاوزەندەگى ەڭ ءىرى مۇناي كومپانياسى "وزەنمۇنايگاز" اكتسيونەرلىك قوعامىنىڭ مەردىگەر مەكەمەسى. مۇندا جالپى سانى 27 بريگادا بار. كومپانيادا 1200-گە جۋىق ادام جۇمىس ىستەيدى.
Abai.kz
