اۋعانستان بيلىگى ۇلتتىق قاۋىپسىزدىك جانە قورعانىس كۇشتەرى (ANDSF) سوڭعى ءبىر ايدا تاليباننىڭ 6 مىڭنان استام سودىرىنىڭ كوزىن جويعانىن مالىمدەدى. تالىبتەردىڭ دە سوققىسىنان ۇكىمەت جاساقتارى ايتارلىقتاي شىعىنعا ۇشىراعان. 

ماۋسىم ايىندا ۇكىمەت تاليباننىڭ العا جىلجۋىنان كەيىن 120 ۋەزدەگى كۇشتەرىن ەۆاكۋاتسيالاپ ۇلگەرگەن. قازىر تاليبان كابۋلدان 50 شاقىرىم جەردە ورنالاسقان سولتۇستىك كاپيسا پروۆينتسياسىنىڭ ورتالىعىن باسىپ الدى. ەل استاناسىنا جاقىن ايماقتا تۇر.

ءبىر اي ىشىندە تاليبان شابۋىلىنان 638 اسكەري قىزمەتكەر مەن بەيبىت تۇرعىن قازا تاۋىپ، 1060 ادام جاراقات العان. قۇربان بولعانداردىڭ كوپ بولىگى باعلان، فارياب، باداحشان، گازني، تاحار، بالح، گور، گەرات، فاراح، كۋندۋز، بادگيس جانە ساري-پۋل پروۆينتسيالارىندا تىركەلگەن.

اۋعان اسكەرىنىڭ شىعىنىنا بايلانىستى رەسمي بيلىك تە تۇسىنىك بەرىپ جاتىر. "مۇنداي ۇلكەن سوعىسقا دايىندىق بولعان جوق، ءبىز پارتيزاندىق سوعىسقا دايىن بولمادىق" دەدى دەپۋتات اريف راحماني.

سونىمەن قاتار، اۋعانستان قورعانىس مينيسترلىگى (قم) اۋعانستان قاۋىپسىزدىك كۇشتەرى سودىرلار باسىپ العان ايماقتاردى قايتارۋ ماقساتىندا تاليباننىڭ نانگارحار، گەرات، بالح، دجۋزدجان، گيلماند، تاحار، باداحشان، كۋندۋز، باگلان جانە كاپيسا پروۆينتسيالارىنداعى پوزيتسيالارىنا قارسى اۋە شابۋىلدارىن كۇشەيتىپ جاتىر.

"سوڭعى تاۋلىكتە قاۋىپسىزدىك پەن قورعانىس كۇشتەرى جۇرگىزگەن وپەراتسيالاردا 258 ءتالىب سودىرلارى ءولتىرىلىپ، تاعى 100-ءى جارالاندى", - دەدى قورعانىس مينيسترلىگى ءباسپاسوز حاتشىسىنىڭ ورىنباسارى فاۆاد امان.

اۋعانستاننان باتىس كواليتسياسى شىعارىلىپ جاتىر. ەلدەگى احۋال ناشارلاپ، تاليبان قوزعالىسى جاپپاي شابۋىلعا شىعۋ ۇستىندە.

Abai.kz