30 ماۋcىم كءۇءنى جاڭاءوزەندە "كەزبي" كومپانياسىنىڭ 600 شاقتى جۇمىسشىسى ەڭبەك جاعدايىن جاقسارتۋدى، جالاقىنى ءوءسىرۋدى تالاپ ەتىپ, جۇمىستى توقتاتتى. بۇل تۋرالى ازاتتىققا وسى مەكەمە جۇمىسشىسى نۇرسۇلتان نۇرىموۆ حابارلادى.

- 21 ماۋسىمدا ەرەۋىلگە شىعاتىنىمىز تۋرالى اكىمدىككە، ەڭبەك ينسپەكتسياسىنا، جۇمىس بەرۋشىگە ەسكەرتتىك. بىراق ەشقانداي جاۋاپ بولمادى. سودان سوڭ بۇگىن، 30 ماۋسىمدا جۇمىستى تولىق توقتاتتىق. تاڭعى 6-دان باستاپ ەشكىم جۇمىسقا بارعان جوق، - دەدى ول.

جۇمىسشىلار

- جالاقىنى كوتەرىپ، سىياقى تولەۋ جۇيەسىن قايتا قاراستىرۋدى،

- مەرەكە كۇندەرىندە جاسالعان جۇمىستار مەن زياندى ايماقتاعى جۇمىس ءۇشىن اقى تولەۋدى،

- جۇمىسشىلارعا ەڭبەك وتىلىنە قاراي كارەرلىك كوتەرمەلەۋ جاساۋدى،

- ەڭبەك دەمالىسىنا قوسىمشا ساۋىقتىرۋ ورىندارىنا بارۋدى قامتاماسىز ەتۋدى،

- ۇڭعىمالاردى جوندەيتىن شەبەرلەرگە جاعداي جاساۋدى،

- بۇرعىشىلاردىڭ قاسىنا كومەكشى بەرۋدى،

- ستاندارتقا ساي قۇرال-سايمانمەن قامتاماسىز ەتۋدى،

- 2019 جىلدىڭ قاڭتارىنان باستاپ جۇمىسشىلارعا بەرىلەتىن قاراجات تۋرالى ەسەپ بەرۋدى تالاپ ەتەدى.

ازاتتىق ءتىلشىسى "كەزبي" مەكەمەسىنىڭ باسشىسى ءبىتىم كەزباەۆقا قوڭىراۋ شالعانىمەن، تۇتقانى كوتەرمەدى. بىراق جۇمىسشىلاردىڭ ايتۋىنشا، ولارمەن كەزدەسۋگە ءبىتىم كەزباەۆ پەن ورىنباسارى وراز كەزباەۆ كەلگەن.

- قازىر ءبىزدىڭ ارامىزدان ءتورت جىگىت - ازامات جاپاروۆ، جولمۇرات ۇلىقپانوۆ، بايمۇرات اجەكەنوۆ، ءسابيت مولدابەكوۆ جۇمىس بەرۋشى، جاڭاوزەن قالاسى اكىمى، ماڭعىستاۋ وبلىسى اكىمىنىڭ ورىنباسارى، ەڭبەك مينيسترلىگىنىڭ وكىلى، وبلىستىق پوليتسيا دەپارتامەنتى باسشىلارىنان قۇرىلعان كوميسسيا وتىرىسىنا قاتىسىپ جاتىر. ءبىز تالابىمىز ورىندالماي كەتپەيمىز. بۇل ىرىڭ-جىرىڭ 2019 جىلدان بەرى جالعاسىپ كەلە جاتىر، شارشادىق، نە بولسا دا نۇكتەسىن قويامىز، - دەدى ازاتىققا جۇمىسشىلاردىڭ ءبىرى.

"كەزبي" جۇمىسشىلارى جۇمىس بەرۋشىدەن وزدەرى قۇرعان كاسىپوداق جۇمىسىنا كەدەرگى كەلتىرمەۋدى دە سۇرايدى.

- كاسىپوداق بەلسەندىلەرىنىڭ ءبىرى بولات ساتىبالديەۆ ەسىمدى جۇمىسشىنى تەحنيكالىق ەمتيحاننان وتكىزبەي قۋدالاپ جاتىر. ءبىز سونى توقتاۋدى تالاپ ەتەمىز. ول – سىن كوتەرمەيتىن جۇمىس جاعدايىن ايتىپ جۇرگەن بەلسەندى جىگىت. بىزدە قۇرال-سايماندار قولدان جاسالعان. ماستەرلەر 15 كۇندىك ۆاحتادا ءوندىرىس باسىندا، جاعدايسىز ۆاگونداردا جاتادى، - دەيدى نۇرسۇلتان نۇرىموۆ.

"كەزبي" كومپانياسى جۇمىسشىلارى 2019 جىلى 25 شىلدەدە كاسىپوداق قۇرىپ، تىركەلگەن. ول جاڭاوزەن قالاسىنداعى "ىنتىماق" سالالىق كاسىپوداعىنىڭ قۇرامىنا ەنگەن. كاسىپوداقتىڭ 600-دەن استام مۇشەسى بار.

"كەزبي" جۇمىسشىلارى كاسىپوداق قۇرىلعان سوڭ جۇمىس بەرۋشىنىڭ ونىڭ جۇمىسىنا كەدەرگى كەلتىرىپ جاتقانىن مالىمدەپ، بىرنەشە رەت نارازىلىق بىلدىرگەن.

2019 جىلى قازان ايىندا "كەزبي" جۇمىسشىلارى جاڭاوزەن قالاسى اكىمدىگىنىڭ الدىنا جينالىپ "جۇمىسشىلار قۇقىعىن قورعايتىن كاسىپوداق قۇرعانى ءۇشىن قۋدالانىپ جاتقانىنا" شاعىمدانعان ەدى. ولار "جۇمىس بەرۋشى كومپانيا جۇمىسشىلاردىڭ قۇقىقتارىن تاپتايدى، سەبەپسىز جۇمىستان شىعارادى" دەگەن ەدى.

1992 جىلى قۇرىلعان "كەزبي" كومپانياسى ماڭعىستاۋ وبلىسىنداعى مۇناي كومپانيالارىنا ۇڭعىمالاردى جوندەيدى. ول – جاڭاوزەندەگى ەڭ ءىرى مۇناي كومپانياسى "وزەنمۇنايگاز" اكتسيونەرلىك قوعامىنىڭ مەردىگەر مەكەمەسى. مۇندا جالپى سانى 27 بريگادا بار. كومپانيادا 1200-گە جۋىق ادام جۇمىس ىستەيدى.

Abai.kz