قازاقستاننىڭ قانت زاۋىتتارى رەسەيلىك باسەكەلەستەرىنىڭ كەسىرىنەن ءوز جۇمىسىن توقاتۋدىڭ از-اق الدىندا. ويتكەنى، وسى ۋاقىتقا دەيىن ەلىمىزدىڭ قانت نارىعىنىڭ 60%-عا جۋىعىن ورىستار مەن بەلارۋستار جاۋلاپ العان.

وسىعان قاتىستى مەركە مەن تاراز قانت زاۋىتتارىنىڭ باقىلاۋ كەڭەسىنىڭ توراعاسى نۇرجان قايىرباەۆ:

«ءبىز ەاەو ءبىرتۇتاس ەكونوميكالىق ايماعىندا جۇمىس ىستەگەندىكتەن ءبىزدىڭ نارىقتاعى كورشىلەرىمىزدەگى باعانىڭ اۋىتقۋى ءبىزدىڭ نارىققا دا اسەر ەتەدى. بيىلعى جىلعى قانت-شيكىزاتى مەن اق قانتتىڭ وتە قىمباتتاپ كەتكەنى، الەمدىك باعا وسۋىندەگى ءۇردىس»، - دەپ ءوز تۇسىندىرگەن.

ەلىمىزدە وتانداستارىمىزدىڭ قاجەتتىلىگىن قانتپەن قامتاماسىز ەتىپ وتىرعان 4 زاۋىت بار. ءدال قازىر اقسۋ مەن مەركە زاۋىتتارى ءوز جۇمىستارىن توقتاتتى. ال، قالعان ەكەۋىنىڭ ىشىندە، ايىنا 25 مىڭ توننا شىعاراتىن تاراز قانت زاۋىتى بار بولعانى ايىنا 15-17 مىڭ توننا ءونىم وندىرۋگە كوشكەن.

بۇل جايىندا باق وكىلدەرىنە نۇرجان قايىرباەۆ:

«4 قازاقستىندىق زاۋىت 75 رەسەيلىك جانە 4 بەلورۋستىق زاۋىتتارمەن باسەكەلەستىككە توتەپ بەرە المايدى. نارىق ورتاق بولعاندىقتان ونى ورىس پەن بەلارۋستار وندىرگەن قانت جاۋلاپ الدى. جامبىل وبلىسىندا قانت قىزىلشاسى از وسىرىلەدى، سوندىقتان بارلىق ءونىمدى وندەۋ ءۇشىن مەركە زاۋىتى بار-جوعى 75 كۇنىن ىستەيدى»، - دەيدى.

قازاق قانت زاۋىتتارى ءۇشىن قول جەتىمدى شيكىزات الۋعا ەاەو ىشىندە توسقاۋىل قويىلعان. ودان شىعۋدىڭ جالعىز جولى – جۋىق ارادا قانت قىزىلشاسىن وسىرەتىن فەرمەلەردى ىنتالاندىرۋ. ايتپەسە، رەسەي كومانيالارى قازاق قانت ءوندىرىسىن بەسىگىندە تۇنشىقتىرادى. قول جەتىمدى شيكىزاتسىز ءبىز ءوز نارىعىمىزدى قورعاپ قالا المايمىز.

قالىپتاسقان جاعداي اسا اۋىر، سوندىقتان وتاندىق ءونىمدى تۇتىنۋشى رەتىندە بۇدان بىلاي ءبىزدىڭ بيلىك قازاقستاندىقتاردى ءوز قانتىمىزبەن قامتاماسىز ەتۋگە ىنتا تانتىتار دەگەن ويدامىز.

تاقىرىپقا تۇزدىق رەتىندە ايتا كەتەيىك، ءدال قازىر قازاقستاندا قانت تاپشىلىعى جوق. الايدا يمپورتقا تاۋەلدىلىك ەسەلەپ ارتقان. بۇل تۋرالى قازاقستاننىڭ باسەكەلەستىكتى قورعاۋ جانە دامىتۋ اگەنتتىگىنىڭ توراعاسى سەرىك جۇمانعارينمەن كەزدەسۋدە قانت تاماق جانە قايتا وڭدەۋ ونەركاسىبى، قانت ءوندىرۋشى زاۋىتتار قاۋىمداستىعىنىڭ وكىلدەرى مالىمدەگەن.

ءابىل-سەرىك الىاكبار

Abai.kz