قازقستاننىڭ اقپارات جانە قوعامدىق دامۋ ءمينيسترى ايدا بالاەۆا باق سالاسى قىزمەتكەرلەرىن كاسىبي مەرەكەسىمەن قۇتتىقتادى. مينيستر ءوز قۇتتىقتاۋىن Facebook جەلىسىندەگى جەكە پاراقشاسىندا جاريالاعان.

«قۇرمەتتى اقپارات سالاسىنىڭ قىزمەتكەرلەرى!

بارشاڭىزدى كاسىبي مەرەلەرىڭىزبەن شىن جۇرەكتەن قۇتتىقتايمىن!

اقپارات جانە قوعامدىق دامۋ مينيسترلىگىنىڭ باستاماسىمەن ەلوردامىزدا «جۋرناليستەر اللەياسىن» اشۋ جوسپارلانۋدا. تەگىن ينتەرنەتكە قوسىلۋ مۇمكىندىگىن قاراستىراتىن اللەيا تىلشىلەر قاۋىمىنىڭ شىعارماشىلىعىن شىڭدايتىن جەر عانا ەمەس، باس قالامىزدىڭ بارشا تۇرعىندارى مەن قوناقتارى ءۇشىن دە ەڭ سۇيىكتى ورىنعا اينالادى دەپ سەنەمىن.

اللەياعا ومىردەن ءوتىپ كەتكەن جۋرناليستيكاداعى جارقىن تۇلعالاردىڭ ەسىمدەرى جازىلعان ارنايى اعاشتار ءوسىرىپ، ەسكە الۋ تاقتالارىن ورناتامىز. سوندىقتان اللەيانى اشۋ مەرزىمىن كوشەت وتىرعىزۋعا ەڭ قولايلى كەزەڭ كۇز ماۋسىمىنا اۋىستىردىق.

بۇل بىزگە تاعى ءبىر بىرەگەي جوبانىڭ اياسىندا باس قوسىپ، پىكىر الماسىپ، بىرىگىپ يگى ءىس اتقارۋعا جول اشاتىن تاماشا مۇمكىندىك بولارى ءسوزسىز»، - دەيدى مينيستر.

28 ماۋسىم - بايلانىس جانە اقپارات قىزمەتكەرلەرىنىڭ كۇنى. 2004 جىلدان بەرى ماۋسىم ايىنىڭ سوڭعى جەكسەنبىسى جۋرناليستەر كۇنى رەتىندە اتالىپ وتكەنىمەن، 2011 جىلدىڭ 20 قازانىندا ەل پرەزيدەنتى جارلىق شىعارىپ، ماۋسىم ايىنىڭ 28 جۇلدىزى - «بايلانىس جانە اقپارات قىزمەتكەرلەرىنىڭ كۇنى» بولىپ بەلگىلەندى.

Abai.kz