بۇگىن ءماجىلىس سپيكەرى نۇرلان نىعماتۋليننىڭ توراعالىعىمەن پالاتا بيۋروسى ءوتىپ، وندا الداعى جالپى وتىرىستىڭ كۇن ءتارتىبى ناقتىلاندى.

بيۋرو وتىرىسىندا دەپۋتاتتار قاراۋىنا ازاماتتاردىڭ جەكەلەگەن ساناتتارىن الەۋمەتتىك قورعاۋ ماسەلەلەرى بويىنشا زاڭنامالىق تۇزەتۋلەر I وقىلىمدا ۇسىنىلماق.

زاڭ جوباسىنىڭ ماقساتى – مۇگەدەكتىگى بار ادامدارعا قاتىستى زاڭناماداعى كەمسىتۋشىلىك تەرميندەردى جويۋ، الەۋمەتتىك قورعاۋ جانە جۇمىسقا ورنالاستىرۋدى ىنتالاندىرۋ، مۇگەدەكتىگى، اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردىڭ مولشەرىن ارتتىرۋ، زەينەتاقىمەن قامسىزداندىرۋ ماسەلەلەرىن جەتىلدىرۋ بويىنشا شارالار قابىلداۋ.

سونىمەن قاتار، كۇن ءتارتىبىنىڭ جوباسىندا رەيدەرلىككە قارسى كۇرەستى كۇشەيتۋ، كاسىپكەرلىك قىزمەتتى مەملەكەتتىك ورگاندار مەن لاۋازىمدى ادامداردىڭ زاڭسىز ارالاسۋىنان قورعاۋ جانە باعالى مەتالداردىڭ زاڭسىز اينالىمىنا كەدەرگى كەلتىرەتىن شارالاردى كۇشەيتۋ ماسەلەلەرىنە قاتىستى زاڭ جوباسىن I وقىلىمدا قاراۋ ۇسىنىلدى.

الداعى جالپى وتىرىستا بىرقاتار زاڭ جوبادارى II وقىلىمدا قارالماق. اتاپ ايتقاندا،  ەڭبەك كودەكسىنە قاشىقتىقتان جۇمىس ىستەۋدى قۇقىقتىق رەتتەۋدى جەتىلدىرۋ، «مەملەكەتتىك فەلدەگەرلىك بايلانىس تۋرالى» جانە وعان ىلەسپە زاڭ جوبالارى بار.

سونداي-اق، بيۋرو وتىرىسىندا پالاتا كوميتەتىنە بيرجالىق ساۋدانى دامىتۋ جانە جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن جۇمىسقا الۋ كوزدەلگەن.

Abai.kz