ادۆوكاتتىڭ سوزىنشە، سوت گۇلنار قوسداۋلەت، گۇلباران ءومىرالى، گۇلپيا قازىبەك، نۇرزات ەرمەكباي، ءجاميلا ماكەنگە 30 ايلىق ەسەپتىك كورسەتكىش (87 مىڭ تەڭگە) مولشەرىندە ايىپپۇل سالىپ، ودان سوڭ 30 پايىز جەڭىلدىكپەن 61 550 تەڭگە تولەۋگە مىندەتتەگەن. ال اقيقات قالليوللاعا 41 مىڭ تەڭگە ايىپپۇل تاعايىنداسا، قالي اقىتحانعا ەسكەرتۋ بەرگەن.

سوت ولاردى "بەيبىت ميتينگ وتكىزۋ زاڭىن بۇزدى" (اكىمشىلىك كودەكستىڭ 488-بابى) دەپ ايىپتادى.

- ءبىز ايىبىمىزدى مويىنداعان جوقپىز جانە ەشقانداي ايىپپۇلدى تولەمەيتىنىمىزدى ايتتىق، - دەدى گۇلنار قوسداۋلەت ازاتتىققا.

پوليتسياعا جەتكىزىلگەن بايبولات كۇنبولاتۇلى "ميتينگىگە قاتىسقان جوق، تەك ۆيدەوعا ءتۇسىرىپ ءجۇردى" دەپ، سۋديا ونىڭ ءىسىن قىسقارتقان.

الماتى قالاسىنىڭ اكىمشىلىك سوتى دا، پوليتسيا دەپارتامەنتى دە بۇل جاعدايعا قاتىستى رەسمي مالىمدەمە تاراتپادى.

18 مامىردا ساعات 11-گە قاراي شىڭجاڭداعى تۋىستارىنىڭ سۋرەتتەرىمەن قوسا قازاق، قىتاي، اعىلشىن جانە ورىس تىلىندە "100 كۇن" دەپ جازىلعان پلاكات ۇستاعان بىرنەشە ادام الماتىداعى قىتاي كونسۋلدىعى الدىنا جينالدى. پوليتسيا قىزمەتكەرلەرى ولاردىڭ جولىن بوگەپ، كونسۋلدىققا جاقىنداتقان جوق. نارازىلار ديپلوماتيالىق مەكەمە ماڭىندا تۇرىپ، تالاپتارىن ايعايلاپ ايتتى.

نارازىلاردىڭ كەيبىرى تۋىستارىنىڭ شىڭجاڭداعى "ساياسي قايتا تاربيەلەۋ"لاگەرىنە قامالعانىن ايتسا، كەيبىرى "نەگىزسىز ايىپتارمەن" كوپ جىلعا سوتتالعانىنا، ەندى ءبىرى قىتاي بيلىگى شىڭجاڭداعى تۋىستارىنىڭ قۇجاتتارىن تارتىپ الىپ، قازاقستانعا شىعارماي قويعانىنا شاعىمدانادى. ولار قىتايدان جاقىندارىن بوساتۋدى تالاپ ەتەدى.

بەيبىت شارانى اياقتاپ، كونسۋلدىق ماڭىنان كەتىپ بارا جاتقان ولاردى پوليتسيا ۇستاپ اكەتىپ، بولىمشەگە جەتكىزگەن.

شىڭجاڭداعى تۋىستارىنا اراشا سۇراعانداردىڭ نارازىلىق اكتسياسى ءجۇز كۇنگە جالعاسسا دا، قىتاي ديپلوماتتارىنان ەشكىم ولارعا جولىعىپ، سويلەسكەن جوق.

قازاقستان قىتاي كونسۋلدىعى الدىنا كەپ جۇرگەندەردى وسىمەن ەكىنشى رەت جازالادى. وتكەن اپتادا قىتايدىڭ الماتىداعى كونسۋلدىعى الدىنداعى نارازىلىق اكتسياسىنا قاتىسقان بايبولات كۇنبولاتۇلى، جەڭىس زارقان، الماحان مىرزانقىزى، نۇرزات ەرمەكبايقىزى ايىپپۇل العان. سوت اقيقات قاليوللا، گۇلپيا قازىبەكقىزى جانە تۇرسىنگۇل نۇراقايعا ەسكەرتۋ بەرگەن. سۋديا ولاردى "بەيبىت جيىن وتكىزۋ ءتارتىبىن بۇزعانى" ءۇشىن جاۋاپقا تارتقان.

Abai.kz