"الەۋمەتتىك مەديتسينالىق ساقتاندىرۋ قورى" اق-نىڭ باسقارما توراعاسى بولات توكەجانوۆ ءوزىنىڭ ەڭبەكاقسىنىڭ مولشەرىن ايتتى. بۇل تۋرالى kznews.kz سايتىنا سىلتەمە جاساپ، Abai.kz سايتى حابارلايدى. 

"مەنىڭ ايلىعىم ايىنا 1 ميلليون 500 مىڭ تەڭگەنى قۇرايدى. ماعان دەيىن ىستەگەن توراعالارمەن سالىستىرساق، قارجىلاندىرۋ كولەمى 2019 جىلدان بەرى ەكى ەسە ۇلعايدى – 1,8 ترلن تەڭگە. ال بىراق ەڭبەكاقىم ول كىسىلەرگە قاراعاندا 20 پايىزعا تومەندەگەن بولاتىن", – دەيدى بولات توكەجانوۆ ورتالىق كوممۋنيكاتسيالار قىزمەتىندە وتكەن بريفينگتە.

ول سونىمەن قاتار 2021 جىلعا ارنالعان ساتىپ الۋ جوسپارىنا سايكەس حالىققا بيۋدجەتتىك مەديتسينالىق كومەك 1,8 ترلن تەڭگە، ونىڭ ىشىندە كەپىلدەندىرىلگەن مەديتسينالىق كومەك كولەمى 1,1 ترلن تەڭگە كولەمىندە قاراستىرىلعانىن ايتتى.

"مىندەتتى مەديتسينالىق ساقتاندىرۋ جۇيەسىندەگى مەديتسينالىق قىزمەتتەر – 700 ميلليارد تەڭگە. بيىل ءبىز ساقتاندىرۋ قاراجاتىنىڭ ءتۇسىمىن 150 ميلليارد تەڭگەگە ارتتىرامىز. بۇل اقشامەن قامتاماسىز ەتۋ ءۇشىن نە ماڭىزدى؟ ناۋقاس مەديتسينالىق ساقتاندىرۋ قورىمەن قاي جەردە ورنالاسقاندىعىنا جانە مەنشىكتىڭ قانداي تۇرىنە قاراماستان كەلىسىمشارت جاساسقان كەز كەلگەن كلينيكادا جوعارى ساپالى مەديتسينالىق كومەك الۋى كەرەك", – دەيدى بولات توكەجانوۆ.

Abai.kz