بىشكەكتە بيوتۋالەت سالىپ ءجۇرىپ، اقىرى سالپاڭ ەتىپ قازاقستانعا قاشىپ كەلگەن، از ۋاقىتتىڭ ىشىندە قازاقستاننىڭ اليۋميني ءوندىرىسىن باۋىرىنا باسىپ، الەم الپاۋىتتارىنىڭ قاتارىنا قوسىلىپ، ابدەن بايىعان، قازاقستاننىڭ قازبا بايلىعىنا قوجالىق جاساپ ءجۇرىپ، جەر بەتىندەگى اسا ءىرى بايلاردىڭ ءتىزىمىن جاساپ وتىراتىن «Forbes» جۋرنالىنىڭ  تۇراقتى كەيىپكەرىنە اينالعان، شوديەۆ، يبارگيموۆ پەن بىرىگىپ «ەۋرازيالىق توپ» قۇرىپ، قازاق بيلىگىنىڭ «سپونسورى» بولعان، كەيىن ءوز تۋعان ۇلتى توبەسىنە تيتتەي تاقيا كيگىزىپ، شاقىرىپ العان (يزرايل ازاماتى) الەكساندر ماشكەۆيچ دەگەن ءجويت بۇگىن قازاققا، قازاقستان حالقىنا «اقىل» ايتىپتى.

الەۋمەتتىك جوبالار تۋرالى فورۋم ءوتىپ جاتىر ەكەن. ونلاين رەجيمدە. فورۋمدى ۇيىمداستىرۋشى – نۇرسۇلتان نازارباەۆ قورى، ال فورۋمنىڭ تاقىرىبى – «مەملەكەت، بيزنەس جانە كەۇ: تۇراقتى دامۋ جولىنداعى بىرلىك پەن ارىپتەستىكتىڭ 30 جىلى»، - دەپ اتالىپتى.

مىنە، وسى فورۋمعا ونلاين قاتىسقان وليگارح الەكساندر ماشكەۆيچ: «قازاقستاندىقتار وسىنداي ەلدە ءومىر ءسۇرىپ جاتقانى ءۇشىن قۇدايعا شۇكىرلىك ايتۋى كەرەك», - دەپ سويلەپتى.

«مەن قازىر برازيليادامىن. مۇندا ءبىزدىڭ كومپانيامىز ەڭ ءىرى جوبالاردىڭ ءبىرىن جۇزەگە اسىرىپ جاتىر. مەن قازاقستاننىڭ كوپتەگەن ازاماتتارىنىڭ مەن ءجۇرىپ وتكەن ونشاقتى ەلدى ءجۇرىپ وتكەنىن قالار ەدىم. سوندا ولار ءوز ەلىندە (قازاقستاندا) تۇرىپ جاتقاندارىنا قۇدايعا شۇكىرلىك ايتىپ، وبەكتيۆتى باعا بەرەر ەدى.

30 جىل بۇرىن قازاقستاننىڭ ءبىرىنشى پرەزيدەنتى نۇرسۇلتان نازارباەۆ پاتەرناليستىك، الەۋمەتتىك باعىتتالعان مەملەكەت مودەلىن قۇردى. ول مودەل كۇنى بۇگىنگە دەيىن ءومىر ءسۇرىپ كەلەدى. مەملەكەتىمىز ءاربىر ازاماتتىڭ جاعدايىنا الاڭداپ، ولاردىڭ ارقايسىسىنىڭ باقىتتى بولۋى ءۇشىن بارىن جاساپ جاتىر. وتكەن جىلعى پاندەميا ءىس جۇزىندە الەمدى وزگەرتتى. كەز كەلگەن مەملەكەتتىڭ ەكونوميكالىق مودەلىنە وتە قاۋىپتى سترەسس-تەست بولدى. ءبىز قازاقستانىڭ ەكونوميكاسى مەن الەۋمەتتىك مودەلى بۇل سىناقتان قالاي وتكەنىن كوردىك. مەن ەلباسىعا وسىنداي مودەل قۇرىپ بەرگەنى ءۇشىن العىس ايتقىم كەلەدى»، - دەپتى ماشكەۆيچ.

«Eurasian Resources Group» (ERG) ديرەكتورلار كەڭەسىنىڭ توراعاسى الەكساندر ماشكەۆيچ ءوزى باسشىلىق ەتەتىن «ەۋرازيالىق توپ» تۋرالى دا ايتىپتى. بۇيدەيدى:

«ءبىز ەلىمىزدەگى الەۋمەتتىك باعىتتالعان ەڭ كۇشتى كومپانيامىز. 27 جىل بۇرىن ءبىز ەلىمىزدىڭ وڭىرلەرىنە، مونوقالالارعا بارعاندا مەن تاڭ قالدىم. مەن وعان دەيىن سوۆەت وداعىنىڭ ءوز ەلىنىڭ ازاماتتارىنا مۇنشالىق ادامگەرشىلىكتەن تىس قارىم-قاتىناستا بولعانىن بىلمەپپىن. مەن حرومتاۋعا نەمەسە اقسۋعا بارعاندا، وندا ءتىپتى بالاباقشانىڭ جوقتىعىن كوردىم. مەكتەپتەر جەتىسپەيدى. ءتىپتى ەمحانالار جوق. ماعان بۇل كورىنىس اۋىر ءارى قورقىنىشتى بولدى.

ال بۇگىن ءبىز جۇمىس جاساپ جاتقان سول مونوقالالار 30 جىل بۇرىنعى قالالاردان اجەپتاۋىر وزگەرگەنىن ماقتانىشپەن ايتامىن. قۇددى ول كورىنىستەر وزگە عالامشاردا بولعانداي. تۇسىنىكتى بولۋى ءۇشىن، سوڭعى ون جىلدىڭ ىشىندە ءبىزدىڭ كومپانيامىز الەۋمەتتىك مەمورراندۋم نەگىزىندە قوستاناي، پاۆلودار، قاراعاندى مەن اقتوبە وبلىستارىنا 280 ميلليارد تەڭگە ءبولدى»، - دەپتى.

Abai.kz