قازاقستان 2007 جىلعى سۋعا باتقان كەمەلەردى شىعارۋ تۋرالى نايروبي حالىقارالىق كونۆەنتسياسىنا قوسىلدى. مەملەكەت باسشىسى قاسىم-جومارت توقاەۆ اتالعان قۇجاتتى راتيفيكاتسيالاۋ تۋرالى زاڭعا قول قويدى. بۇل تۋرالى قر يندۋستريا جانە ينفراقۇرىلىمدىق دامۋ مينيسترلىگى مالىمدەدى.

كونۆەنتسيا حالىقارالىق تەڭىز ۇيىمىنىڭ باستاماسىمەن قابىلداندى. ونى 53 مەملەكەت راتيفيكاتسيالادى. بۇل - الەمدىك فلوتتىڭ 75%-دان استامى.

كونۆەنتسياعا قوسىلۋ ەل اۋماعىندا شەتەلدىك كەمەلەر سۋعا باتقاندا قازاقستاننىڭ مۇددەلەرىن قورعاۋعا مۇمكىندىك بەرەدى. قۇجات مەنشىك يەسىنە سۋعا باتقان كەمەنى الىپ تاستاۋداعى جاۋاپكەرشىلىگىنەن باس تارتۋعا جول بەرمەيدى.

كونۆەنتسيا كەلەسى ماسەلەلەردى رەتتەيدى:

– كەمە يەسىنىڭ ورنالاسقان جەرىن انىقتاۋداعى، سۋعا باتقان كەمەنى بەلگىلەۋدەگى جانە بورتىنداعى وبەكتىلەردى قوسا العاندا، كەز كەلگەن بولىكتى الىپ تاستاۋداعى قارجىلىق جاۋاپكەرشىلىگىن بەلگىلەۋ;

- كەمە يەسىنىڭ اپاتتى جويۋ جونىندەگى قاجەتتى شىعىستاردى وتەۋىنىڭ كەپىلى رەتىندە كەمەدە (جالپى سىيىمدىلىعى 300 جانە ودان دا كوپ تىركەلىمدىك توننا) باتىپ كەتكەن كەمەلەردى الىپ تاستاۋدى قاراستىراتىن جاۋاپكەرشىلىگىن ساقتاندىرۋ نەمەسە وزگە دە قارجىلىق قامتاماسىز ەتۋ تۋرالى كۋالىگىنىڭ بولۋ مىندەتتەمەسى.

سونىمەن قاتار، كونۆەنتسيانى راتيفيكاتسيالاۋ سۋعا باتقان كەمەنىڭ مەنشىك يەسىنىڭ ساقتاندىرۋ كومپانياسىنا شىعىستاردى تىكەلەي وتەۋ تۋرالى تالاپتار قويۋ قۇقىعىن بەرەدى.

كونۆەنتسيانىڭ 3-بابىنا سايكەس مەملەكەت حالىقارالىق تەڭىز ۇيىمىنىڭ باس حاتشىسىنا ءتيىستى حابارلاما جىبەرە وتىرىپ، كونۆەنتسيا نورمالارىن اۋماقتىق سۋلاردا قولدانا الادى.

شەتەلدىك كەمەلەر ەل اۋماعىنا ۇنەمى كىرىپ تۇراتىندىقتان، قازاقستان اتالعان قۇجاتتى راتيفيكاتسيالاۋعا مۇددەلى بولدى.

2020 جىلى اقتاۋ جانە قۇرىق تەڭىز پورتتارىنا 1283 كەمە كىردى. ونىڭ ىشىندە 261-ءى قازاقستاننىڭ، 208-ءى رەسەيدىڭ، 231-ءى يراننىڭ جانە 579-ى ءازىربايجاننىڭ كەمەلەرى. حالىقارالىق تاسىمالدارعا 67 كەمە، ونىڭ ىشىندە قازاقستاننىڭ 9, يراننىڭ 23, رەسەيدىڭ 24 جانە ءازىربايجاننىڭ 12 كەمەسى تارتىلعان.

كاسپي تەڭىزىنىڭ قازاقستاندىق سەكتورىندا سۋعا باتقان شەتەلدىك كەمەلەر:

2015 جىلى يراننىڭ «چيبا» كەمەسى باتىپ كەتتى. ونى يراننىڭ «حازار شيپينگ لاين» كومپانياسى جاساپ، «MOALEM» يراندىق ساقتاندىرۋ كومپانياسىنا كەمە قۇقىعىن بەرگەن. سوسىن كەمە قازاقستاننىڭ «بەيساتوۆ س.د.» كومپانياسىنا ساتىلعان. قازىرگى ۋاقىتتا جۇمىلدىرۋ جۇمىستارى جۇرگىزىلۋدە. كەمەنى 2021 جىلدىڭ ءبىرىنشى جارتىجىلدىعىنا كوتەرۋ جوسپارلانعان.

2016 جىلى «پەسچانىي» ويىنا رەسەيدىڭ «اراكس» تانكەرى باتىپ كەتتى. كەمەنى «ترانسكاسپي» قب يەسى قازاقستاننىڭ «باتىسەنەردجي گرۋپپ» كومپانياسىنا ساتىپ جىبەرگەن. كەمە 2018 جىلى شىعارىلىپ، جويىلدى.

Abai.kz