ءبىلىم جانە عىلىم مينيسترلىگىنىڭ Facebook-تە ونلاين فورماتتا وتكەن اپپارات جينالىسى كەزىندە وقۋ جىلىنىڭ ءتورتىنشى توقسانىنىڭ باستالۋ دايىندىعى پىسىقتالدى.

ۆەدومستۆو باسشىسى اسحات ايماعامبەتوۆ وقۋ پروتسەسى ەپيداحۋالعا بايلانىستى ۇيىمداستىرىلاتىنىن جەتكىزدى.

- ەڭ باستى ماسەلە – وقۋشىلار مەن ۇستازداردىڭ دەنساۋلىعى. وسىنى ويىمىزدان شىعارماۋىمىز كەرەك. سوندىقتان بارلىق سانيتارلىق-گيگيەنالىق شارا مەن نورمالار ساقتالىپ، قاجەتتى شارالار قابىلدانۋى كەرەك. ول ءۇشىن مەكتەپتەر بارلىق جاعدايمەن قامتاماسىز ەتىلۋى ءتيىس. «جاسىل ايماقتاردا»، «قىزىل ايماقتاردا»، «سارى ايماقتاردا» وقۋ پروتسەسىن ۇيىمداستىرۋدىڭ ءوزىنىڭ ەرەكشەلىكتەرى بار. سول سەبەپتى جۇمىستى وسى ەرەكشەلىكتەرگە سايكەس ۇيىمداستىرۋ قاجەت, - دەپ ءتۇسىندىردى مينيستر جينالىستا.

ايماعامبەتوۆ وقۋ فورماتى بويىنشا اتا-انالارعا، وقۋشىلارعا ءتيىستى اقپاراتتى الدىن الا جەتكىزۋ كەرەك ەكەنىنە توقتالدى.

- وقۋ جوسپارى، كەستە، فورمات بويىنشا اقپاراتتى الدىن الا جەتكىزۋ قاجەت. ساباقتىڭ باستالۋىنا ءبىر كۇن عانا ۋاقىت قالدى. بارلىق مالىمەت اتا-انالاردا بولۋى كەرەك. بۇل ماسەلەنى ءبىر اپتا بۇرىن ايتقان بولاتىنمىن, - دەدى ول.

مينيستر اقپاراتتار اتا-انالارعا جەتكىزىلدى دەپ ۇمىتتەنەتىنىن ايتتى.

Abai.kz