بۇگىن مەملەكەت باسشىسى رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ توراعاسى ناتاليا گودۋنوۆانى قابىلدادى.

قازاقستان پرەزيدەنتىنە ەسەپ كوميتەتىنىڭ توراعاسى ۆەدومستۆونىڭ 2020 جىلى اتقارعان جۇمىستارىنىڭ نەگىزگى ناتيجەلەرى مەن الداعى ۋاقىتتا ورىندايتىن مىندەتتەرى جونىندە مالىمەت بەردى.

ناتاليا گودۋنوۆانىڭ ايتۋىنشا، بىلتىر ەسەپ كوميتەتى 18 اۋديتورلىق جانە ساراپتامالىق-اناليتيكالىق ءىس-شارا وتكىزىپ، 47 تريلليون تەڭگەدەن استام قارجىعا اۋديت جۇرگىزگەن.

1,8 تريلليون تەڭگەگە دەيىنگى بيۋدجەت قارجىسىن ءتيىمسىز جوسپارلاۋعا جانە جۇمساۋعا بايلانىستى زاڭ بۇزۋشىلىقتار 1,5 ەسە، 81 ميلليارد تەڭگەگە دەيىنگى قارجىلىق زاڭ بۇزۋشىلىقتار 2 ەسە وسكەن.

قاسىم-جومارت توقاەۆقا پاندەميا كەزىندە ەكونوميكانى قولداۋ ماقساتىندا داعدارىسقا قارسى كۇرەسكە بولىنگەن قارجىنىڭ ءتيىمدى جۇمسالۋىن باقىلاۋ جونىندەگى مەملەكەت باسشىسىنىڭ بۇعان دەيىن بەرگەن تاپسىرماسىنىڭ ىسكە اسىرىلۋ بارىسى باياندالدى. سونداي-اق كۆازيمەملەكەتتىك سەكتورداعى اكتيۆتەردىڭ ءتيىمدى باسقارىلۋىنا جۇرگىزىلگەن باعالاۋ جۇمىستارى جايىندا ايتىلدى.

كەزدەسۋ سوڭىندا پرەزيدەنت ەسەپ كوميتەتىنىڭ توراعاسىنا بىرقاتار ناقتى تاپسىرما بەردى، اتاپ ايتقاندا، مەملەكەتتىك اۋديت جانە قارجىلىق باقىلاۋ ورگاندارى قىزمەتىن جەتىلدىرۋدى مىندەتتەدى.

Abai.kz