ەۋروپانىڭ بىرقاتار ەلدەرىندە كوروناۆيرۋستىڭ ءۇشىنشى تولقىنى باستالدى. رەسمي تۇردە پاندەميانىڭ ءۇشىنشى تولقىنى باستالعانىن اۋستريانىڭ دەنساۋلىق ساقتاۋ ءمينيسترى رۋدولف انشوبەر مالىمدەسە، فرانتسيا، گەرمانيا جانە يتاليا كەلەر اپتادا جاريالاۋى مۇمكىن ەكەنى ايتىلۋدا.  

The Guardianنىڭ جازۋى بويىنشا كوروناۆيرۋستىڭ تاۋلىكتىr جۇعۋى اقپان ايىنان باستاپ ارتىپ، قازىر رەكوردتىق دەڭگەيگە جەتكەن. كوپتەگەن ەۋروپا ەلدەرى كارانتيندىك شەكتەۋلەردى ارتتىرۋ ۇستىندە.

دۇيسەنبىدەن باستاپ يتاليا كارانتيندى كۇشەيتتى. ەلدەگى اۋرۋحانالاردىڭ 90% بوس ەمەس، ون ايماقتا مەكتەپتەر مەن دۇكەندەر جابىلدى. مەيرامحانالار تەك قانا جەتكىزۋ قىزمەتى ارقىلى جۇمىس ىستەۋدە.

فرانتسياداعى جاعداي دا ءماز ەمەس. ورتا ەسەپپەن پاريجدە ءار 12 مينۋت سايىن تىنىس الۋ اپپاراتىنا مۇقتاج ءبىر جان تىركەلۋدە. تاۋلىكتىك جۇقتىرۋ بويىنشا پولشا، ۆەنگريا جانە چەحيا العا شىقتى.

پاسحا مەرەكەسىنە بايلانىستى ەۋروپا ەلدەرىندە ۆيرۋس جۇقتىرۋ سانى ارتادى دەپ كۇتىلۋدە.

Abai.kz