گۇلجامال قازاقباەۆا، قازاقستاننىڭ ەڭبەك سىڭىرگەن ءارتىسى:

- شىنىمدى ايتسام، مەنەن سۇحبات العىڭ كەلگەنىنە تاڭعالدىم. انەۋ كۇنى «جۇلدىزدار وتباسى» دەگەن جۋرنالدان كەلىپتى. مەن ايتتىم: «ويباي-اي، مەن ءتىپتى «جۇلدىزدار وتباسى» دەگەن جۋرنالعا شىعۋعا ۇيالامىن. مەن جۇلدىز ەمەسپىن»، - دەپ... قازىر قاتىرىپ رول ويناپ جاتقانىم جوق. رەجيسسەرلەرگە وكپەم جوق، تەاتردا سپەكتاكلدىڭ ءبارى جاستارعا لايىقتالىپ قويىلادى. ول دا دۇرىس.

- جاقىندا عانا «حانشانىڭ كوز جاسى» دەگەن قويىلىمدا باستى ءرولدى ويناعان جوقسىز با؟

- ءيا، سوڭعى ءبىر جىلدا شۇكىرشىلىك جاسايتىن دۇنيە وسى. بۇل ايگۇل يمانباەۆانىڭ «ا.ي. تەاترىندا» قويىلعان شىعارما. قىرعىز دراماتۋرگى سۇلتان راەۆتىڭ پەساسى، بۇل ءوزى ءبىزدىڭ ورالحان سياقتى، ءبىتىمى بولەك قالامگەر. كومپوزيتورى دا، سۋرەتشىسى دە، بالەتمەيستەرى دە قىرعىزدان بولدى. رەجيسسەر قۋاندىق قاسىموۆ. قۇربانجان داتقا دەگەن - تاريحتا بولعان، قىرعىزدىڭ قىرعىز بولىپ قالۋىنا ۇلكەن ۇلەس قوسقان ايەل ەكەن. بەس ۇلىنىڭ تورتەۋى جاۋ قولىنان ولەدى. سۇتكەنجەسىنىڭ تاعدىرى قىل ۇستىندە تۇرعاندا، ەل ءۇشىن ءوز ۇلىن دارعا بايلاپ بەرگەن ەكەن. سونداي ايەلدىڭ وبرازىن سومدادىم. سپەكتاكل جامان شىقپاعان سياقتى. دومبىرانىڭ ىشەگىندەي تارتىلىپ تۇرادى دا، ەڭ سوڭىندا شارت ۇزىلەدى. قولىمىزعا ۇستاپ شىعاتىن رەكۆيزيت جوق، ءبارى «قيالدا» عانا.

- سوزىڭىزگە قاراعاندا، وزىڭىزگە ەرەكشە اسەر ەتكەن رول سياقتى...

گۇلجامال قازاقباەۆا، قازاقستاننىڭ ەڭبەك سىڭىرگەن ءارتىسى:

- شىنىمدى ايتسام، مەنەن سۇحبات العىڭ كەلگەنىنە تاڭعالدىم. انەۋ كۇنى «جۇلدىزدار وتباسى» دەگەن جۋرنالدان كەلىپتى. مەن ايتتىم: «ويباي-اي، مەن ءتىپتى «جۇلدىزدار وتباسى» دەگەن جۋرنالعا شىعۋعا ۇيالامىن. مەن جۇلدىز ەمەسپىن»، - دەپ... قازىر قاتىرىپ رول ويناپ جاتقانىم جوق. رەجيسسەرلەرگە وكپەم جوق، تەاتردا سپەكتاكلدىڭ ءبارى جاستارعا لايىقتالىپ قويىلادى. ول دا دۇرىس.

- جاقىندا عانا «حانشانىڭ كوز جاسى» دەگەن قويىلىمدا باستى ءرولدى ويناعان جوقسىز با؟

- ءيا، سوڭعى ءبىر جىلدا شۇكىرشىلىك جاسايتىن دۇنيە وسى. بۇل ايگۇل يمانباەۆانىڭ «ا.ي. تەاترىندا» قويىلعان شىعارما. قىرعىز دراماتۋرگى سۇلتان راەۆتىڭ پەساسى، بۇل ءوزى ءبىزدىڭ ورالحان سياقتى، ءبىتىمى بولەك قالامگەر. كومپوزيتورى دا، سۋرەتشىسى دە، بالەتمەيستەرى دە قىرعىزدان بولدى. رەجيسسەر قۋاندىق قاسىموۆ. قۇربانجان داتقا دەگەن - تاريحتا بولعان، قىرعىزدىڭ قىرعىز بولىپ قالۋىنا ۇلكەن ۇلەس قوسقان ايەل ەكەن. بەس ۇلىنىڭ تورتەۋى جاۋ قولىنان ولەدى. سۇتكەنجەسىنىڭ تاعدىرى قىل ۇستىندە تۇرعاندا، ەل ءۇشىن ءوز ۇلىن دارعا بايلاپ بەرگەن ەكەن. سونداي ايەلدىڭ وبرازىن سومدادىم. سپەكتاكل جامان شىقپاعان سياقتى. دومبىرانىڭ ىشەگىندەي تارتىلىپ تۇرادى دا، ەڭ سوڭىندا شارت ۇزىلەدى. قولىمىزعا ۇستاپ شىعاتىن رەكۆيزيت جوق، ءبارى «قيالدا» عانا.

- سوزىڭىزگە قاراعاندا، وزىڭىزگە ەرەكشە اسەر ەتكەن رول سياقتى...

- ساحناعا العاش اتتاعان كەزىمنەن بەرى ارۋلاردىڭ ءبارىن سومدادىم. بايان، قۇرتقا، اقتوقتى، اسەل، وفەليا،  مەنى اكتريسا رەتىندە تانىتقان الۋا... ارمانىم جوق اكتريسامىن دەسەم بولادى. قانشا رول ويناسام دا، سونىڭ ىشىندەگى قاداۋ-قاداۋ ءرولدىڭ ءبىرى «قارالى سۇلۋداعى» قاراگوز ەدى. سوسىن ب.ريموۆانىڭ «قوس مۇڭلىعىنداعى» (بىزدە «كوپ ىشىندە جالعىزدار») كەمپىر. وسىنشاما ۋاقىت «ۇزىلىستەن» كەيىن اتاپ ايتاتىن ءرولىم - وسى.

- قۇربانجان داتقانىڭ تاعدىرى قيىن بولعانىن ايتىپ وتىرسىز، سپەكتاكلدەن كەيىن، نەمەسە دايىندىق كەزىندە ءرولدىڭ پسيحولوگيالىق  اۋىرتپاشىلىعىن سەزىنبەدىڭىز بە؟

- سپەكتاكلگە كىرىسپەس بۇرىن قاتتى جۇرەكسىنىپ ءجۇردىم. ءوز تاعدىرىما اسەر ەتپەسىن دەپ قورىقتىم. بىراق قالاي بولعاندا د،ا ونى دايىنداپ شىعۋ اكتريسا رەتىندەگى پارىزىم ەدى. مەن ءۇشىن ءار سپەكتاكل ەمتيحان سياقتى. اللا بىزگە ساحنادان ءسوز ايتاتىن قۇقىق بەردى. قۇدىرەت قوي بۇل. وسى رول ارقىلى تەاتردا بەكەر جۇرمەگەنىمدى تاعى دا دالەلدەۋ كەرەك بولدى. رول تاعدىرعا اسەر ەتىپ جاتىر ما، ەتپەي جاتىر ما، بىلمەيمىن، ءبىر عانا وقيعانى ايتايىن. كەزىندە «زاماناقىر» دەگەن سپەكتاكل بولدى. سەمەي پوليگونى جايىندا، و.سۇلەيمەنوۆ پەن ب.مۇقاي بىرىگىپ جازعان. ر.سەيتمەتوۆ اعامىز قويعان. مەنىڭ كەيىپكەرىم ساليحا دەگەن ايەل، ءبىر ۇل، ءبىر قىزى بار، سارىجال دەگەن جەردە تۇرادى. «كوشىڭدەر»، - دەگەندە، «سوعىستان كۇيەۋىمدى كۇتىپ وتىرمىن، كەلىپ قالسا، تاپپاي قالادى»، - دەپ وتىرىپ الادى. جارىلىس بولعان كەزدە ساڭىراۋقۇلاققا قاراعان بالاسىنىڭ كوزى كورمەي قالادى. بۇل قىرعا شىعىپ كۇندە كۇيەۋىن كۇتەدى. ءومىر ءوتىپ جاتادى. قويشى، ايتەۋىر، قىزى التى بالا تۋادى، التاۋىن دا جەرگە بەرەدى. جەتىنشى بالاسى تومار بولىپ تۋادى. كۇيەۋ بالا اسىلىپ ولەدى. سوندا سونشا تاۋقىمەتتەن كەيىن كەمپىردىڭ شاشى اپپاق قۋداي بولىپ، تاس مۇسىنگە اينالادى. سول رولدە، وتىز كۇن رەپەتيتسيادا، شاشىم اعارىپ كەتتى. ول مەنىڭ 40-قا دا كەلمەگەن كەزىم بولاتىن. كەزىندە: «ءسابيرا اپام ساحناعا دارەت الىپ شىعادى ەكەن»، - دەگەندە تاڭعالاتىنبىز. ساحنادا ويناۋ باقىتى الىستاپ بارا جاتقاندا ونىڭ قادىرىن تۇسىنە باستايسىڭ. جاستاردى سىنايدى كەيدە، ولار اعا-اپالارىنىڭ ءرولىن كورمەسە، شەبەرلىكتى قايدان الادى؟ ستۋديادا وقىعاندا قازاق ونەرىنىڭ كوريفەيلەرىمەن قاتار جۇردىك. سوندا بيكەن، شولپان، زامزاگۇل اپايلاردىڭ جۇلدىزدى شاعى، تورعىنداردىڭ سىڭعىرلاپ تۇرعان جاس كەزى. ءسابيرا، حاديشا اپايلار ءتىپتى ءبىر تاۋ سياقتى. ولارعا سويلەۋ تۇگىلى، كوزىنە تىكتەپ قاراۋعا دا باتىلىمىز بارمايتىن. ول كىسىلەردىڭ كوزىنەن تامعان ءاربىر تامشى جاسىنا دەيىن ساحنانىڭ ارتىندا تىعىلىپ وتىرىپ كوردىك. بىزدەن كەيىنگى بالالار دا ونەردىڭ قادىرىن بىلسە ەكەن دەيمىز. تەاتر دەگەن - سەن بەرىپ، ول بەرىپ، جان الىسىپ، جان بەرىسۋ، كورەرمەنمەن ءتىرى تىنىس الماسۋ.

- «مەنىڭ رەجيسسەرىم» دەيتىن رەجيسسەرىڭىز كىم؟

- رايىمبەك اعا سەيتمەتوۆ مەنى اكتريسا رەتىندە قالىپتاستىردى. قازاق تەاترىنا پوەتيكالىق سپەكتاكل اكەلگەن، اقىنجاندى، قازاق ءسوزىنىڭ مايەگىن بىلەتىن، پەداگوگ رەجيسسەر بولاتىن. ودان كەيىن شىعارماشىلىق قۋانىش سىيلاعان رەجيسسەر - بولات اتاباەۆ. بولات رولگە باسقا قىرىنان كەلۋدى، وبرازدى زاماناۋي بەرۋدى تۇسىندىرگەن رەجيسسەر. ودان كەيىنگى ءبىر اسۋ -  قۋاندىق قاسىموۆ. سونداي ءبىر سابىرلى، سالماقتى، تەرەڭ، ەسكەرتپەنى كوپ ايتپايدى. اسىقپاي، ۇندەمەي وتىرىپ، سەنىڭ قۇلاق كۇيىڭدى كەلتىرەدى. ەكران ونەرىنە كەلسەك، ەڭ العاش قانىمبەك قاسىمبەكوۆتىڭ «قوشتاسقىم كەلمەيدى» دەگەن كينوسىنا ءتۇستىم. ال ودان كەيىن مەنى ۇلكەن كينوعا اكەلگەن تالعات تەمەنوۆ. «ادامدار اراسىنداعى بولتىرىكتە» 20 كۇن اقسۋ-جاباعىلى قورىعىندا تۇسىرىلىمدە بولدىق. سوندا بيكەن اپام اڭگىمەسىن، اقىل-كەڭەسىن ايتادى. «كەش بولماي تۇرعاندا كۇندەلىك جاز»، - دەگەن. سودان بارا سالىپ، قالىڭ داپتەر ساتىپ العانمىن. تۇك تە جازعان جوقپىن عوي...

- جاستار تەاترىندا «ءىشىڭىز پىسىڭقىراپ» جۇرسە دە، رەجيسسەرلەرگە رەنىشىم جوق دەيسىز. اۋەزوۆ تەاترىنا نەگە اۋىسىپ كەتپەدىم دەپ وكىنبەيسىز بە؟

- اكادەميالىق تەاتردىڭ جانىنداعى ستۋديانى ءبىتىردىم دەپ ايتتىم عوي. ءبىر كەزدە جوعارى ءبىلىمى جوقتارعا تومەن جالاقى تولەيتىن زاڭ شىققان. ت.تەمەنوۆ ونەر اكادەمياسىندا رەكتور بولىپ تۇرعاندا، سىرتتاي ءبولىم اشتى. بۇل ونىڭ ازاماتتىعى. ءسويتىپ، ءبارىمىز وقىپ، ديپلوم الدىق. وبلىستىڭ بارلىق اكتەرلەرى راحمەت ايتاتىن شىعار، مەن دە تالعاتقا كوپ العىسىمدى ايتامىن. سول ستۋديانى بىتىرگەننەن كەيىن، جولداسىمىز ەكەۋمىزدى اكادەميالىق تەاترعا الىپ قالعان. اياعىم اۋىرلاپ، بىردەن دەمالىسقا كەتتىم، جولداسىم التى ايداي جۇمىس ىستەدى. ءسويتتى دە، پاتەر جوق، قينالعان سوڭ شىمكەنتكە تارتىپ كەتتىك. ول قۇجاتتاردى الىپ، شىمكەنت تەاترىنا تاپسىرىپ قويىپتى. بىراق ەكەۋمىزدىڭ دە ارمانىمىز الماتى بولاتىن. جولداسىممەن سەگىز-اق جىل وتاستىق، ول ەرتەرەك قايتىس بولىپ كەتتى. سودان كەيىن مەن ەكەۋمىزدىڭ ارمانىمىزدى ورىنداۋ ءۇشىن، جالعىز بولسام دا، ەكى كىشكەنتايىمدى ەرتىپ، الماتىعا كەلدىم. اكادەميالىق تەاتردىڭ (قازىرگى جاستار تەاترىنىڭ عيماراتىندا ەدى) ارتىنداعى فونتاندى ءۇش كۇن اينالىپ ءجۇرىپ، ەسىگىنەن اتتاپ كىرە المادىم. بۇل تەاتردا وڭشەڭ سۇمدىقتار ىستەيدى، مەن ءوزىم ولارعا لايىق ەمەس سياقتى، تابالدىرىقتان اتتاۋعا دا باتىلىم جەتپەيدى... كۇندە جاياۋ ابايعا دەيىن بارامىن. جەڭگەم سۇرايدى: «قالاي، باستىققا جولىقتىڭ با؟»، - دەيدى. «باستىق جوق ەكەن»، - دەپ وتىرىك ايتامىن. ءسويتىپ، ابىلايحاننىڭ بويىمەن، ورلەپ بارا جاتسام، تۋرا قابانبايدىڭ قيىلىسىندا جاستار تەاترى بولاتىن. سول جەردە بۇكىل اكتەرلەر ەسىكتىڭ الدىندا تۇر ەكەن. ولارعا دا بارىپ امانداسۋعا باتىلىم جەتپەس ەدى. ارالارىندا مامان بايسەركەنوۆ بار ەكەن. از بۇرىن عانا ول كىسى شىمكەنتتە سپەكتاكل قويىپ، مەن باس كەيىپكەرىن ويناعانمىن. امانداسۋ پارىز بولعان سوڭ، جاقىندادىم. «اۋ، گۇلجامال، نەعىپ ءجۇرسىڭ؟». «دەمالىسقا شىعىپ ەدىم، ەلگە كەتىپ بارا جاتىرمىن»، - دەپ قويامىن. ءوزىم اكادەمگە كىرەمىن دەپ ويلاپ ءجۇرمىن عوي. «مامان اعا مەنىڭ قانداي اكتريسا ەكەنىمدى بىلەدى عوي، تيۋز-عا بارىپ كورەيىنشى»، - دەپ ءبىر ويلادىم. ديرەكتورعا كىرسەم، ساكەن ءجۇنىسوۆ وتىر. ال مامان اعا قويعان «قاپاستاعىلار» ساكەن اعانىڭ دۇنيەسى بولاتىن. اللانىڭ ءوزى قيىستىرادى ەكەن عوي. ايتپەسە، ساكەن اعا الدىمنان شىعادى دەپ كىم ويلاعان؟ ديرەكتور ساقتاعان تۇرلىمۇراتوۆ دەگەن كىسى، جۇمىسقا كەلگەنىمدى ايتسام، «وبلىستىق تەاترلاردان اكتەر الامىن دەپ ونسىز دا مينيستردەن تاياق جەدىم»، - دەيدى. الدىندا ءبىراز وبلىستاردان اكتەرلەر اۋىسقان، ءسويتىپ، ولاردىڭ سپەكتالكدەرى توقتاپ قالعان، «وبلىستىق تەاترلاردان اكتەر الماڭدار» دەگەن نۇسقاۋ تۇسكەن. مەن ايتتىم، «اعا، مەن وتباسى جاعدايىمەن اۋىستىم» دەدىم. سوندا سوزگە ساكەن اعا ارالاستى: «ءاي، ساقتاعان، سەن مىنا اكتريسانى ال. سەنىڭ تەاترىڭدا عازيزا بار، ليديا بار، بىراق گۇلجامال ولارعا ۇقسامايدى. مۇنداي اكتريسا سەندە جوق» دەدى. ءسويتىپ، قۇجاتىمدى اكەلىپ تيۋز-عا ورنالاستىم. اللاعا مىڭ شۇكىر دەيمىن.

- كەڭەستىك قازاق تەاترىندا قازىرگى تەاتردا جوق قانداي يگى ءداستۇردى ايتا الاسىز؟

- ءبىر سپەكتاكل بىرنەشە تەاتردا قاتار جۇرەدى. سوندا اكتەرلەر ءبىر-بىرىنە بارىپ، باسقا قۇراممەن، باسقا قويىلىمداعى سپەكتاكلدى وينايتىن. جاقسى تاجىريبە الماسۋ بولاتىن. قازىر دە سول ءۇردىستى جانداندىرسا جامان بولماس ەدى. مىسالى، شولپان اپاي «قوبىلاندىداعى» - قۇرتقانى، س.ءجۇنىسوۆتىڭ «اجار مەن اجالىندا» - اجاردى، «قوزى كورپەش-بايان سۇلۋدا» باياندى وينايدى. وسى ءۇش سپەكتاكلدى ويناۋ ءۇشىن شىمكەنتكە كەلگەنى بار. شولپان جانداربەكوۆا كەلدى دەپ بۇكىل وڭتۇستىك قىرىلىپ قالا جازدادىق. بىزدە «قوبىلاندى» جاڭا عانا قويىلىپ، ساحناعا ەندى شىعايىن دەپ جاتقان. باس رەپەتيتسيامىزدى كوردى دە: «اينالايىن، گۇلجامال وينايىن دەپ جاتىر ەكەن. جولىن كەسپەي-اق قويايىن، ادەمى قۇرتقا شىعايىن دەپ تۇر، مەن وينامايمىن. مىنا كوستيۋمىمدى گۇلجامالعا سىيلادىم»، - دەپ، قۇرتقانىڭ كوستيۋمىن سىيلاپ كەتتى. باسقا ءبىر تايازداۋ اكتريسا بولسا، «مەن كەرەمەتتى كورسەتەيىن سەندەرگە. مىناۋلارىڭ نەمەنە!»، - دەمەيتىن بە ەدى؟ ايتپەسە ءبىز قايبىر قاتىرىپ جاتىر دەيسىڭ، ءارى كەتسە جاستىعىمىزبەن العان شىعارمىز. وسى ءبىر پاراساتتىلىعى ءۇشىن شولپان اپاما ءومىر باقي قارىزدارمىن.

- قازىر تەاتردا ءسوز ارزانداپ، ۇساقتالىپ بارا جاتقانداي كورىنبەي مە سىزگە؟

- زاماناۋي دراماتۋرگيادا، قازىرگى ءسوز ساپتاۋدا ءبارى دە كەشىرىمدى شىعار. بىراق كلاسسيكا، عابەڭنىڭ، مۇحاڭنىڭ كۇمىستەي سىڭعىرلاعان سوزدەرى قاتە ايتىلىپ جاتسا، ناعىز ماسقارا سول. ال مۇنداي ولقىلىق كۇندە بولىپ جاتادى قازىر. «قۇداي-اۋ، وبرازىن قويا تۇرىپ، قۇرىعاندا ءسوزىن دۇرىس ايتىپ شىقسا عوي»، - دەپ ويلايسىڭ.

- ساحنالاستارىڭىزدىڭ سىزگە «وڭ جامباسقا كەلەتىنى» قايسىسى؟

- كۇلاش قاجىعاليەۆا ەكەۋمىز «كوپ ىشىندە جالعىزداردا» ەكى جالعىز كەمپىردى وينادىق. سپەكتاكلدىڭ ساحنالىق شەشىمى دە سونداي، ەسىك، ەسىك، ەسىك، ەسىك... بىراق ەشكىم ەشكىمنىڭ ەسىگىن قاقپايدى. كوڭىلىنىڭ ەسىگىن دە قاقپايدى. ەشكىم جانىڭدى تۇسىنبەيدى، تۇسىنگىسى كەلمەيدى. سوندا ارامىزدا عاجاپ ءبىر تۇسىنىستىك ورنادى. ناعىز جانىڭدى قوزعايتىن پارتنەر. سول ءۇشىن كۇلاش اپايدى سىيلايمىن. ليديا كادەن دە وتە جايلى سەرىكتەس. دوسحان جولجاقسىنوۆ ساحنادا الدامايدى. قادىرعازى قۋاندىقوۆ تا سونداي.

- كوپ سويلەمەيتىن، بىرتوعا ادام سياقتى كورىنەسىز...

- جان سىرىمدى كوپكە شاشىپ، لاقىلداپ سويلەپ، قارقىلداپ كۇلۋ تابيعاتىمدا جوق. شەشەم سونداي ەدى، ەش ۋاقىتتا داۋسىن كوتەرمەگەن، اۋزىن اشىپ كۇلمەگەن ادام بولاتىن. وقىماعان-اق ادام، بىراق ىشكى مادەنيەتى عاجاپ ەدى. مەنىڭ كلاستاستارىم، اۋىلداستارىم «گۇلجامال ءارتىس بولىپتى» دەگەندە تاڭعالعان عوي. قازىر دە اندا-ساندا ءبىر بويانامىن، ارىپتەستەرىم: «ءتۇ-ۋ، گۇلجامال اپاي، نەگە بويانىپ جۇرمەيسىز؟»، - دەپ سۇرايدى. «مەن ادەمىلىگىمدى ساحناعا ساقتايمىن»، - دەپ كۇلىپ قويامىن. كۇلكىمدى دە، كوز جاسىمدى دا ساحناعا ساقتايمىن. جان-دۇنيەڭدەگى توڭكەرىستەر، ارپالىستار قۇپيا بولىپ ىشىڭدە تۇنىپ جاتپاسا، ساحناعا نەڭدى الىپ شىعاسىڭ؟ «نەگە ءسىز تۋرالى وسەك جوق؟»، - دەيدى. مەن دە پەندەمىن. بىراق الا ءجىپ دەگەن ۇعىم بار. بىرەۋدىڭ الا ءجىبىن اتتاماساڭ، اللا ءوزى ءبارىن دە رەتتەيدى. 25 جاسىمدا كۇيەۋدەن قالدىم. ۇلىم مەن قىزىمدى ەشكىمگە جالتاقتاتپايىن دەپ، بەلىمدى بەكەم بۋدىم. قازىر التى نەمەرەم بار، قىزىم شەت ەلدە تۇرادى، ۇلىم مەن كەلىنىممەن بىرگە تۇرامىن. ونەر ادامى بولار-بولماس، بىراق نەمەرەلەرىم تەاتردى جاقسى كورەدى، تيتتەيىنەن تەاتر اۋرۋىمەن اۋىرعان. قۇدايعا شۇكىر.

- «تەاترىمىز ءوسىپ كەلەدى» دەپ ءجيى ايتاسىز. جاس اكتەرلەردەن كىمدەردى اتاپ وتەر ەدىڭىز؟

- قاي كەزدە دە جاقسى سپەكتاكلگە حالىق كەلەدى. «ەڭ ادەمى كەلىنشەك» 20 جىلداي بولدى ما، ءالى كۇنگە دەيىن حالىق كەلەدى. ليدياعا ارنالىپ جازىلدى، ليدياعا ارنالىپ قويىلدى، ءبىز جانىنداعى قۇربىلارىن وينادىق قوي. كورەرمەن زالىندا قىزدار تالىپ، جەدەل جاردەممەن الىپ كەتەتىن ەدى عوي. نەمەسە «بەسەۋدىڭ حاتى» دەگەن سپەكتاكلدە تەرەزەنى شاعىپ كىرگەندەر بولدى. قازىرگى جاستارعا كەلسەك، ءبارىنىڭ بولاشاعى الدا عوي. قاي-قايسىسىنىڭ دا جۇلدىزى جانسىن. تەاتردىڭ قازىعى بولىپ قالاتىن ادامدار ءوسىپ-ونسە ەكەن دەيمىز. وبرازعا اقىلمەن كەلەتىن اكتەر دەپ راحمان وماردى ايتامىن. جانار ماقاشەۆاعا اللا ءبارىن بەرگەن. ينتۋيتسيامەن وينايدى، بىراق ءدوپ تۇسەدى. ول دا جانىن ايامايدى. ساحناعا سونداي تازا، جانى تازا ادام كەرەك. ساحنا دەگەن اينا عوي، سەنىڭ بيىكتىگىڭ، تارلىعىڭ، كەڭدىگىڭ - ءبارى كورىنىپ تۇرادى. باسقا دا تالانتتى جاستار بار، بىراق وسى ەكەۋى دە جەتىپ قالار.

- اڭگىمەڭىزگە راحمەت.

سۇحباتتاسقان - ءاسيا باعداۋلەتقىزى

«حالىق ءسوزى» گازەتى