ۆلاديمير كيمنىڭ قىزى كاميللا كيمگە قۇنى ميلليونداعان دوللار تۇراتىن بىرنەشە ءۇي تيەسىلى. بۇل تۋرالى «ۆىحودۋ ك موريۋ» كانالى ارنايى زەرتتەۋىن جاريالادى.  بارلىق تۇرعىن ۇيلەر الەمنىڭ ەڭ قىمبات ءارى كورىكتى ورىندارىنىڭ ءبىرى سانالاتىن ۇلىبريتانيا استاناسى لوندوننىڭ قاق ورتاسىنداعى «گايد پاركتە» ورنالاسقان. ەكى پاتەر ءبىر عيماراتتا، ءۇشىنشى پاتەر الەمدەگى ەڭ قىمبات سانالاتىن كوپپاتەرلى تۇرعىن ءۇي كەشەنىندە.

ۆلاديمير كيم قازاقستانداعى ەڭ اۋقاتتى جان. 2020 جىلعى Forbes-تىڭ رەيتينگى بويىنشا اۋقاتتىلار اراسىندا كوش باستاپ تۇر. كيم ءوزىنىڭ بايلىعىن مينەرالدى رەسۋرستاردى ساۋدالاۋ ارقىلى تاپقان. قازىرگى تاڭدا كاسىپكەر  «KAZ Minerals PLC-تىڭ» ۇشتەن ءبىر بولىگىنە، «قازاقمىستىڭ» ۇشتەن ەكى بولىگىنە يەلىك ەتەدى. «Bank RBK-دا» دا ءوز ۇلەسى بار.

Forbes-تىڭ مالىمەتى بويىنشا ۆلاديمير كيمنىڭ 2020 جىلدىڭ جەلتوقسان ايىنداعى بايلىعى $4,1 ملرد كولەمىندە بولعان. ول قازاقستانداعى بايلار بويىنشا ءنومىر ءبىرىنشى ورىندى يەمدەنسە، ىقپالدى ازاماتتار قاتارىندا ەكىنشى مەجەدە تۇر.

ۆلاديمير كيمنىڭ نەگىزگى اكتيۆى بولىپ تابىلاتىن «قازاقمىس» 1992 جىلى كەڭەستىك «جەزقازعانتسۆەتمەت» ورنىنا قۇرىلدى. باستاپقىدا مەكەمەنىڭ  80%-ى مەملەكەت پەن مەكەمە ۇجىمىنا تيەسىلى بولاتىن. كەيىننەن توقىراۋ جىلدارى «Samsung-تىڭ» يەلىگىنە ءوتىپ، ارتىنشا قازىرگى اكتسيونەرلەر قولىنا كوشتى.

«قازاقمىستى» قازاقستاننىڭ ءبىرىنشى پرەزيدەنتى نۇرسۇلتان نازارباەۆپەن بايلانىستىراتىندار كوپ. ادام قۇقىقتارىن قورعاۋ، تابيعي رەسۋرستاردى زاڭسىز ساتۋمەن كۇرەسۋدىڭ ماقسات ەتەتىن «Global Witness» حالىقارالىق ۇكىمەتتىك ەمەس ۇيىمى ءوز بايانداماسىندا «قازاقمىستا» ءبىرىنشى پرەزيدەنتتىڭ ىقپالى باسىم ەكەنى جايلى ايتادى. دالەل رەتىندە ۆلاديمير كيمنىڭ ۇزاق ۋاقىت بويى پرەزيدەنت اكىمشىلىگىندە قىزمەت ەتكەنىن كەلتىرەدى.

نۇرسۇلتان نازارباەۆتىڭ اعاسى بولات نازارباەۆ «قازاقمىستىڭ» ديرەكتورلار كەڭەسىنىڭ مۇشەسى بولعان، ال ۆلاديمير كيمنىڭ ءوزى  «Nur Otan» پارتياسىنىڭ ساياسي كەڭەس قۇرامىندا قىزمەت ەتكەن. سونداي-اق ول 2005 جىلعى پرەزيدەنتتىك سايلاۋدا نازارباەۆتىڭ قاراعاندى وبلىسى بويىنشا سايلاۋالدى شتابىن باسقارعان.

لوندوننىڭ قاق ورتاسىنداعى قىمبات پاتەرلەر

2017 جىلى كاميللا كيم 18 جاسقا تولدى. ءدال سول كۇنى ول لوندوننىڭ  نايتسبريدج اۋدانىنداعى The Knightsbridge Apartments رەزيدەنتسياسىنىڭ 5-ءشى قاباتىنان ەكى پاتەردى سىيلىققا الدى. ءبىرىنشى پاتەردىڭ قۇنى 6 ملن فۋنت ستەرلينگ بولسا، ەكىنشى پاتەر 8 ملن فۋنت ستەرلينگكە ساتىپ الىنعان.  جيىنتىعى 14 ملن فۋنت ستەرلينگ. قازىرگى تاڭدا 1 فۋنت ستەرلينگتىڭ قۇنى 580 تەڭگە.

(The Knightsbridge Apartments رەزيدەنتسياسىنداعى پاتەردىڭ قوناق بولمەسى)

كاميللا كيمنىڭ پاتەرىنىڭ ىشكى كورىنىسىن كورۋ مۇمكىن ەمەس. الايدا 7,2 ميلليون فۋنت ستەرلينگكە - كاميللا كيمنىڭ ءبىرىنشى پاتەرىنەن قىمبات، ال ەكىنشىسىنەن ارزانىراق - ءۇش بولمەلى (ارقايسىسى جەكە ۆاننا بولمەسىمەن جانە دارەتحاناسىمەن جابدىقتالعان), ۇلكەن قوناق بولمەسى مەن اس ءۇيى بار رەزيدەنتسيا ساتىلۋدا. بۇل پاتەردىڭ جالپى اۋدانى شامامەن 160 شارشى مەتردى قۇرايدى. ياعني كاميلا كيمنىڭ ەكى پاتەرىنىڭ كولەمىن قوسا العاندا كەمى 300 شارشى مەتر بولادى دەگەن ءسوز.

الەمدەگى ەڭ قىمبات ۇيدەگى پاتەر

(One Hyde Park رەزيدەنتسياسى)

نايتسبريدج  اۋدانى لوندوننىڭ قاق ورتاسىندا، بۋكينگەم سارايىنا جاقىن ماڭدا ورنالاسقان. 2011 جىلى گايد پاركتىڭ جانىندا شارشى مەترىنە شاققاندا الەمدەگى ەڭ قىمبات ءۇي سانالاتىن One Hyde Park رەزيدەنتسياسى سالىندى. ونداعى كەي پاتەردىڭ قۇنى جۇزدەگەن ميلليون فۋنتقا دەيىن شارىقتاپ كەتكەن.

Business Insider باسىلىمىنا ءانونيمدى اۆتور بۇل رەزيدەنتسياعا كەلەتىندەردى قۇددى ءبىر ۇيگە ەمەس، اسكەري بازاعا كەلگەندەي سكانەرلەپ، تەكسەرەتىنى جايلى ايتقان.

كاميللا كيم 2017 جىلدىڭ ماۋسىمىندا اتالمىش رەزيدەنتسياداعى پاتەردىڭ يەسى اتانادى. پاتەرگە كولىك تۇراعىنان ورىن جانە شاراپ ساقتايتىن جەرتولە بىرگە بەرىلەدى. پاتەر ۆ كورپۋسىنىڭ ءۇشىنشى قاباتىندا ورنالاسقان.

بۇل پاتەردىڭ قۇنى 27,5 ملن فۋنت ستەرلينگتى قۇرايدى. بۇل ۇيدەگى ءبىر بولمەلى پاتەرلەردىڭ كولەمى 100 شارشى مەترگە دەيىن جەتەدى. ال ءۇش-ءتورت جاتىن بولمەسى بار پاتەرلەردىڭ قۇنى 16-28 ملن فۋنت ستەرلينگتەن ساتىلۋدا.

مىسالى مىناۋ D كورپۋسىنداعى پاتەردىڭ جوسپارى: ءتورت جاتىن بولمە (ارقايسىسىندا ۆاننا مەن دارەتحانا بار), اس ءۇي، تۇستەنۋ بولمەسى، 60 شارشى مەتر بولاتىن قوناق بولمەسى مەن تەرراسا. پاتەردىڭ جالپى كولەمى شامامەن 365 شارشى مەتردى قۇرايدى. پاتەر يەلەرىنە 21 مەترلىك باسسەين، جەكە سپا ورتالىق، ساۋنا، كينوتەاترمەن قوسا، جانىنداعى Mandarin Oriental وتەلىنىڭ   قىزمەتكەرلەرى تاراپىنان تاۋلىك بويى ۇزدىكسىز قىزمەت كورسەتۋ دە كىرەدى.

وسىلايشا ءۇش پاتەردىڭ قۇنى 41,5 ملن فۋنت ستەرلينگتى قۇرايدى، دوللارعا شاقساق بۇل 58 ملن دوللار بولماق. بۇل تەڭگەگە شاققاندا 24 ملرد 379 ملن تەڭگەنى قۇرايدى.

كا مىرزا

Abai.kz