بيىل جەر كودەكسىنىڭ كەيبىر باپتارىنا قاتىستى جاريالانعان موراتوري مەرزىمى اياقتالاتىنى بەلگىلى. Abai.kz اقپاراتتىق پورتالى جىل باسىنان بەرى اتالعان ماسەلەنى كۇن تارتىبىنەن تۇسىرگەن جوق. 

سولاردىڭ ءبىرسىپىراسى مىنەكەي:

موراتوري بىتكەن سوڭ جەر تاعدىرى نە بولماق؟

جەر دە - قازاقتىكى، ەل دە - قازاقتىكى!

«جەر داۋىنىڭ نۇكتەسى قويىلماي ما دەپ قورقامىن»

جەر كودەكسىنە تۇزەتۋلەر ەنگىزىلەدى

جەر كودەكسىنە قاتىستى موراتوري كۇشىن جويادى. ءارى قاراي نە بولماق؟

«قازىرگى قازاق ماسەلەسىنىڭ ەڭ زورى – جەر ماسەلەسى»

جەردەن ايىرىلساق، مەملەكەتتەن دە ايىرىلامىز!

«Abai.kz» جەر تاقىرىبىنا قايتىپ ورالدى

ال اقپاننىڭ باس كەزىندە قر اۋىلشارۋاشىلىعى ءمينيسترى ساپارحان وماروۆ پرەزيدەنت تاپسىرماسىنا سايكەس، جەر كوميسسياسىن قۇرۋ جۇمىستارى باستالىپ كەتكەنىن مالىمدەدى.

«مەملەكەت باسشىسى جەر كوميسسياسىن قايتا قۇرىپ، قاراشاعا دەيىن جەر كودەكسىنە تۇزەتۋلەر قابىلداۋدى تاپسىردى. جەر ماسەلەلەرى جونىندەگى ارناۋلى كوميسسيا قۇرۋ جۇمىسى باستالىپ كەتتى. وعان بارلىق مۇددەلى تاراپتار، قر پارلامەنتى دەپۋتاتتارى، اگروبيزنەس، فەرمەرلەر وداعى مەن قاۋىمداستىقتارىنىڭ، «اتامەكەن» ۇكپ، وبلىس اكىمدىكتەرىنىڭ وكىلدەرى جانە باسقالارى كىرەدى. اتالعان زاڭ جوباسىن ازىرلەۋ ۇكىمەتتىڭ 2021 جىلعا ارنالعان جوسپارىندا كوزدەلدى»، – دەدى ساپارحان وماروۆ.

2020 جىلدىڭ 1 قىركۇيەگىندە حالىققا ارناعان جولداۋىندا پرەزيدەنت توقاەۆ وسى ماسەلەنى قايتا كوتەرىپ، ناقتى شەشىم قابىلداۋ كەرەكتىگىنە توقتالدى.

جەر ماسەلەسى وتكەن ايدا وتكەن ۇكىمەتتىڭ كەڭەيتىلگەن وتىرىسىندا دا نازاردان تىس قالمادى. موراتوري مەرزىمى بىتۋگە از قالعانىن تاعى ءبىر مارتە ەسكەرتكەن پرەزيدەنت، ۇكىمەتكە بيىلعى قاراشا ايىنا دەيىن جەر كودەكسىنە تۇزەتۋلەر ەنگىزۋدى تاپسىرىپ: «جەر جونىندەگى كوميسسيانىڭ جۇمىسىن قايتا جانداندىرۋ قاجەت»، - دەدى.

ال توقاەۆ قاتىسقان ۇكىمەت وتىرىسىنان ەكى كۇن بۇرىن «اق جول» پارتياسىنىڭ دەپۋتاتتارى پرەمەر-مينيستر اسقار مامينگە دەپۋتاتتىق ساۋال جولداپ، جەر كودەكسىنە قاتىستى ءوز ۇسىنىستارىن جاريالاپتى. ءماجىلىس دەپۋتاتى بەرىك دۇيسەمبينوۆ وقىعان ول دەپۋتاتتىق ساۋال دا Abai.kz اقپاراتتىق پورتالىندا جاريالاندى. ارادا ءۇش اپتاعا جۋىق ۋاقىت ءوتتى. ۇكىمەتتەن دە، ۇكىمەت باسشىسىنان دا حات-حابار بولماعان كورىنەدى.

«اق جول» پارتياسى ەلدى الاڭداتقان جەر داۋىنىڭ شەشىلۋىنە نۇكتە قويىلۋ كەرەك دەگەن تالاپ پەن زاڭعا ەنگىزىلۋى كەرەك دەگەن 5 ۇسىنىسىن ءبىزدىڭ ەلەكتروندى پوشتامىزعا جولداعان ەكەن.  سونىمەن، «اق جول» پارتياسى ۇسىنعان 5 وزگەرتۋدە نە جازىلعان؟ قاراڭىز:

- جەر ۋچاسكەلەرى شەتەلدىكتەرگە، ازاماتتىعى جوق ادامدارعا، شەتەلدىكتەرمەن نەمەسە ازاماتتىعى جوق ادامدارمەن نەكەدە تۇرعان (ەرلى-زايىپتى) قازاقستان رەسپۋبليكاسىنىڭ ازاماتتارىنا، سونداي-اق شەتەلدىك زاڭدى تۇلعالارعا جانە شەتەلدىك قاتىسۋى بار قازاقستان رەسپۋبليكاسىنىڭ زاڭدى تۇلعالارىنا مەنشىك قۇقىعىمەن تيەسىلى بولا المايدى.

- قازاقستان رەسپۋبليكاسىنىڭ ازاماتتارى شەتەلدىكتەرمەن نەمەسە ازاماتتىعى جوق ادامدارمەن نەكە قيعان (ەرلى-زايىپتى بولعان) كەزدە، جەر ۋچاسكەلەرىنە مەنشىك قۇقىعى وسى كودەكستىڭ 66-بابىنىڭ نورمالارىنا سايكەس قايتا رەسىمدەلۋگە نەمەسە يەلىكتەن شىعارىلۋعا جاتادى.

- قازاقستان رەسپۋبليكاسى زاڭدى تۇلعاسىنىڭ قاتىسۋشىلارى (اكتسيونەرلەرى) قۇرامىنا شەتەلدىك نەمەسە ازاماتتىعى جوق ادام، شەتەلدىك زاڭدى تۇلعا، قازاقستان رەسپۋبليكاسىنىڭ شەتەلدىك قاتىساتىن زاڭدى تۇلعاسى كىرگەن كەزدە، جەر ۋچاسكەلەرىنە مەنشىك قۇقىعى وسى كودەكستىڭ 66-بابىنىڭ نورمالارىنا سايكەس قايتا رەسىمدەۋگە نەمەسە يەلىكتەن شىعارۋعا جاتادى.

- مەملەكەتتىك مەنشiكتەگi اۋىل شارۋاشىلىعى ماقساتىنداعى جەر ۋچاسكەلەرى وسى كودەكستىڭ 23-بابىنا سايكەس، قازاقستان رەسپۋبليكاسىنىڭ ازاماتتارىنا جانە قازاقستان رەسپۋبليكاسىنىڭ زاڭدى تۇلعالارىنا جەر پايدالانۋ قۇقىعىمەن بەرىلە الادى.

- ۇلتتىق قاۋىپسىزدىكتى، اۋماقتىق تۇتاستىقتى قامتاماسىز ەتۋ، سەپاراتيستىك ۇردىستەردى بولدىرماۋ ماقساتىندا، قازاقستان رەسپۋبليكاسىمەن تىكەلەي قۇرلىقتىق جانە تەڭىز شەكاراسى بار مەملەكەتتەردىڭ شەتەلدىك ازاماتتارى مەن زاڭدى تۇلعالارى ءۇشىن، سونداي-اق جارعىلىق كاپيتالىندا ءتيىستى مەملەكەتتەردىڭ جەكە جانە زاڭدى تۇلعالارىنىڭ قاتىسۋ ۇلەستەرى (اكتسيالار پاكەتتەرى) بار قازاقستان رەسپۋبليكاسىنىڭ زاڭدى تۇلعالارىنا قاتىستى ۋاقىتشا جەر پايدالانۋ قۇقىعىن بەرۋگە جول بەرىلمەيدى.

ءتۇيىن. 2016 جىلى ەلىمىزدە جەر ماسەلەسىنە بايلانىستى ۇلكەن تولقۋلار بولدى. كوپشىلىك جەردىڭ شەتەلدىكتەرگە ساتىلماۋىن، جالعا بەرىلمەۋىن اشىق تالاپ ەتتى. Cول جىلدىڭ 24 ساۋىرىندە اتىراۋ قالاسىندا باستالعان نارازىلىق اكتسيالارى ەلىمىزدىڭ وزگە وڭىرلەرىندە دە جالعاسىپ، مامىر ايىنىڭ باسىندا سول كەزدەگى ەل پرەزيدەنتى نۇرسۇلتان نازارباەۆ جەر كودەكسىندەگى رەزونانس تۋدىرعان زاڭ باپتارىنا موراتوري جاريالاعان ەدى.

Abai.kz