بۇگىن قازاقستاندا رەسەيدە شىعارىلعان «سپۋتنيك V» ۆاكتسيناسىن پايدالانا وتىرىپ، كۆي-عا قارسى ۆاكتسيناتسيا باستالدى.

قازاقستاندا ۆاكتسينا ەرىكتى تۇردە سالىنادى.

«حالىق دەنساۋلىعى جانە دەنساۋلىق ساقتاۋ جۇيەسى تۋرالى» قر كودەكسىنىڭ 77-بابىنا سايكەس، كەز كەلگەن مەديتسينالىق ەم-شارا، ونىڭ ىشىندە ۆاكتسيناتسيا ەگىلەتىن ادامنىڭ كەلىسىمىمەن عانا جۇرگىزىلەدى.

ودان كەيىن 15 اقپاننان باستاپ، ۆاكتسينالاۋ پروتسەسىنە قاراعاندى فارماتسەۆتيكالىق كەشەنىنىڭ بازاسىندا وندىرىلگەن گام-كوۆيد-ۆاك ۆاكتسيناسى قوسىلادى.

ال 2021 جىلدىڭ 2 توقسانىنان باستاپ ۆاكتسينالاۋ پروتسەسىنە وتاندىق – QazCovid-In پرەپاراتىن قوسۋ جوسپارلانىپ وتىر.

بۇل ۆاكتسينا قازىرگى ۋاقىتتا كلينيكالىق سىناقتىڭ 3-كەزەڭىنەن وتۋدە.

بۇعان دەيىن جاسالعان كەلىسىم نەگىزىندە قاراعاندى فارماتسەۆتيكالىق كەشەنى ەلگە «سپۋتنيك V» ۆاكتسيناسىنىڭ العاشقى پارتياسىن جەتكىزدى.

جالپى، اقپان ايىندا قاراعاندى فارماتسەۆتيكالىق كەشەنى ۆاكتسينانىڭ 112 مىڭ دوزاسىن، ناۋرىزدا - 150 مىڭ، ساۋىردەن ماۋسىمعا دەيىن – اي سايىن 600 مىڭ دوزانى جەتكىزەتىن بولادى.

سونداي-اق، ءساۋىر ايىنان باستاپ 75 مىڭ دوزا كولەمىندە QazCovid-in وتاندىق ۆاكتسيناسى سالىنادى دەپ جوسپارلانۋدا،  اي سايىن ونىڭ كولەمى 500 مىڭ دوزاعا كوبەيەدى.

ءبىرىنشى كەزەكتە حالىقتىڭ جەكەلەگەن توپتارى - مەديتسينا قىزمەتكەرلەرى، پوليتسەيلەر، اسكەري قىزمەتكەرلەر جانە ت. ب. ۆاكتسيناتسيالانادى.

ەكىنشى كەزەڭدە جالپى ءبىلىم بەرەتىن مەكتەپتەردىڭ، جوعارى وقۋ ورىندارىنىڭ پەداگوگتارى، ءبىرىنشى كەزەڭگە كىرمەگەن مەديتسينالىق قىزمەت ماماندارى ۆاكتسيناتسيالانادى.

ءۇشىنشى كەزەڭدە مەكتەپ-ينتەرناتتاردىڭ، مەكتەپكە دەيىنگى مەكەمەلەردىڭ پەداگوگتارى، ستۋدەنتتەر مەن سوزىلمالى اۋرۋلارى بار ادامدار قامتىلادى.

بۇدان باسقا، حالىقتىڭ قوسىمشا وسال توپتارى: تجم، ءىىم، قورعانىس مينيسترلىگى، ۇقك، مەملەكەتتىك كۇزەت قىزمەتىنىڭ قىزمەتكەرلەرىن جانە باسقالاردى قوسا وتىرىپ، كونتينگەنتتى كەڭەيتۋ جوسپارلانۋدا.

كوروناۆيرۋسقا قارسى ۆاكتسينانى 21 كۇندىك ارالىقپەن ەكى كەزەڭمەن ەنگىزۋ كەرەك.

رەسەيلىك سپۋتنيك V ۆاكتسيناسى بويىنشا قارسى كورسەتىلىمدەر: انامنەزدەگى اۋىر اللەرگيالىق رەاكتسيالار، جۇكتىلىك جانە بالا ەمىزۋ كەزەڭدەرى، 18 جاسقا دەيىنگى بالالار جانە 65 جاستان اسقان قارتتار.

ايتا كەتەيىك، قازاقستان رەسەيدىڭ "سپۋتنيك V" ۆاكتسيناسىن ساتىپ الۋعا 16,8 ميلليارد تەڭگە (40 ميلليون دوللارعا جۋىق) جۇمساعان.

Abai.kz