نۇر-سۇلتاندا فرانتسيامەن ءدىني بىرلەستىكتەردىڭ قۇقىقتارىن قامتاماسىز ەتۋ سالاسىنداعى تاجىريبە الماسۋ سۇراقتارى تالقىلاندى.

فرانتسيا ەلشىسى قازاقستانداعى ءدىني سەنىم بوستاندىعىن وڭ باعالادى.

بۇگىن اقپارات جانە قوعامدىق دامۋ مينيسترلىگىندە ءدىن ىستەرى كوميتەتىنىڭ توراعاسى ەرجان نۇكەجانوۆ فرانتسيانىڭ قازاقستانداعى توتەنشە جانە وكىلەتتى ەلشىسى ديدە كانەسپەن كەزدەستى.

كەزدەسۋ بارىسىندا ە.نۇكەجانوۆ قازاقستاننىڭ كونفەسسياارالىق كەلىسىمدى قامتاماسىز ەتۋدەگى تاجىريبەسىمەن ءبولىستى. سونداي-اق، ادامداردىڭ ار-وجدان بوستاندىعىنا قۇقىقتارىن قامتاماسىز ەتۋ جانە بارلىق زاڭدى ارەكەت ەتەتىن ءدىني بىرلەستىكتەرمەن سىندارلى ىنتىماقتاستىق ورناتۋ بويىنشا اتقارىلعان جۇمىسپەن تانىستىرىپ ءوتتى.

بۇدان باسقا، ءدىني سەنىم بوستاندىعى سالاسىنداعى ەكىجاقتى ىنتىماقتاستىق، سونداي-اق ءدىني بىرلەستىكتەردىڭ قۇقىقتارىن قورعاۋ جانە قامتاماسىز ەتۋ بويىنشا تاجىريبە الماسۋ ماسەلەلەرى تالقىلاندى.

د.كانەس قازاقستانداعى ءدىني سەنىم بوستاندىعىن قامتاماسىز ەتۋ سالاسىنداعى وڭ ديناميكانى جوعارى باعالادى.

كەزدەسۋ سوڭىندا تاراپتار الداعى ۋاقىتتا تىعىز جانە ءوزارا ءتيىمدى قارىم-قاتىناس ورناتۋعا نيەت ءبىلدىردى.

Abai.kz