پرەزيدەنت توقاەۆ جاريالاعان «ەستيتىن مەملەكەت» تۇعىرناماسىندا مىندەتتى تۇردە «ەل الدىنا شىعىپ، تىكەلەي ەفيردە سويلەيتىن مەملەكەت» دەگەن قۇرامداس ءبولىم بولۋى كەرەك!

ماسەلەن، پرەزيدەنتتىڭ قاتىسۋىمەن ۇكىمەت وتىرىسى ءوتتى. ىلۋدە ءبىر بولاتىن جانە دە اسا ماڭىزدى مەملەكەتتىك شارا!

كوتەرىلگەن ماسەلەلەر وزەكتى، ەلدىڭ قىزىعۋشىلىعىن تۋعىزادى. «بيلىك نە اتقاردى؟ نە اتقارماق؟ ۇكىمەت قانداي ەسەپ بەرەدى ەكەن؟ پرەزيدەنت مينيسترلەر مەن اكىمدەرىنىڭ جۇمىسىن قالاي باعالايدى؟ نەندەي تالاپتار قويدى؟ حالىقتىڭ مۇڭىن جەتكىزدى مە ەكەن؟» دەپ جۇرتشىلىق الاڭداپ وتىردى ەمەس پە؟!

سول ماڭىزدى ءىس-شارانى ۇلتتىق تەلەارنالاردان ونلاين رەجيمدە كورسەتۋگە بولاتىن ەدى عوي. جۇرت ءوز پرەزيدەنتى مەن مينيسترلەرىن «تىرىدەي» تەلەديداردان كورىپ، ولاردىڭ جاندى بولمىسى مەن كەلبەتىن، بوياماسىز ەموتسياسىن كورىپ جاتسا، نەسى ايىپ؟ بيلىكتىڭ ءيميدجىن جاقسارتۋدا بۇدان ارتىق قانداي تەحنولوگيا بار؟!

ماسەلەن، كەشە پرەزيدەنت حالىقتىڭ كوكەيىندە جۇرگەن ءبىراز جايتتى ايتتى. سونى نەگە تىكەلەي ەفيردە، قاز-قالپىندا حالىققا جەتكىزبەدى؟

پاندەميانى سىلتاۋراتىپ، پرەزيدەنت، پرەمەر، مينيسترلەر مەن اكىمدەر ونسىز دا كوپشىلىكپەن وففلاين كەزدەسۋدى قويدى. ءبارى مونيتوردىڭ ارعى جاعىنا تىعىلىپ الدى!

ەڭ بولماسا، وسىنداي مەجەلى وتىرىستاردى تىكەلەي ەفيردە كورسەتىپ، حالقىنىڭ الدىنا شىقپاي ما ەكەن؟ جىلىنا ميللياردتاعان حالىق قارجىسى جۇمسالاتىن مەملەكەتتىك باق وسىندايدا حالقىنا قىزمەت ەتپەي مە؟!

اشۋ-ىزاڭ كەلەدى وسىندايدا!

ءتۇيىن. ايتپاقشى، پرەزيدەنت، پرەمەر جىلىنا ءبىر-ەكى رەت بارلىق باق وكىلدەرىن جيناپ، تىكەلەي ەفيردە قوعامدى تولعاندىرعان وتكىر سۇراقتارعا جاۋاپ بەرىپ وتىرسا، نۇر ۇستىنە نۇر بولار ەدى!

ءامىرجان قوساننىڭ جازباسى

Abai.kz