جەر ميتينگىسى كەزىندە سوتتالعان بەلسەندى ماكس بوقاەۆ 2021 جىلدىڭ 4 اقپانىندا بوستاندىققا شىعادى. بۇل تۋرالى قىلمىستىق-اتقارۋ كولونياسىنىڭ اكىمشىلىگى مالىمدەگەن. 

بىراق وعان دەيىن ديسسيدەنتتى قاداعالاۋ ءۇشىن سوت پروتسەسى وتەدى.

- بۇگىن ولار ماعان 4 اقپان كۇنى بوساتىلاتىنىمدى ايتتى. بىراق بۇل ءالى دە ءسوز جۇزىندە. مەن مۇنى جازباشا رەسمي تۇردە حابارلاۋدى تالاپ ەتتىم. 19 قاڭتاردا سوت وتىرىسى وتەدى، وعان سايكەس، مەن بوساتىلعاننان كەيىن قاداعالاۋ تارتىبىندە بولۋىم كەرەك. ەكى جىل بۇرىن قىلمىستىق-اتقارۋ كودەكسىنە تۇزەتۋلەر ەنگىزىلدى، سوعان سايكەس ەكسترەميستىك باپتار بويىنشا سوتتالعانداردىڭ بارلىعى باقىلاۋعا الىنادى, - دەدى ماكس بوقاەۆ «ۋرالسكوي نەدەلي»-گە بەرگەن سۇحباتىندا.

سونداي-اق، ول جەلتوقساننىڭ ورتاسىندا تۇزەۋ كولونياسىنىڭ اكىمشىلىگى وعان قىسىم جاساعىسى كەلگەنىن ايتتى.

- 15 جەلتوقساندا مەن ازامات مايتانوۆپەن («اق جايىق» تاۋەلسىز باسىلىمىنىڭ باس رەداكتورى - رەد.) قىسقا كەزدەسۋ وتكىزۋگە ءتيىس ەدىم. بىراق پودپولكوۆنيك تاجەنوۆ بۇل كەزدەسۋگە سوڭعى ساتتە تىيىم سالدى. كەلەسى كۇنى، 16 جەلتوقساندا، سول تاجەنوۆ مەنى وتباسىممەن بەلگىلەنگەن 15 مينۋتتىق تەلەفون اڭگىمەسىنەن ايىردى. تاجەنوۆتىڭ ۇقك باقىلاۋشىلارى وعان مەنى تەلەفونمەن سويلەسۋدەن ايىرۋعا كەڭەس بەرگەنىن تۇسىنەمىن، ويتكەنى ولار سول كۇنى نارازىلىق ءبىلدىرۋى مۇمكىن دەپ قاۋىپتەنسە كەرەك، - دەدى ماكس بوقاەۆ

ايتا كەتەيىك، ماكس بوقاەۆ پەن ونىڭ دوسى تالعات ايان 2016 جىلدىڭ ساۋىرىندە اتىراۋدىڭ ورتالىق الاڭىندا 4 مىڭ ادامدى جيناپ، قازاق جەرىن شەتەلدىكتەرگە ساتۋدى توقتاتۋدى تالاپ ەتتى. بۇل تاۋەلسىز قازاقستان تاريحىنداعى ەڭ اۋقىمدى بەيبىت ميتينگ بولدى.

ميتينگ كەزىندە اتىراۋ وبلىسىنىڭ اكىمى نۇرلان نوعاەۆ كوپشىلىك الدىندا ميتينگ ۇيىمداستىرۋشىلارى قىلمىستىق جاۋاپكەرشىلىككە تارتىلمايدى دەپ ۋادە بەردى. الايدا ميتينگتەن كەيىن پوليتسيا ماقس بوقاەۆ پەن تالعات اياندى ۇستادى. كەيىن ولار ارازدىقتى قوزدىردى دەگەن ايىپپەن قاماۋعا الىنىپ، بەس جىلعا باس بوستاندىعىنان ايىرىلدى. حالىقارالىق قۇقىق قورعاۋ ۇيىمدارى بۇل قىلمىستىق ءىستى ويدان شىعارىلعان، ال ۇيىمداستىرۋشىلاردى قۋدالاۋدىڭ ساياسي استارى بار دەپ باعالادى.

سوتتان كەيىن قازاقستان بيلىگى ماكس بوقاەۆتى كىناسىن مويىنداعان جاعدايدا ونى شارتتى تۇردە بوساتۋعا دايىن ەكەندىكتەرىن بىرنەشە رەت مالىمدەدى. ماكس بوقاەۆ بۇل ۇسىنىستاردان باس تارتتى، ول ءوزى جاساماعان قىلمىس ءۇشىن ەشقاشان كىناسىن مويىندامايتىنىن ايتتى.

Abai.kz