وقۋ ورنى باسشىسى ءومىرباي سمايلوۆپەن قاتار اكادەميانىڭ تاعى التى قىزمەتكەرى جۇمىستان بوساتىلعان. اراسىندا تاربيە-يدەولوگيا جونىندەگى ورىنباسار دا بار.

اكادەميانىڭ ءۇشىنشى كۋرسىندا وقىعان 19 جاستاعى سالامات وتەگەنوۆتىڭ دارعا اسىلعان دەنەسى 13 جەلتوقساندا وقۋ ورنىنىڭ اسحاناسىنان تابىلعان. مارقۇمنىڭ تۋىستارىنىڭ سوزىنە سۇيەنگەن "ۋرالسكايا نەدەليا" باسىلىمىنىڭ جازۋىنشا، وتەگەنوۆ اتا-اناسىنان "سەسسيا تاپسىرۋ ءۇشىن", "قارىز وتەۋ ءۇشىن" ءجيى اقشا سۇراعان جانە بۇل جايلى ەشكىمگە ءتىس جارماۋىن وتىنگەن. ولەرىنىڭ الدىندا ءبىر كۇن بۇرىن كۋرسانت اعاسىنان 300 مىڭ تەڭگە اۋدارۋدى ءوتىنىپ، ايتپەسە "اياعى مەن قولىنان ايىرىلاتىنىن" ايتقان. مەسسەنجەردە جازعان سوڭعى حابارلاماسىندا وتەگەنوۆ تۋىستارىنا بەلدىكتىڭ سۋرەتىن جىبەرىپ "مەن كەتتىم" دەپ حابارلاما جىبەرگەن. كەيىنىرەك دارعا اسىلعان دەنەسى تابىلعان.

كۋرسانتتىڭ اناسى ايماقتىق باسىلىمعا وقۋ ورنى مەملەكەتكە قاراسا دا، اتا-انالار بالالارىنا فورمانى وزدەرى ساتىپ اپەرىپ، قاجەتتى زاتتارمەن قامتاماسىز ەتەدى دەگەن. ۇلىنىڭ ستيپەنديا الاتىن بانك كارتوچكاسى دا وزگەلەردىڭ قولىندا بولعان.

وقيعاعا بايلانىستى "سۋيتسيدكە يتەرمەلەۋ" بابى (قىلمىستىق كودەكستىڭ 105-باپ، 1-ءبولىمى) بويىنشا سوتقا دەيىنگى تەرگەۋ امالدارى باستالعان. اكادەميا باسشىلىعى اقشا جيناۋ تۋرالى اقپاراتقا تۇسىنىكتەمە بەرمەگەن.

ىشكى ىستەر مينيسترلىگى 23 جەلتوقساندا وتەگەنوۆتىڭ ولىمىنەن كەيىن اكادەمياعا تەكسەرىس جۇرگىزىلگەنىن، وقۋ ورنىنىڭ 16 قىزمەتكەرى تارتىپتىك جاۋاپكەرشىلىككە تارتىلدى دەپ حابارلادى.

Abai.kz