ونىڭ سوزىنە قاراعاندا، جاڭا جىل قارساڭىندا جانە جاڭا جىل ءتۇنى كوپ ادام جينالاتىن مەرەكە ۇيىمداستىرۋعا بولمايدى. دالاداعى شىرشالار ماڭىندا دا ءىس-شارا وتكىزۋگە رۇقسات جوق. بەكشيننىڭ ايتۋىنشا، جاڭا جىل ءتۇنى ءدامحانا، مەيرامحانالاردا كەلەتىن ادامدار زالداعى ورىننىڭ 50 پايىزىنان اسپاۋى ءتيىس.
جاڭا جىل قارساڭىندا ويىن-ساۋىق ورتالىقتارىنىڭ جۇمىس ۋاقىتى قىسقارادى. قالا باس سانيتارىنىڭ ايتۋىنشا، جاڭا جىل الدىنداعى قاربالاسقا بايلانىستى قالاداعى ويىن-ساۋىق ورتالىقتارى 24 ساعات بويى جۇمىس ىستەۋى مۇمكىن، الايدا تۇپكىلىكتى شەشىم شىقپاعان.
بەكشيننىڭ ايتۋىنشا، الەۋمەتتىك احۋالى ناشار وتباسىلارعا جاڭا جىل سىيلىقتارى سانيتاريا تالاپتارى ساقاتالاپ وتىرىپ، كۋرەر ارقىلى تاراتىلادى.
جەرگىلىكتى باق-تىڭ حابارلاۋىنشا، كوروناۆيرۋستىڭ كۇشەيۋىنە بايلانىستى الداعى بىرنەشە كۇندە الماتىدا مىناداي شەكتەۋلەر كۇشىنە ەنۋى مۇمكىن:
- قىزمەتكەرى 15-تەن اساتىن مەكەمەلەردى قىزمەتكەرلەرىنىڭ 60-80 پايىزىن قاشىقتان ىستەتۋگە مىندەتتەۋ;
- ويىن-ساۋىق ورتالىقتارى جۇمىسىن شەكتەۋ، سەنبى كۇنى ساعات 17.00-گە دەيىن جۇمىس ىستەۋىنە رۇقسات بەرۋ، جەكسەنبى كۇنى جابۋ;
- ءدامحانا، مەيرامحانالاردىڭ تاڭعى ساعات 7.00 مەن تۇنگى 23.00 اراسىندا جۇمىس ىستەۋىنە رۇقسات بەرۋ، زالدى 50 پايىزدان ارتىق تولتىرماۋ;
- حالىققا قىزمەت ورتالىقتارىنا جاي كۇندەرى - ساعات 10.00-18.00, سەنبى كۇنى 10.00-15.00 ارالىعىندا ىستەۋگە رۇقسات بەرۋ;
- تۋريستىك نىساندار جۇمىسىن شەكتەۋ.
الماتى قالاسىندا كەيىنگى ۋاقىتتا كۇن سايىن ورتا ەسەپپەن 65-70 ناۋقاس ادام كوروناۆيرۋس ينفەكتسياسىمەن تىركەلىپ ءجۇر. بۇل جونىنەن الماتى شىعىس قازاقستان وبلىسىنان (17 329) كەيىن ەكىنشى (16 667) تۇر.
ناۋرىز ايىنان بەرى الماتىدا كوروناۆيرۋس جۇققانى تەستپەن راستالعان ناۋقاستار اراسىندا 341 ادام قايتىس بولعان. بۇل - رەسپۋبليكا بويىنشا ەڭ جوعارى كورسەتكىش. قالادا قانشا ادامنىڭ كوروناۆيرۋس پنەۆمونياسىنان قايتىس بولعانى بەلگىسىز. بيلىك تامىزعا دەيىنگى كوروناۆيرۋس پنەۆمونياسى جايلى اقپاراتتى تولىق بەرگەن جوق.
Abai.kz
