وزبەكستاندىق ينۆەستورلار قازاقستاندا زاۋىت اشادى. ناقتىراق ايتساق، تۇركىستان وبلىسىندا ماشينا جاساۋ سالاسىنداعى 12 ميلليون دوللارلىق جوبا جۇزەگە اسىرىلۋدا. بۇل تۋرالى LS سايتى جازدى.

ول 2021-2022 جىلدارى جۇزەگە اسىرىلادى دەپ كۇتىلۋدە. سىرتقى ىستەر مينيسترلىگىنىڭ حابارلاۋىنشا، جاڭا جوبا وزبەكستاندىق ينۆەستوردىڭ قاتىسۋىمەن جۇزەگە اسىرىلادى.

«ايماق اۋىلشارۋاشىلىق ينجينيرينگ سالاسىندا ORBIS Kazakhstan بازاسىندا بىرلەسكەن كاسىپورىن قۇرۋدى جوسپارلاپ وتىر. قۇنى 12 ميلليون دوللاردى قۇرايدى»،- دەلىنگەن حابارلامادا.

ءوندىرىس قۋاتى جىلىنا 150 دانا اۋىلشارۋاشىلىق تەحنيكاسىن قۇرايدى. كاسىپورىندى ىسكە قوسۋ 100-دەن استام جۇمىس ورنىن قۇرۋعا مۇمكىندىك بەرەدى.

بۇعان دەيىن، وزبەكستاننان كەلگەن ينۆەستورلار شىمكەنتتە 2,5 ميلليارد تەڭگەگە جاڭا ءوندىرىستى ىسكە قوسۋعا كومەكتەسەتىنى ايتىلعان. مەگاپوليستە ءدارى-دارمەك پەن گيگيەنا ونىمدەرىن شىعاراتىن زاۋىت سالۋ جوسپارلانۋدا. ونىڭ قۋاتتىلىعى جىلىنا 20 ميلليون دانا ءونىم شىعارادى. كاسىپورىن 2022 جىلدىڭ قاڭتار-اقپان ايلارىندا ىسكە قوسىلادى دەپ كۇتىلۋدە. ول ىسكە قوسىلعاننان كەيىن 90 ادام جۇمىسپەن قامتىلادى.

Abai.kz