بەلگىلى ۇستاز ايمان ساعيدۋللا ءبىلىم جانە عىلىم ءمينيسترى اسحات ايماعامبەتوۆتەن الداعى بولاتىن پارلامەنت سايلاۋىنا مەكتەپتەردى قاتىستىرماۋدى سۇراپ، الەۋمەتتىك جەلىدە جازبا جاريالادى.

ونىڭ سوزىنشە، بۇل مۇعالىمنىڭ بەدەلىن تۇسىرەتىن ارەكەت. ءبىز ايمان حانىممەن بايلانىسقا شىعىپ، اتالعان جازبانى وقىرمان نازارىنا ۇسىنعاندى ءجون كوردىك.

ۇستازدىڭ ۇسىنىسى

اسحات ايماعامبەتوۆ مىرزا! حالىق ءۇشىن جاساۋىڭىز قاجەت ءبىر ءىس بار.

1.مەكتەپكە سايلاۋدى جاقىنداتپاۋ.

2. مەكتەپ مۇعالىمدەرى مەن باسشىلارىنىڭ كوميسسيا مۇشەلىگىنە كىرۋىنە تيىم سالۋ. (قاجەت بولسا، زاڭعا ەنگىزۋ. )

3. سايلاۋ ۋچاستكەلەرىن مەكتەپ عيماراتىنان اشۋعا تيىم سالۋ.

بۇل سايلاۋدىڭ ارام ىسىنە مۇعالىمدەردى ارالاستىرىپ، مۇعالىمنىڭ بەدەلىن تۇسىرۋگە جول بەرمەۋدىڭ نەگىزگى جولى.

سوندىقتان مەكتەپ پەن مۇعالىمدى سايلاۋدان قورعاپ، وسى ماسەلەنى قولعا الۋىڭىزدى سۇرايمىن!

سونىمەن قاتار ول، مەكتەپ ديرەكتورلارىن سايلاۋ بىتكەنشە قىزمەتىنەن شەتتەتىپ، جالاقىلارىن قىسقارتۋ كەرەك دەپ ەسەپتەيدى.

«سايلاۋ ۋچاسكەسى كوميسسياسىنىڭ توراعاسى مەكتەپ ديرەكتورلارى. ديرەكتورلاردىڭ جۇمىس ۋاقىتى تاڭعى 8.00 دەن 18.00 ارالىعىندا. ولار سول ارالىقتا ديرەكتورلىق جۇمىسىنا جالاقى الادى. سوندا سايلاۋ كوميسسيانىنىڭ توراعاسى رەتىندە قاي كەزەڭدە جۇمىس ىستەيدى؟ تۇندە مە؟

ارينە، ديرەكتورلىق جۇمىسىنىڭ ۋاقىتىندا جۇمىس جاساپ ءجۇر. سوندىقتان سايلاۋ كوميسسياسىنىڭ توراعاسى بولىپ جۇمىس ىستەپ جۇرگەن مەكتەپ ديرەكتورلارىن، سايلاۋ بىتكەنشە، ۋاقىتشا ديرەكتورلىق قىزمەتتەن شەتتەتىپ، جالاقىلارىن تولىق قىسقارتۋلارىڭىزدى سۇرايمىن. سايلاۋ كوميسسياسىنىڭ توراعاسى بولعانى ءۇشىن دە جالاقى الادى. ءبىر ادام ءبىر ۋاقىتتا ەكى جۇمىستى قالاي ىستەيدى؟ مەملەكەتتىڭ، حالىقتىڭ اقشاسى دالادا جاتقان جوق.

اقشالارىن قىزعانبايمىن. جاساماعان جۇمىسىنا اقشا تولەپ وتىرسىزدار.

ويلانىپ كورىڭىزشى. ءبىر ۋاقىتتا ەكى جۇمىس ىستەي الا ما؟

وسىلاي ءبىر كەزەڭدە ەكى جۇمىس ىستەپ، ەكى جۇمىستان جالاقى الۋعا زاڭ نە دەيدى»، - دەپ جازدى ول جەلىدەگى پاراقشاسىندا.

ايتا كەتەيىك، 2021 جىلدىڭ 10-قاڭتارىندا قر پارلامەنتى ءماجىلىسى مەن ءماسليحاتتارىنىڭ سايلاۋى وتەدى. بۇعان دەيىن وتكەن پرەزيدەنت سايلاۋىندا مەكتەپ ديرەكتورلارى مەن مۇعالىمدەرى سايلاۋ پروتسەسىن باستان-اياق وتكىزۋگە جۇمىلدىرىلدى.

Abai.kz