قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ءبىرىنشى ورىنباسارى ولجاس بەكتەنوۆ ەلىمىزدەگى سىبايلاس جەمقورلىققا قارسى قىزمەتكە 80 مىڭنان استام ەرىكتى كومەكتەسكەنىن مالىمدەدى.

بەكتەنوۆتىڭ ايتۋىنشا، اگەنتتىك قىزمەتكەرلەرىنىڭ شتات سانى از بولعان كەزدە، بۇكىل ەل بويىنشا مىڭنان استام ادام قوعامدىق كومەك كورسەتكەن. ولاردىڭ 80 مىڭنان استامى ەرىكتىلەر بولىپتى.

-بىزگە كومەكتەسكەن ادامدار قوعامداعى جەمقورلىققا بەي-جاي قارامايدى. جانە ولار وسى ەڭبەگى ءۇشىن ەشكىمنەن اقى دا المايدى. سوندىقتان ءبىز بارلىق قوعامدىق سەرىكتەستەرىمىزگە العىس ايتامىز جانە جەمقورلىقپەن كۇرەسۋگە نيەتتى بارلىق ادامداردى اگەنتتىكپەن بىرگە سىبايلاس جەمقورلىققا قارسى ءىس-قيمىل سالاسىندا جۇمىس ىستەۋگە شاقىرامىز,- دەدى بەكتەنوۆ.

سونىمەن قاتار ۆەدومستۆو توراعاسىنىڭ ورىنباسارى ەلباسى نۇرسۇلتان نازارباەۆتىڭ وسىدان ەكى جىل بۇرىنعى حالىققا جولداۋىندا بەرىلگەن تاپسىرماسى بويىنشا ىسكە اسىرىلاتىن “ادالدىق الاڭى” جوباسى تۋرالى دا ايتىپ ءوتتى.

قازىرگى تاڭدا اتالعان جوبا سىبايلاس جەمقورلىققا قارسى جالپىۇلتتىق قوزعالىس اۋقىمىنا يە بولعان. سونىمەن قاتار، بارلىق وڭىرلەردە، ءتىپتى اۋىلدىق ەلدى مەكەندەردەن باستاپ ورتالىق مەملەكەتتىك ورگاندار دەڭگەيىندە ىسكە اسىرىلىپ جاتقان كورىنەدى.

وسى نەگىزدە بارلىق جەردە جوبالىق كەڭسەلەر قۇرىلىپ، ولار ازاماتتاردىڭ مەملەكەتتىك قىزمەتتەردى الۋدا جانە جالپى مەملەكەتپەن ءوزارا ءىس-قيمىل جاساۋ كەزىندە كەزدەسەتىن تۇرمىستىق سىبايلاس جەمقورلىقتى جويۋمەن اينالىسادى.

بەكتەنوۆ بۇل قوزعالىستىڭ ماڭىزدى باعىتى رەتىندە مەملەكەتتىك ورگاندارداعى اشىقتىق، ەسەپتىلىك، ترانسپارەنتتىلىك قاعيداتتارىن اتاپ ءوتتى.

-قازىرگى تاڭدا 230 اۋداندىق جانە قالالىق اكىمدىك ازاماتتاردىڭ وتىنىشتەرى كەزىندە ىڭعايلى جاعداي جاساۋدى كوزدەيتىن جۇمىستىڭ سەرۆيستىك مودەلىنە كوشىرىلگەن. اكىمدىك سەرۆيستىك دەپ تانۋعا بولاتىن بەلگىلى ءبىر ستاندارتتار قالىپتاسقان. قازىرگى تاڭدا 230 اكىمدىك وسى اتالعان ستاندارتتارعا سايكەس كەلەدى،- دەدى اگەنتتىك توراعاسىنىڭ ءبىرىنشى ورىنباسارى.

بەكتەنوۆتىڭ سوزىنشە، جىل سوڭىنا دەيىن بارلىق قالالىق جانە اۋداندىق اكىمدىكتەر سەرۆيستىك مودەلگە كوشىرىلەدى.

ايتا كەتەيىك، بۇگىندە رەسمي مالىمەت بويىنشا قازاقستاندا 16 مىڭنان استام ەرىكتى بار. الايدا مەملەكۋەت باسشىسى مۇنىڭ از ەكەنىن ايتىپ، الداعى ۋاقىتتا كەم دەگەندە 100 مىڭعا جەتكىزۋ كەرەكتىگىن العا تارتقان بولاتىن.

سونىمەن قاتار، پرەزيدەنت الداعى ۋاقىتتا اتقارۋشى ورگاندار مەن مەملەكەتتىڭ،سونىمەن قاتار پارلامەنت دەمۋتاتتارىنىڭ مىندەتى – ەرىكتىلەر قوزعالىسىنا قاتىسۋعا كومەكتەسۋ كەرەكتىگىن ايتقان بولاتىن.

بۇگىندە ەرىكتىلەر قوعامنىڭ ءار سالاسىندا ەل يىگلىگى ءۇشىن قىزمەت ەتىپ كەلەدى. ولار بيزنەستە، ەكولوگيا سالاسىندا، الەۋمەتتىك سالادا كۇندەلىكتى پايدالى جانە ماڭىزدى ىستەردى اتقارۋدا.

ال، بۇگىنگى تاڭدا قازاقستاندا 200-دەن استام ەرىكتىلەر ۇيىمى بار ەكەنى ايتىلادى. ولاردىڭ قاتارىنا 50 مىڭنان استام ەرىكتىلەر قاتىسقان. ولار كوبىنە قازاقستاننىڭ ەكولوگيالىق جاعدايىن جاقسارتۋ ماقساتىندا ىرگەلى ىستەر اتقارۋدا. ءسويتىپ، قورشاعان ورتانىڭ وزەكتى ماسەلەلەرىن شەشۋدە بەلسەندىلىك تانىتىپ كەلەدى.

مەملەكەت باسشىسى قاسىم جومارت توقاەۆ ءوز سوزىندە ەرىكتىلەر – مەملەكەت پەن جالپى قوعام دامۋىنىڭ كورسەتكىشى ەكەنىن ايتقان ەدى. دەمەك، الداعى ۋاقىتتا قوعامنىڭ ءار سالاسىندا ەرىكتىلەر قىزمەتى جاندانا تۇسپەك.

Abai.kz