اقتوبە جانە اتىراۋ وبلىسىنىڭ ەكس-اكىمى، قازاقستان پرەزيدەنتى اكىمشىلىگىنىڭ بۇرىنعى باسشىسى اسلان مۋسين "اقتوبە" الەۋمەتتىك كاسىپكەرلىك كورپوراتسياسى" اق-مەن سوتتاسىپ جاتىر. سەبەبى ول قايتىس بولعان ۇلىنىڭ بيزنەسىندەگى ۇلەسى كومپانياعا بەرىلگەنىن بىلگەن. بۇل تۋرالى  "دياپازون" باسىلىمى جازادى

باسىلىم مالىمەتىنشە، مۋسين "اقتوبە" اكك جانە تۋىسىنا قاتىستى سوتقا شاعىمدانعان. ازاماتتىق ءىستى اقتوبەدەگى سوت قاراستىرىپ جاتىر.

اسلان ءمۋسيننىڭ ۇلى اسىلبەك مۋسين 2017 جىلى ريگادا 38 جاسىندا قايتىس بولدى. لاتۆيا پوليتسياسىنىڭ مالىمەتىنشە، ول 23 جەلتوقسانعا قاراعان ءتۇنى 15-قاباتتان قۇلاعان. ونىڭ ولىمىنە قاتىستى قىلمىستىق ءىس اشىلدى، بىراق كەيىن "قىلمىس قۇرامىنىڭ بولماۋىنا بايلانىستى" ءىس جابىلدى.

اسىلبەك ءمۋسيننىڭ اقتوبەدەگى قارعالى اۋىلىندا اۋدانى 567 شارشى مەتر بولاتىن جازعى اسحاناسى، گاراجى، بيليارد زالى بار ەكىقاباتتى ءۇيى قالدى.

2020 جىلعى تامىزدا ەكس-اكىم ۇلىنىڭ قاعازدارىنىڭ اراسىنان قۇرىلتايشى قۇجاتتارىن تابادى. ول جەردە اسىلبەك مۋسين "اليكو", "ا-پوليگرافيا", "مك-بيزنەس", "پورتال-ب", "مەرەديان-س" جشس-نىڭ قۇرىلتايشىسى جانە ولاردىڭ ارقايسىندا جارعى كاپيتالى بارىن انىقتايدى.

باسىلىمنىڭ مالىمەتىنشە، قۇجاتتارعا قاراعاندا 2013 جىلعى 11 قاراشادا اسىلبەك مۋسين تۋىسى انۋاربەك مۋسينگە سەنىمحات بەرگەن. ال ول سول كۇنى "ا-پوليگرافيا", "مەريديان-س", "اكتوبە" اكك" كومپانيالارىندا جارعى كاپيتالىن ۇلەستىرگەن. سەنىمحات العان ول باسقا كومپانيالارداعى ۇلەسىن بەرگەن.

اسلان مۋسين ۇلىنىڭ كومپانيالارداعى ۇلەسىن "اقتوبە" اكك" اق-عا زاڭسىز بەرىلگەن دەپ ەسەپتەيدى. سەنىمحات بيزنەستەگى ۇلەسىن بەرۋگە قۇقىق بەرمەيدى. ونىڭ ۇستىنە اسىلبەك مۋسين ول كەزدە ەلدە بولعان جوق جانە سەنىمحات بەرە المايتىن ەدى.

"اكەسى سەنىمحات پەن كەلىسىمدەردى جارامسىز دەپ تانۋدى تالاپ ەتىپ جاتىر", - دەپ جازدى باسىلىم.

Abai.kz