تاچي قىزمەتىنەن كەتكەنىن پريشتينادا وتكەن ءباسپاسوز ءماسليحاتى كەزىندە مالىمدەدى. ول وزىنە تاعىلعان ايىپتاردى مويىندامايدى.

ەندى پرەزيدەنت مىندەتىن پارلامەنت سپيكەرى اتقارادى.

تاياۋدا پريشتينادا ەۋروپالىق وداقتىڭ قاۋىپسىزدىك كۇشىنىڭ ىقپالىمەن كوسوۆا پارلامەنتىنىڭ بۇرىنعى سپيكەرى ياكۋپ كراسنيچي ۇستالعان. ول دا گااگا ارنايى پروكۋراتۋراسىنىڭ ءوتىنىشى بويىنشا قاماۋعا الىندى.

گااگا ارنايى پروكۋراتۋراسى تاچيعا جانە بىرنەشە شەنەۋنىكتەرگە قارسى ايىپ تاققان. ولار كوسوۆوداعى اسكەري جانجال كەزىندە جۇزگە تارتا ادامدى ءولتىردى، ۇرلادى، زورلادى دەگەن كۇدىككە ءىلىندى. تەرگەۋ ىسىندە قۇربانداردىڭ دەنى ءارتۇرلى ەتنيكالىق توپتىڭ وكىلدەرى بولعانى ايتىلعان. قۇربانداردىڭ تىزىمىندە بيلىككە قارسىلىق تانىتقان ساياسي قايراتكەرلەر دە بار دەپ اتاپ وتەدى ازاتتىقتىڭ بالكان قىزمەتى.

حاشيم تاچي مەن كادري ۆەسەلي 1990 جىلدارى كوسوۆونى ازات ەتۋ ارمياسىنىڭ قولباسشىلارى بولعان. البان ۇلتىنان تۇرعان اسكەر 1998-1999 جىلدارداعى سوعىستا بەلگرادتىڭ قاۋىپسىزدىك كۇشتەرىنە قارسى كۇرەسىپ كەلگەن.

الباندار ۇستەمدىك ەتكەن سەربيا پروۆينتسياسىندا 1998-1999 جىلدارى حالىقتىق قوزعالىس بولىپ، بەلگراد ونى كۇشپەن باسقان. ناتو-نىڭ 78 كۇندىك بومبالاۋىنان كەيىن سەربيا اسكەرلەرىن كوسوۆودان شىعاردى. قاقتىعىس كەزىندە 10 مىڭنان استام ادام قايتىس بولىپ، 1600-دەن استام قازىرگى كۇندە دەيىن بەلگىسىز.

كوسوۆو 2008 جىلى ءوزىن سەربيادان تاۋەلسىز ەل دەپ جاريالادى. ونىڭ تاۋەلسىزدىگىن الەمدەگى 100-دەن استام مەملەكەت، اراسىندا اقش، ەۋروپالىق وداقتىڭ كوپشىلىك ەلى تانىدى. بەلگراد پەن ماسكەۋ جانە بىرنەشە ەل كوسوۆونى سەربيانىڭ ءبىر بولىگى دەپ ەسەپتەيدى.

Abai.kz