مەملەكەت باسشىسى ق.توقاەۆتىڭ 2020 جىلعى 1 قىركۇيەكتەگى جولداۋىن ىسكە اسىرۋ شەڭبەرىندە، 5 قاراشادا قازاقستان رەسپۋبليكاسى پارلامەنتى سەناتىنىڭ الەۋمەتتىك-مادەني دامۋ كوميتەتى دەپۋتاتتارىنىڭ اقپارات جانە قوعامدىق دامۋ ءمينيسترى ايدا بالاەۆامەن جانە قوعام وكىلدەرىمەن كەزدەسۋى ءوتتى.

كەزدەسۋ بارىسىندا قوعامدىق باقىلاۋدى زاڭنامالىق بەكىتۋ ماسەلەلەرى بويىنشا نەگىزگى تاسىلدەر تالقىلاندى.

ايدا بالاەۆا قوعامدىق باقىلاۋ ينستيتۋتىن جەتىلدىرۋدىڭ ۋاقتىلىعى مەن وزەكتىلىگىن اتاپ ءوتىپ، «قوعامدىق باقىلاۋ جۇيەسىن قالىپتاستىرۋ جانە قوعامدىق باقىلاۋدى جۇزەگە اسىرۋ پروتسەسىن قۇقىقتىق رەگلامەنتتەۋ ءۇشىن قۇقىقتىق جاعدايلار جاساۋ ازاماتتاردىڭ بارلىق سىندارلى سۇرانىستارىنا جەدەل جانە ءتيىمدى جاۋاپ بەرەتىن «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ بويىنشا مەملەكەت باسشىسى قويعان مىندەتتەردى ىسكە اسىرۋ ءۇشىن پارمەندى شارالاردىڭ ءبىرى بولاتىنىن» اتاپ ءوتتى.

وسىلايشا، بولاشاق زاڭ جوباسىنىڭ ماقساتى قوعامدىق باقىلاۋ جۇيەسىنىڭ قۇقىقتىق نەگىزىن، سونداي-اق ازاماتتىق قوعامدى ودان ءارى دامىتۋ ءۇشىن قۇقىقتىق جاعدايلار جاساۋدى ايقىنداۋ ۇسىنىلادى.

زاڭ جوباسىنىڭ مىندەتىنە بىرىڭعاي ۇعىمدىق اپپاراتتى قالىپتاستىرۋ، قوعامدىق باقىلاۋدى جۇزەگە اسىرۋ قاعيداتتارىنىڭ بىرىڭعاي جۇيەسىن بەلگىلەۋ، سىبايلاس جەمقورلىققا قارسى كۇرەستە قوعامدىق كۇش-جىگەردى بىرىكتىرۋدىڭ قۇقىقتىق تەتىكتەرىن جاساۋ، سونداي-اق قوعامدىق باقىلاۋ سۋبەكتىلەرى مەن وبەكتىلەرىنىڭ فۋنكتسيالارىن، وكىلەتتىكتەرى مەن جاۋاپكەرشىلىگىن ايقىنداۋ كىرەدى.

كەزدەسۋ بارىسىندا «قازاقستاننىڭ ەكولوگيالىق ۇيىمدارىنىڭ قاۋىمداستىعى» زتب باسقارما توراعاسى ايگۇل سولوۆەۆا، «قازاقستاننىڭ ازاماتتىق اليانسى» زتب پرەزيدەنتى بانۋ نۇرعازيەۆا، «ۇلت تاعدىرى» قب توراعاسى دوسماحامبەت كوشىم جانە «ادام قۇقىقتارى مەن زاڭدىلىقتى ساقتاۋ جونىندەگى قازاقستاندىق حالىقارالىق بيۋرو» قب ديرەكتورى ەۆگەني جوۆتيس، ساياساتتانۋشى، مەملەكەت جانە قوعام قايراتكەرى ايدوس سارىم، «Eurasian Expert Council» قق باسشىسى شىڭعىس لەپسىباەۆ ءسوز سويلەدى.

Abai.kz