مەديتسينالىق ماسكالاردىڭ تيىمدىلىگىن عالىمدار دالەلدەدى. بۇل تۋرالى نۇر-سۇلتان قالاسىنىڭ باس سانيتارلىق دارىگەرى جاننا پىراليەۆا ءمالىم ەتتى.

«زەرتتەۋلەر مەديتسينالىق ماسكالاردىڭ تيىمدىلىگىن دالەلدەدى. بەتپەردە تاعۋ كوروناۆيرۋستىق ينفەكتسيانىڭ تارالۋىن ازايتۋعا كومەكتەسەدى. ءتيىستى زەرتتەۋدى گونكونگ ۋنيۆەرسيتەتى مەن اقش-تاعى مەريلەند ۋنيۆەرسيتەتىنىڭ عالىمدار توبى دۇنيەجۇزىلىك دەنساۋلىق ساقتاۋ ۇيىمى ساراپشىلارىنىڭ قاتىسۋىمەن جۇرگىزدى. زەرتتەۋ ناتيجەلەرى عىلىمي باسىلىمداردا جاريالاندى»، - دەپ ءتۇسىندىردى قالالىق باس سانيتار دارىگەر.

ونىڭ ايتۋىنشا، امەريكالىق عالىمدار كوروناۆيرۋستىڭ جىلدام تارالاتىنىن انىقتادى. پرينستون ۋنيۆەرسيتەتىنىڭ ماماندارى COVID-19 ىندەتى تارالۋىنىڭ ماتەماتيكالىق مودەلىن ويلاپ تاپتى. ونىڭ كومەگىمەن پاندەميا ادامدار كوپ جينالاتىن جەرلەرگە باراتىن ينفەكتسيا تاسىمالداۋشىلار اسەرىنەن ىندەت تەز تارالاتىنى ايقىندالدى.

«ينفەكتسيانىڭ الدىن الۋ ءۇشىن بارىنە جوعارى قورعانىس بەتپەردەلەرىن پايدالانۋ قاجەت ەمەس. مىسالى، جۇقپالى اۋرۋلار دارىگەرلەرىنە تولىق وقشاۋلاعىش رەسپيراتورلار قاجەت، ال جۇمىسى مەديتسينامەن بايلانىستى ەمەس ادامدار ءۇشىن ءدارىحانالاردا ساتىلاتىن قاراپايىم ماسكالار جارايدى. ۇيدە مۇنداي قورعانىس قاجەت ەمەس، بىراق قوعامدىق ورىندارعا بارعان كەزدە مىندەتتى بولىپ تۇر. كادىمگى مەديتسينالىق ماسكانى ءار 2-3 ساعات سايىن اۋىستىرۋ كەرەك ەكەنىن ەستە ۇستاعان ءجون»، - دەدى مامان.

وسى ورايدا ول كارانتيندىك شارالاردى ورىنداۋعا ۇندەۋ جاسادى.

«قازىرگى كەزدە الەمدە جانە ەلىمىزدىڭ كەيبىر وڭىرلەرىندە كوروناۆيرۋستىق ينفەكتسيا بويىنشا ەپيدەميولوگيالىق جاعداي كۇرت ناشارلادى. وسىعان بايلانىستى كارانتين شارالارى كۇشەيتىلىپ، كينو جانە سپورت زالدارى، تەاترلار قايتادان جابىلدى، قوعامدىق تاماقتانۋ نىساندارىنىڭ جۇمىس رەجيمى قىسقارتىلدى. وسى ورايدا ءبىز قالاداعى تۇراقتى ەپيدەميولوگيالىق جاعدايدى بارشا كۇشىمىزبەن ساقتاپ قالۋعا تىرىسۋدامىز. سوندىقتان قالا تۇرعىندارى مەن قوناقتارىن وسى كۇردەلى كەزەڭدى ەڭسەرۋگە كومەكتەسۋدى سۇرايمىن»، - دەدى جاننا پىراليەۆا.

دەرەككوز: قازاقپارات

Abai.kz