جەرگىلىكتى بيلىك وبلىستا وتكەن ايمەن سالىستىرعاندا كوروناۆيرۋس جۇقتىرعاندار ايتارلىقتاي كوبەيگەنىن ايتىپ وتىر. وڭىرگە جاڭادان شەكتەۋ شارالارى ەنگىزىلەتىنىن پرەمەر-ءمينيستردىڭ ءباسپاسوز قىزمەتى حابارلادى.

ءباسپاسوز قىزمەتىنىڭ ايتۋىنشا، كەلەسى اپتادان باستاپ وبلىس ورتالىعى پەتروپاۆل قالاسىندا پەريمەتر بويىنشا بلوكبەكەتتەر قويىلىپ، وبلىس اۋماعىنا كىرىپ-شىعۋ شەكتەلەدى. ترانزيتتىك جۇك تاسىمالدايتىن جۇرگىزۋشىلەردە Covid جۇقپاعانىن دالەلدەيتىن پتر-تەست انىقتاما بولۋى ءتيىس.

كۇن سايىن 10-نان استام ناۋقاس انىقتالعان ەلدى مەكەندەردە سانيتارلىق بلوكبەكەتتەر پايدا بولادى.

پەتروپاۆل اۋەجايىنان ۇشاتىن جولاۋشىلاردا دا پتر-تەست انىقتاما بولۋى ءتيىس. پەتروپاۆل - الماتى باعىتى بويىنشا جۇرەتىن پويىزدار سانى قىسقارادى.

9 قاراشادان باستاپ ءدىني نىساندار، تەاتر، كينوتەاتر، مادەني وشاقتار جۇمىسىن توقتاتادى.

قوعامدىق تاماقتانۋ ورىندارى، ازىق-تۇلىكتىك ەمەس ءىرى ساۋدا نىساندارى، سۇلۋلىق سالونى، شاشتاراز، باسسەين، فيتنەس-كلۋب، جاتتىعۋ زالدارىنىڭ جۇمىس ۋاقىتى شەكتەلەدى. ساۋدا ۇيلەرى، ساۋدا ورتالىقتارى دا دەمالىس كۇندەرى شەكتەۋلى رەجيمدە جۇمىس ىستەيدى.

كومپانيالارعا قىزمەتكەرلەردىڭ باسىم بولىگىن قاشىقتان جۇمىس ىستەۋ فورماتىنا كوشىرۋگە جاعداي جاساۋ تاپسىرىلعان.

65 جاستان اسقاندارعا تەك قاجەت جاعدايدا عانا سىرتقا شىعۋعا كەڭەس بەرىلگەن. پەتروپاۆل قالاسى، ايىرتاۋ، اققايىڭ، اقجار اۋداندارىندا كارانتين رەجيمىن ساقتاۋدى قاداعالاۋ توپتارىنىڭ جۇمىسى كۇشەيەدى دەپ ايتىلادى.

سوڭعى مالىمەت بويىنشا، سولتۇستىك قازاقستان وبلىسىندا كوروناۆيرۋس جۇققانى پتر-تەستىمەن راستالعان 4 570 ادام بار. سوڭعى تاۋلىكتە 33 ناۋقاس تىركەلگەن. ال وبلىستا ناقتى قانشا ادامعا كوروناۆيرۋس پنەۆمونياسى جۇققانى بەلگىسىز. بيلىك ازىرگە، مۇنداي مالىمەتتى جاريالاعان جوق.

Abai.kz