اقمولا وبلىسىندا كوروناۆيرۋس تارالۋىنىڭ الدىن الۋ ماقساتىندا 7 قاراشادان باستاپ شەكتەۋ شارالارى كۇشەيتىلەدى.

اقمولا وبلىسىنىڭ باس مەملەكەتتىك سانيتار دارىگەرىنىڭ 2020 جىلعى 3 قاراشاداعى №136 قاۋلىسىنا سايكەس وڭىردە ەپيدەميولوگيالىق جاعدايدىڭ ۋشىعۋىنا بايلانىستى قوسىمشا كارانتين شەكتەۋلەرى ەنگىزىلەدى.

وبلىستىڭ باس مەملەكەتتىك سانيتار دارىگەرى ايناگۇل مۋسينانىڭ ايتۋىنشا، سوڭعى ەكى اپتادا ناۋقاستار سانى اقمولا وبلىسى بويىنشا 2,2 ەسەگە جانە كوكشەتاۋ قالاسى بويىنشا 3,5 ەسە وسكەن.

وسىعان بايلانىستى وبلىستىڭ ەلدى مەكەندەرىنىڭ اۋماعىندا 21:00-دەن 6:00-گە دەيىنگى ۋاقىتتا تۇرعىنداردىڭ ءجۇرىپ-تۇرۋىنا شەكتەۋ ەنگىزىلەدى.

مۋزەيلەردىڭ، كىتاپحانالاردىڭ، تەاترلاردىڭ، كينوتەاترلاردىڭ، ءدىني نىسانداردىڭ قىزمەتى توقتاتىلادى.

ازىق-تۇلىك دۇكەندەرىنىڭ، قوعامدىق تاماقتانۋ نىساندارىنىڭ، تاكسي جانە قوعامدىق كولىك قىزمەتتەرىنىڭ جۇمىس رەجيمىنە شەكتەۋلەر ەنگىزىلەدى.

سۇلۋلىق سالوندارى، شاشتارازدار، سپا-ورتالىقتار، كوسمەتولوگيالىق قىزمەت كورسەتەتىن نىساندار، فيتنەس-ورتالىقتار، ترەناجەر زالدارى، سپورتتىق-ساۋىقتىرۋ ورتالىقتارى، باسسەيندەر سانيتاريالىق نورمالاردى ساقتاي وتىرىپ، الدىن الا جازىلۋ بويىنشا ساعات 8.00-دەن 19.00-گە دەيىن جۇمىس ىستەيتىن بولادى. جەكسەنبى كۇندەرى ولاردىڭ جۇمىسى توقتاتىلادى.

ايتا كەتەيىك، سوڭعى مالىمەتتەر بويىنشا، اقمولا وبلىسىندا كوروناۆيرۋس جۇقتىرعاندار سانى 3805-كە جەتكەن. ونىڭ 1659-ى سيمپتومسىز. 77 ادام قايتىس بولعان. ال قازاقستاندا كوروناۆيرۋس جۇقتىرعاندار سانى 113 741-گە جەتتى.

Abai.kz