قۇجاتقا سايكەس، جۇمىس بەرۋشى تەك تالاپ ارىز بەرگەن جۇمىسشىلار عانا ەمەس، بۇكىل ۇجىم - 400-دەي ادامنىڭ الدىنداعى قارىزىن وتەۋگە مىندەتتەمە العان.
بۇگىن سوتتا تاراپتار شاحتەرلار مەن جۇمىس بەرۋشى اراسىنداعى مەدياتسيالىق كەلىسىمدى بەكىتۋدى سۇرادى. جاۋاپكەر – "Altyn Komir Service" كومپانياسىنىڭ وكىلى وسى كەلىسىمدە كورسەتىلگەن كەيبىر شارتتاردى ورىنداۋعا ۋادە بەردى. كاسىبي مەدياتور – قاراعاندىداعى كونفليكتىلەردى شەشۋ ينستيتۋتى بەكىتكەن بۇل كەلىسىمنىڭ بىرنەشە شارتى بار.
سوت وتىرىسىنان سوڭ ازاتتىق تىلشىسىمەن سۇحباتتاسقان تالاپكەرلەر وكىلى الەكساندر پاك مەكەمە مىنا مىندەتتەمەلەردى موينىنا العانىن ايتتى:
- قازىر زەينەتكە شىعىپ جاتقان بارلىق جۇمىسشىلار الدىنداعى زەينەتاقى تولەمى بويىنشا بەرەشەكتى بىردەن تولەۋ;
- كەزەكتى زەينەتاقى تولەمدەرىن تولەۋ، ال الدىڭعى ەكى جىلدىڭ قارىزىن 2021 جىلدىڭ ىشىندە تولەۋ;
- مىندەتتى الەۋمەتتىك-مەديتسينالىق ساقتاندىرۋ بويىنشا كەزەكتى ساقتاندىرۋ تولەمدەرىن تولەۋ. ال جينالىپ قالعان ال ءۇش ايدىڭ بەرەشەگى تولەندى.
دەگەنمەن، بارلىق شارتتار بويىنشا كەلىسىمگە كەلۋ مۇمكىن بولمادى. ماسەلەن، جۇمىس وتىلىنە سايكەس تولەنەتىن قوسىمشا تولەمدەردى قالپىنا كەلتىرۋدىڭ ءساتى تۇسپەدى. بۇل وتەم الىنىپ تاستالعالى جۇمىسشىلاردىڭ تابىسى ازايىپ كەتكەن ەدى. مەكەمە باسشىلىعى مۇنداي تولەمدى بەرۋدەن تۇبەگەيلى باس تارتىپ وتىرعان جوق. مەكەمە كومىر ءوندىرۋ بويىنشا بەلگىلى ءبىر مەجەگە جەتە السا، تولەمدەر قايتا جاسالۋى مۇمكىن.
ەكى تاراپتىڭ ءۋاجىن تىڭداعان سوت بۇدان سوڭ بۇل ماسەلە بويىنشا تالاپ ارىز بەرۋ مۇمكىن ەمەستىگىن ەسكەرتىپ سوت ءىسىن توقتاتۋ تۋرالى شەشىم شىعاردى.
جۇمىس بەرۋشى كەلىسىم تالاپتارىن ورىنداماعان جاعدايدا تالاپكەر سوتقا شاعىمدانا الادى. ونداي جاعدايدا سوت ورىنداۋ قاعازىن بەرىپ، كەلىسىمدە كورسەتىلگەن سوما ماجبۇرلەپ العىزۋعا مۇمكىندىك بەرەدى.
سوتقا قاتىسقان ەڭبەك ينسپەكتسياسى باسقارماسىنىڭ وكىلى كومپانيانى ەڭبەك زاڭدارىن بۇزباۋعا، مەداتسيالىق كەلىسىم شارتتارىن ساقتاۋعا شاقىردى.
شاحتەرلار جۇمىس بەرۋشىنىڭ ۇزاق ۋاقىتتان بەرى زەينەتاقى جانە مىندەتتى الەۋمەتتىك-مەديتسينالىق ساقتاندىرۋ تولەمدەرىن، سونداي-اق جۇمىس ءوتىلى ءۇشىن ۇستەماقىنى تولەمەي جۇرگەنىن بىلگەن سوڭ Altyn Komir Service كومپانياسىندا ەڭبەك داۋى تۋعان. 45 شاحتەر بىرلەسىپ، كومپانيانى سوتقا بەرگەن. جۇمىسشىلاردىڭ ءبىر بولىگى عانا سوتتاسۋعا كەلىسىم بەرگەن. دەگەنمەن، مەدياتسيالىق كەلىسىمنىڭ شارتتارى بارلىق جۇمىسشىلار ءۇشىن بىردەي ورىندالماق.
Abai.kz
