«الماتى» تەلەارناسىندا 2 قاراشادان باستاپ «وتكىنشى جاڭبىر» اتتى جاڭا تەلەسەريال كورەرمەن نازارىنا ۇسىنىلادى. ايەلدەردىڭ ارمانىن بەينەلەگەن بۇل كارتينا 12 سەريادان تۇرادى.

كارتينا اۋىلدان كوشىپ كەلگەن جالعىزباستى انا مەن الماتىدا تۇراتىن كوپبالالى انانىڭ ءومىرىن باياندايدى.

- «بۇل فيلم تاعدىر تالكەگىمەن الماتىدا كەزدەسىپ، جاقىن دوس بولىپ، ورتاق ءىس اشاتىن ەكى ءتۇرلى ايەلدىڭ تاعدىرى مەن ولاردىڭ ارماندارى تۋرالى باياندايدى. سول ۋاقىت ارالىعىندا ولار وزگەرەدى، جەكە تۇلعا رەتىندە وسەدى، قيىندىقتاردى جەڭىپ، تابىسقا جەتەدى. بۇل ومىردە ءبارى مۇمكىن ەكەنىن دالەلدەيدى», - دەيدى ءتۇسىرىلىم توبى.

تۋىندىنىڭ رەجيسسەرى دارحان ساركەنوۆ. باستى رولدەردە قازاقستاندىق كينواكتەرلار - المات ساقاتوۆ، نۇرگۇل مىڭعاتوۆا جانە سالتانات باقاەۆا ويناعان.

«قازىر زامان تالابى باسقا. ايەلدەر كوپ نارسەگە ۇلگەرەدى. مەن سومداعان كەيىپكەر دە جان-جاقتى بولۋ ءۇشىن بارىن سالادى. ونىڭ ءتورت بالاسى بار، جاعدايى جاقسى. تەك جەكە كاسىبىن اشقىسى كەلەدى. ادامدارمەن ارالاسىپ، تانىمىن كەڭەيتۋگە تىرىسادى. سول جولدا الدىنان كوپتەگەن كەدەرگى شىعادى. ايەل ادام قىرىق جاندى دەيدى عوي، ونىڭ ءبارىن تۇبىندە جەڭىپ، ومىرىندە وتباسى مەن جۇمىستىڭ اراسىندا تەپە-تەڭدىك ورنايدى. ماعان كەيىپكەرىمنىڭ بولمىسى ۇنادى», - دەيدى نۇرگۇل مىڭعاتوۆا.

ال، سەريالدىڭ پروديۋسەرى ايكەرىم سامالبەكقىزىنىڭ ايتۋىنشا، ءفيلمنىڭ اتاۋى ارقىلى ايتار ويدىڭ سالماقتى ەكەنىن ۇعۋعا بولادى.

«كەز كەلگەن ادامدا، وتباسىندا قانداي دا ءبىر قيىندىقتار بولادى. الايدا ول وتكىنشى جاڭبىر سياقتى وتەدى دە كەتەدى. ەڭ باستى قۇندىلىق - وتباسى، بالا-شاعا، سىيلاستىق، دوستىق، تۋىستىق قارىم-قاتىناس ماڭگى قالادى. تەلەحيكايانىڭ نەگىزگى يدەياسى، كورەرمەنگە ايتار ويى وسى. تەلەحيكايا  سوندىقتان «وتكىنشى جاڭبىر» دەپ اتالادى», - دەيدى پروديۋسەر.

ايتا كەتەيىك، اتالعان تەلەحيكايا «الماتى تەلەارناسىنىڭ» تاپسىرىسىمەن تۇسىرىلگەن. سوندىقتان دا فيلمدە الماتىنىڭ كوپتەگەن كورىكتى جەرلەرىن كورۋگە بولادى.

Abai.kz