2025 جىلعا دەيىن 87 اۋىلدىق ەلدى مەكەن تازا اۋىز سۋمەن قامتىلادى. بۇل تۋرالى قر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ مالىمدەدى. 

مينيستر جوسپار بويىنشا، 2025 جىلعا دەيىن 11 توپتىق سۋ قۇبىرلارى قايتا جاڭارتىلىپ، جوندەلەتىنىن ايتتى. ونىڭ ىشىندە، بىرقاتار سۋ قۇبىرلارى ۇزارتىلادى.

«وسىنىڭ ارقاسىندا بۇعان دەيىن ساپالى سۋى بولماعان 87 اۋىلدىق ەلدى مەكەن تازا اۋىز سۋمەن قامتاماسىز ەتىلەدى. بۇل 103,7 مىڭعا جۋىق ادامدى قامتيدى. سونىمەن قوسا، 321 اۋىلدىق ەلدى مەكەننىڭ اۋىز سۋ بەرۋ جۇيەسى جاڭارتىلاتىن بولادى. بۇل، ءوز كەزەگىندە 524,6 مىڭ ادامدى قامتيدى»، — دەدى مينيستر.

سونىمەن قاتار، «نۇرلى جەر» مەملەكەتتىك باعدارلاماسى شەڭبەرىندە 2025 جىلعا دەيىن توپتىق سۋ قۇبىرلارى جوبالارىنا 133,1 ملرد استام تەڭگە قاراجات ءبولۋ جوسپاردا بار.

ونىڭ ىشىندە جاڭادان سالۋعا 14,5 ملرد تەڭگە، ال قايتا جاڭارتۋعا 118,6 ملرد تەڭگە بولىنبەك.

«وسىنىڭ ەسەبىنەن الداعى بەس جىلدا جاڭادان 1469 شاقىرىم قۇبىر جەلىلەرى سالىنادى جانە 1724 شاقىرىمى قايتا جاڭارتىلىپ، قاجەتتى جوندەۋ جۇمىستارى جۇرگىزىلەدى»، — دەدى م. مىرزاعاليەۆ.

اتقارىلاتىن جۇمىستاردىڭ ارقاسىندا بۇرىن اۋىز سۋمەن قامتاماسىز ەتىلمەگەن 90 اۋىلدىق ەلدى مەكەنگە سۋ قۇبىرى جەتكىزىلىپ، 105 مىڭ تۇرعىنعا ساپالى اۋىز سۋ قولجەتىمدى بولادى.

سونىمەن قاتار، 321 ەلدى مەكەننىڭ اۋىز سۋ بەرۋ جۇيەسى جوندەلىپ، جاڭارتىلادى. بۇل 524,6 مىڭنان استام ادامدى قامتيدى.

جالپى، 5 جىل ىشىندە 3 مىڭنان استام شاقىرىم توپتىق سۋ قۇبىرلارى سالىنادى. اۋىز سۋمەن قامتاماسىز ەتۋ كورسەتكىشىن 100% پايىزعا جەتكىزۋ جوسپارلانعان.

Abai.kz