قازاقستاندىق مەكتەپتەردىڭ 99%-ى بەينەباقىلاۋ كامەرالارىمەن جابدىقتالعان. ەلىمىز بويىنشا 6971 مەملەكەتتىك مەكتەپ جىلى دارەتحانالارمەن قامتاماسىز ەتىلگەن. بۇل تۋرالى ءبىلىم جانە عىلىم مينيسترلىگىنىڭ اپپاراتتىق جيىنىندا بەلگىلى بولدى.

قر بعم ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ اۋماقتىق دەپارتامەنتتەرى مەكتەپتەر مەن بالاباقشالاردىڭ بەينەباقىلاۋ جۇيەلەرىمەن جانە جىلى دارەتحانالارمەن قامتاماسىز ەتىلۋى بويىنشا مونيتورينگ جۇرگىزدى. جالپى جىلى دارەتحانالاردى ورناتۋ ماسەلەسىنىڭ شەشىلۋىندە وڭ ديناميكا بايقالاتىنىن اتاپ وتكەن ءجون.

«مەكتەپكە دەيىنگى جانە ورتا ءبىلىم بەرۋ ۇيىمدارىن جىلى دارەتحانالارمەن جانە بەينەباقىلاۋ كامەرالارىمەن قامتۋ توڭىرەگىندە اۋقىمدى جۇمىستار جۇرگىزىلدى.

بۇل بالالاردىڭ دەنساۋلىعى مەن قاۋىپسىزدىگىنە بايلانىستى ماسەلە بولعاندىقتان، مۇنداي ماڭىزدى سۇراقتى «ۇساق ماسەلە» دەپ قاراستىرۋعا بولمايدى. وتكەن جىلى ەلىمىز بويىنشا 2700 مەكتەپتە جىلى دارەتحانا بولماسا، بۇگىنگى تاڭدا 2456 مەكتەپتە جىلى دارەتحانا سالىندى.

بۇل رەتتە ساپا ماسەلەسىن دە نازاردان تىس قالدىرماعانىمىز ابزال. مەكتەپتەردە دارەتحانالاردى ىسكە قوسىپ، بىراق ولاردى جاۋىپ قويىپ، وقۋشىلار دالاداعى دارەتحانالارعا بارىپ جۇرەتىن جاعدايعا جول بەرمەۋىمىز كەرەك. وبلىستىق ءبىلىم باسقارمالارىنىڭ باسشىلارى بۇل ماسەلەنى قاتاڭ باقىلاۋعا الۋلارى ءتيىس»، – دەدى ءبىلىم جانە عىلىم ءمينيسترى اسحات ايماعامبەتوۆ.

قازاقستاندىق مەكتەپتەردىڭ 99%-ى بەينەباقىلاۋ جۇيەلەرىمەن جابدىقتالعان. 2018 جىلى بۇل كورسەتكىش تەك 75% قۇراعان بولاتىن.

«ءبىلىم بەرۋ ۇيىمدارىن بەينەباقىلاۋ كامەرالارىمەن قامتۋ ماسەلەسى دە ماڭىزدى. بۇگىنگى تاڭدا كامەرالارمەن قامتۋ كورسەتكىشى 99 پايىزعا جەتىپ وتىر. دەگەنمەن اتقارىلعان جۇمىستىڭ سانى ەمەس، ساپاسى ماڭىزدىراق. ءبىلىم جانە عىلىم مينيسترلىگى مەن ىشكى ىستەر مينيسترلىگىنىڭ بۇيرىقتارىنا سايكەس ءبىلىم بەرۋ ۇيىمدارىن بەينەكامەرالارمەن قامتۋ بويىنشا ناقتى تالاپتار قويىلعان. ورناتىلعان بەينەباقىلاۋ كامەرەلارى بارلىق تالاپتارعا ساي بولۋى ءتيىس»، – دەدى اسحات ايماعامبەتوۆ.

Abai.kz