8 قازاندا الماتىداعى ادام قۇقىعىن قورعاۋ جونىندەگى حالىقارالىق بيۋرو كەڭسەسىندە ماسەلەلەرىن ايتقان قىزمەتكەرلەر "كوروناۆيرۋس جۇقتىرعان ناۋقاستارمەن تىكەلەي جۇمىس ىستەمەسەك تە ولارمەن بايلانىستا بولعان ادامدارمەن بىرگە ىستەپ، باسىمىزدى قاۋىپكە تىكتىك" دەيدى. بۇل جيىنعا 400-دەن استام قىزمەتكەردىڭ اتىنان كەلگەن باستاما توبىنىڭ وكىلدەرى (3 ادام) قاتىستى.

– مىسالى، ءبىز سول ستانتسيادا تازالىق جۇمىستارىمەن اينالىسامىز. كولىكتەردى تازالاۋ، دارىگەرلەرگە قاجەتتى كيىمدەردى جۋ - ءبىزدىڭ موينىمىزدا. باسشىلىق كۇندە ەرتەڭ دەۋمەن كەلەدى. جەتى اي بولدى. ءبىز ءوز جالاقىمىزدان تىسقارى "نۇر وتان" بەرگەن 50 مىڭ تەڭگەدەن باسقا ارتىق اقشا كورمەدىك. ارامىزدا جۇمىس بابىندا ءجۇرىپ ۆيرۋس جۇقتىرعاندار دا بار، - دەيدى توعجان جامىروۆا ەسىمدى قىزمەتكەر.

شاعىمدانۋشى توپ وكىلدەرىنىڭ سوزىنە قاراعاندا باستاپقىدا ولاردى كوروناۆيرۋس جۇقتىرعان ناۋقاستارمەن جۇمىس ىستەگەن ءۇشىنشى كاتەگورياداعى مەديتسينالىق قىزمەتكەرلەردىڭ تىزىمىنە ەنگىزگەن. كەيىنىرەك تىزىمنەن الىنىپ تاستالعان.

جەدەل جاردەم قىزمەتكەرلەرى ماۋسىم ايىندا دا وزدەرىنە ءتيىستى وتەماقىنىڭ بەرىلمەي جاتقانىن ايتىپ نارازىلىق بىلدىرگەن بولاتىن.

قازاقستاندا زاڭ بويىنشا كوروناۆيرۋسپەن كۇرەسكەن مەديتسينا قىزمەتكەرلەرىنە ءۇش كاتەگوريا بويىنشا ۇستەماقى تولەنەدى. سوڭعى كاتەگورياعا ەنگەن مەديتسينا قىزمەتكەرلەرىنە 200 مىڭ تەڭگەدەن استام ۇستەماقى بەرىلەدى.

جەدەل جاردەم ستانتسياسىنىڭ باس دارىگەرى ءبىرجان وسپانوۆ ازاتتىق تىلشىسىنە بەرگەن جاۋابىندا شاعىمدانعان قىزمەتكەرلەردىڭ ۇستەماقى الۋعا قۇقىعى بار ەكەنىن راستاپ، جاقىندا ولارعا تولەنەتىنىن ايتتى.

"قۇجاتتار ماسەلەسى شەشىلۋگە از قالدى. جاقىندا 415 قىزمەتكەردىڭ بارلىعى ۇستەماقى الادى. ءبىز بۇل جونىندە وزدەرىنە دە ايتىپ تۇسىندىرگەنبىز. بىراق قازىر نە ءۇشىن شاعىمدانىپ جاتقانىن بىلمەيمىز" دەدى ول.

كوكتەم مەن جاز ايلارىندا دا ونداعان مەديتسينا قىزمەتكەرى "كوروناۆيرۋس جۇققان ناۋقاستاردى ەمدەسەك تە ۇستەماقى المادىق" دەپ شاعىمدانعان. كەيبىرى ۇستەماقىنىڭ دۇرىس ەسەپتەلمەگەنىن العا تارتقان.

رەسمي مالىمەت بويىنشا، 12 830 مىڭ مەديتسينا قىزمەتكەرىنە كوروناۆيرۋس جۇققان: 8 339 دارىگەردىڭ ۆيرۋستى جۇمىستا جۇقتىرعانى انىقتالعان. 182 دارىگەر كوروناۆيرۋستان قايتىس بولعان.

كوروناۆيرۋس نەمەسە كوروناۆيرۋستىق پنەۆمونيا جۇقتىرعان مەديتسينا قىزمەتكەرىنە – 2 ملن تەڭگە، كوروناۆيرۋستان قايتىس بولعان مەديتسينا قىزمەتكەرىنىڭ وتباسىنا 10 ملن تەڭگە كولەمىندە وتەماقى بەرىلەدى.

Abai.kz