قازاقستانعا كەلگەندەر، ەگەر قولىندا COVID-19 ۆيرۋسىنا سىناما تەرىس ناتيجە بەرگەنى جونىندە انىقتاما بولماسا، ەكى كۇنگە كارانتينگە جىبەرىلەدى. وسىلاي دەپ دەنساۋلىق ساقتاۋ ءمينيسترى الەكسەي تسوي 1 قازاندا ونلاين-بريفينگ كەزىندە مالىمدەدى.

"قازىر كورىپ وتىرمىز، ەۋروپادا، گەرمانيا، اۆستريادا COVID-19 ۆيرۋسىن جۇقتىرعاندار كوبەيىپ جاتىر... ءبىزدىڭ ازاماتتار وزگە ەلگە بارعاندا، پتسر-سىناماسىنىڭ ناتيجەسىن سۇرايدى. ونسىز مىسالى بىرىككەن اراب امىرلىگىنە كىرە المايسىز. ءبىز مۇنى شەتەلگە شىققاندار قازاقستانعا تاعى ىندەت الىپ كەلمەۋى ءۇشىن جاساپ جاتىرمىز", - دەدى مينيستر.

اۋە قاتىناستارى قالپىنا كەلگەن ەلدەردەن كەلىپ جاتقان ازاماتتاردىڭ ەڭ ءبىرىنشى دەنە قىزۋىن تەكسەرەدى، قىسقاشا ساۋالناما الادى، قولىندا COVID-19 ۆيرۋسىنا تەست تاپسىرعانى جونىندە انىقتاما سۇرايدى. ول انىقتاما مەرزىمى ءۇش تاۋلىكتەن اسپاۋى ءتيىس. پتسر-انىقتاما شەتەل ازاماتتارىنان دا تالاپ ەتىلەدى. ونسىز ولار ۇشاققا كىرە المايدى.

مينيستر مۇنداي تالاپتار ەۋرازيا ەكونوميكالىق ايماعىنان جانە وزبەكستاننان كەلەتىن ازاماتتارعا دا قويىلعانىن اتاپ ءوتتى.

قازاقستاندا ءالى قىتاي، تايلاند، مونعوليا، مالايزيا، ەگيپەت، گونكونگ، وڭتۇستىك كورەيا، جاپونيا، سينگاپۋر، گەرمانيا، بەلارۋس جانە ازەربايجان ەلدەرىمەن اۋە قاتىناسىندا شەكتەۋ بار.

ال ەكىنشى كاتەگورياعا كىرەتىن شۆەيتساريا، ۇلىبريتانيا، پولشا، يتاليا، ۆەنگريا، اۆستريا، نيدەرلاند، شۆەتسيا، رۋمىنيا، چەحيا، گرەكيا، تۇركيا، ءباا، ساۋد ارابيا، ءۇندىستان، ارمەنيا، رەسەي، وزبەكستان، ۋكراينا، قىرعىزستان جانە تاجىكستان ەلدەرىنە ۇشاق سيرەك قاتىنايدى.

قازاقستاندا كوروناۆيرۋس ينفەكتسياسى رەسمي تۇردە ءبىرىنشى رەت 13 ناۋرىزدا تىركەلدى. 1 قازانداعى ەسەپ بويىنشا، قازاقستاندا جالپى 107 مىڭ 979 ادامنان COVID-19 ۆيرۋسى انىقتالعان. 102 مىڭ 937 ناۋقاس ايىعىپ شىقسا، 1 724-ءى قايتىس بولعان. 1 تامىزدان بەرى 32 799 ادامنان كوۆيدقا ۇقساس پنەۆمونيا انىقتالعان (COVID-19 ۆيرۋسىنا تەست تەرىس ناتيجە بەرگەن). ولاردىڭ 27 169-ى ساۋىعىپ شىقسا، 355 ناۋقاس قايتىس بولعان.

Abai.kz