قازاقستاندا قوس ازاماتتىعى بار 284 ادام انىقتالدى. بۇل تۋرالى ىشكى ىستەر مينيسترلىگى مالىمدەدى. 

«ءىىم كوشى-قون قىزمەتىنىڭ جۇمىس ناتيجەلەرى بويىنشا باسقا مەملەكەتتىك ورگاندارمەن بىرلەسىپ، قازاقستاندا جىل باسىنان بەرى پىسىقتالعان الگوريتم بويىنشا قوس ازاماتتىعى ءۇشىن جاۋاپتىلىققا تارتىلعان 284 بۇرىنعى ازامات انىقتالدى»،- دەلىنگەن حابارلامادا.

ازاماتتىعىنان ايىرىلعان ادامدار بولا تۇرا، ءتارتىپ بۇزۋشىلار قازاقستان رەسپۋبليكاسىنا كەلۋ جانە تۇرۋ ءۇشىن قازاقستاندىق قۇجاتتاردى پايدالاندى.

ولاردىڭ بىرقاتارى شەت مەملەكەتتىڭ ازاماتتىعىن قابىلداعانى تۋرالى ۋاقتىلى حابارلاماعانى ءۇشىن اكىمشىلىك جاۋاپكەرشىلىككە تارتىلدى.

وسى زاڭ بۇزۋشىلىقتار ءۇشىن 266 ادامعا (277 800 تەڭگەدەن 555 مىڭ تەڭگەگە دەيىن) ايىپپۇل سالىنىپ، 18 ادام ەلدەن شىعارىلدى. جازا تاعايىنداۋ تۋرالى شەشىمدى سوت ورگانى قابىلدايدى.

حالىقارالىق كەلىسىمدەر قوس ازاماتتىقتى بولدىرماۋ جونىندەگى جۇمىستى جەڭىلدەتەدى، ويتكەنى ەكىنشى تاراپتىڭ ازاماتتىعىن الۋ تۋرالى مالىمەتتەردى قازاقستاندىق تاراپ قىسقا مەرزىمدە الادى.

Abai.kz