وزبەكستاننىڭ ۆيتسە-پرەمەر-ءمينيسترى ۋكتام بارنوەۆ 56 جاسىندا كوز جۇمدى. جەرگىلىكتى باسىلىمدار مالىمەتىنە قاراعاندا، شەنەۋنىك كوروناۆيرۋس جۇقتىرىپ، ينسۋلت العان. ونى ەمدەۋ ءۇشىن گەرمانياعا جەتكىزىلىپ، بىراق سول جاقتا قايتىس بولعان.

بىراق رەسمي بۇلاقتار مۇنداي مالىمەتتەردى جاريالامادى.

مارقۇمدى بۇحاراعا جەرلەۋ ءراسىمى جۇرگىزىلىپ جاتقانى، پرەزيدەنتتىڭ بۇحاراعا باراتىنى حابارلاندى. بارنوەۆ 2016 جىلدىڭ جەلتوقسانىنان 2020 جىلدىڭ اقپانىنا دەيىن بۇحارا وبلىسىنىڭ اكىمى بولعان. كەيىن ۇكىمەت باسشىسىنىڭ اگرارلىق جانە ازىق-تۇلىك سالاسى بويىنشا ورىنباسارى قىزمەتىن اتقارعان.

وسىعان دەيىن وزبەكستاندا قاراقالپاقستان اۆتونوميالىق رەسپۋبليكاسىنىڭ جوگوركۋ كەڭەشىنىڭ توراعاسى، ولي ماجليس سەناتى توراعاسىنىڭ ورىنباسارى مۋسا ەرنيازوۆ پەن بۇحارا وبلىسى اكىمى كاريم كامولوۆ كوروناۆيرۋستان كوز جۇمعان.

سوڭعى مالىمەتتەر بويىنشا، وزبەكستاندا كوروناۆيرۋس 51 235 ادامعا جۇققان. ونىڭ ىشىندە 47 271 ناۋقاس ايىعىپ، 429 ادام قايتىس بولعان.

Abai.kz