بەلارۋس پرەزيدەنتى الەكساندر لۋكاشەنكو ورىس باسپاسوزىنە سۇحبات بەرىپ، ەلدەگى ساياسي پروتسەسستەر تۋرالى ءوز ويىن ايتقان ەكەن. لۋكاشەنكومەن سۇحباتتاسۋعا «روسسيا-1»، «Russia Today»، «ەۋرازيا» ارنالارىنىڭ تىلشەلەرى قاتىسقان. كەزدەسۋ مينسكىدە وتكەن.

سۇحبات بارىسىندا «ەۋروپانىڭ سوڭعى ديكتاتورى» اتانىپ كەتكەن الەكساندر لۋكاشەنكو پرەزيدەنتتىكتەن جايدان-جاي كەتپەيتىنىن، شيرەك عاسىر شەگىندە ءوزى باسقارىپ وتىرعان مەملەكەتتى ەڭسەسىنەن تىك تۇرعىزعانىن ايتىپتى.

«ءيا، مەن مۇكىن پرەزيدەنتتىكتە ۇزاقتاۋ وتىرعان شىعارمىن. بىراق، بەلارۋستى قازىر مەن عانا قورعاي الامىن»، - دەپتى لۋكاشەنكو.

سونداي-اق، لۋكاشەنكو ءوز سوزىندە «سايلاۋدان كەيىنگى نارازىلىق اكتسيالارىن ۇيىمداستىرعان اقش»، دەپ ايىپتاي سويلەپ، جاڭا قۇرىلعان كوورديناتسيالىق كەڭەسپەن ديالوگقا كەلمەيتىنىن اشىق ايتقان.

«وپپوزيتسيا قۇرعان كوورديناتسيالىق كەڭەسپەن سويلەسپەيمىن. ولاردىڭ كىم ەكەنىن دە بىلمەيمىن. ولاردىڭ كوكسەگەنى، ولاردىڭ ۇسىنىپ وتىرعاندارى بەلارۋس حالقى ءۇشىن وتە قاۋىپتى»، -دەگەن لۋكاشەنكو.

كۇنى كەشە عانا بەلارۋستەگى وپپوزيتسيا جەتەكشىلەرى مەن لۋكاشەنكونىڭ قارسىلاستارى ەلدەن كەتە باستاعانى اقپاراتتا جاريا بولعان.

اتاپ ايتقاندا، قاماۋداعى ساياساتكەر ۆيكتور باباريكونىڭ سايلاۋ شتابىنىڭ وكىلى، سايلاۋ ناۋقانى كەزىندە «ءۇش ايەل» ميتينگىن ۇيىمداستىرعان ماريا كولەسنيكوۆا جانە ونىڭ ەكى ارىپتەسى انتون رودنەنكوۆ پەن يۆان كراۆتسوۆ بەلارۋس-ۋكراينا شەكاراسىندا تۇتقىندالعان. ولار ەلدەن كەتپەك بولعان. بۇل بيلىك ورگاندارى تاراتقان رەسمي اقپارات.

ال بەلارۋس وپپوزيتسياسى مەن ۋكراينانىڭ رەسمي ورگاندارى تاراتقان اقپاراتقا سۇيەنسەك، وپپوزيتسيا ليدەرى ماريا كولەسنيكوۆا مەن ونىڭ ارىپتەستەرىن بيلىك بەلارۋستەن كۇشتەپ شىعارماق بولعان.

ۋكراينانىڭ مەملەكەتتىك شەكارا قىزمەتىنىڭ تاراتقان اقپاراتىنشا، كولەسنيكوۆانىڭ ەكى ارىپتەسى ۋكراينا تەريتورياسىنا وتە بەرگەندە ۇستالعان. ال ماريانىڭ ءوزى ول كەزدە شەكارادان وتپەگەن.

ۋكراينا ىشكى ىستەر ءمينيسترى انتون گەراششەنكو اتالعان جايتقا قاتىستى پىكىر ءبىلدىرىپ، بەلارۋس وپپوزيتسيونەرلەرى شەكارادان ءوز ەرىكتەرىمەن وتپەگەنىن ايتقان.

ماريا كولەسنيكوۆا باسشىلارىنىڭ ءبىرى بولىپ سانالاتىن بەلارۋستەگى وپپوزيتسيالىق كوورديناتسيالىق كەڭەس مالىمدەمەسىندە كولەسنيكوۆانىڭ شەكارادان ءوز ەركىمەن ەمەس، كۇشپەن شىعارىلماق بولعانى، ونى ەلدەن قۋماق بولعاندا ول ءوزىنىڭ قۇجاتىن (پاسپورتىن) جىرتىپ تاستاعانى حابارلاعان.

ايتا كەتەيىك، بەلارۋستە قارسىلىق اكتسيالارى 9 تامىزدان بەرى جالعاسىپ كەلەدى. نارازى توپ سايلاۋ قورىتىندىلارى بۇرمالانعان دەپ سانايدى. بەلارۋس ورتالىق سايلاۋ كوميسسياسىنىڭ ەسەبىنشە، الەكساندر لۋكاشەنكو 80,10 پايىز، ونىڭ باستى وپپونەنتى بولعان سۆەتلانا تيحانوۆسكايا 10,12 پايىز داۋىس جيناعان.

ال سايلاۋدان كەيىنگى شەرۋلەر كەزىندە كۇشتىك قۇرىلىمدار ازاماتتارعا قارسى ۇردا-جىق ساياساتتى ۇستانىپ، كۇش قولدانعان. رەزەڭكە وقتار مەن سۋ شاشقىن تەحنيكالاردى قولدانعان. نارازىلىقتار كەزىندە 8 مىڭعا جۋىق ازامات تۇتقىندالعان. رەسمي اقپارات بويىنشا 4 ادام قايتىس بولعان.

ليتۆا، لاتۆيا مەن ەستونيا العاش بولىپ بەلارۋس بيلىگىنە جەكەلەگەن سانكتسيالار سالعان. بالتىق ەلدەرى الەكساندر لۋكاشەنكو باستاعان بەلارۋستىڭ 30 شەنەۋنىگىن نون-گراتا تۇلعا دەپ تانىعان.

بۇل سايلاۋعا حالىقارالىق باقىلاۋشىلار قاتىستىرىلعان جوق. سايلاۋدان كەيىن الەكساندر لۋكاشەنكونىڭ «جەڭىسىن» اقش پەن باتىس، ەۋروقاۋىمداستىق ەلدەرى مويىنداعان جوق. لۋكاشەنكونىڭ «جەڭىسىن» بۇرىنعى ءھام قازىرگى ەلدەر عانا مويىنداعان. ال قازاقستان لۋكاشەنكونى قۇتتىقتاعان العاشقى ءۇش مەملەكەتتىڭ ءبىرى بولعان (قىتاي مەن رەسەيدەن كەيىن).

تاقىرىپقا تۇزدىق:

لۋكاشەنكو قارسىلاستارىن دەپورتاتسيالاپ جاتىر ما؟

لۋكاشەنكونىڭ «جەڭىسىن» كىمدەر مويىندادى، كىمدەر جوق؟

لۋكاشەنكو جەڭدى مە، جەڭىلدى مە؟

لۋكاشەنكونىڭ «جەڭىسى» ءھام حالىق نارازىلىعى...

Abai.kz