قوستاناي وبلىسىنىڭ پوليتسيا دەپارتامەنتى تەرروريست رۋسلان قۇلەكباەۆ پەن ەكس-شەكاراشى ۆلاديسلاۆ چەلاح جازاسىن وتەپ جاتقان "قارا بۇركىت" كولونياسىنىڭ باسشىسى ۇستالعانىن مالىمدەدى.

پد ءباسپاسوز قىزمەتى وكىلى بىرلەسكەن وپەراتسيانى قوستاناي وبلىسى پد ۇقكد جانە وقب قىزمەتكەرلەرى جۇرگىزگەنىن حابارلادى.

قوستاناي وبلىسى بويىنشا قاجد ۋك-161/3 توتەنشە قاۋىپسىزدىك مەكەمەسىنىڭ باسشىسى كولونياداعى سوتتالۋشىعا قامقورلىق جاساعانى ءۇشىن پارا العاننان كەيىن ۇستالعان.

"قازىرگى ۋاقىتتا كۇدىكتىگە قاتىستى قر قك-ءنىڭ "پارا الۋ" بابىندا كوزدەلگەن سوتقا دەيىنگى تەرگەۋ امالدارى ءجۇرىپ جاتىر. كۇدىكتى قوستاناي ۋاقىتشا ۇستاۋ يزولياتورىنا قامالدى", - دەپ حابارلادى پوليتسيا وكىلدەرى.

ء"وز قاتارىنداعى زاڭ بۇزۋشىلىقتاردى انىقتاۋ جانە جولىن كەسۋ بويىنشا جۇمىس تۇراقتى جۇرگىزىلەدى. سونداي-اق، سىبايلاس جەمقورلىق تاۋەكەلدەرى تالدانادى. باسشىلار دا قول استىنداعى قىزمەتكەرلەرى زاڭ بۇزعاندا جاۋاپقا تارتىلادى. جىل باسىنان بەرى ءىىو-نىڭ 21 قىزمەتكەرى جۇمىستان شىعارىلدى جانە 23 ادام تارتىپتىك جازا رەتىندە لاۋازىمىنان بوساتىلدى", - دەدى قوستاناي وبلىسى پد وزىندىك قاۋىپسىزدىك باسقارماسىنىڭ باسشىسى پوليتسيا پولكوۆنيگى جانىبەك قامزەنوۆ.

كۇدىكتى كولونيا باسشىسى بولىپ وتكەن جىلدىڭ جەلتوقسانىندا تاعايىندالعان.

"قارا بۇركىت" - قوستاناي وبلىسىنداعى قاجد توتەنشە قاۋىپسىزدىك مەكەمەسى. جىتىقارا قالاسىنان وڭتۇستىك-شىعىسقا قاراي 25 شاقىرىم جەردە ورنالاسقان. 2004 جىلدان بەرى كولونيادا ءومىر بويىنا باس بوستاندىعىنان ايىرىلعان اسا قاۋىپتى قىلمىسكەرلەر ءۇشىن جەرگىلىكتى ۋچاسكە بار.

ەسكە سالايىق، "قارا بۇركىتتە" 2012 جىلدىڭ جەلتوقسانىندا ءومىر بويىنا سوتتالعان قاراعاندىلىق بۇرىنعى شەكاراشى ۆلاديسلاۆ چەلاح جازاسىن وتەپ جاتىر. ول 2012 جىلدىڭ مامىرىندا "ارقانكەرگەن" ۋاقىتشا شەكارا بەكەتىندە 14 ارىپتەسى مەن قورىقشىنىڭ ولىمىنە كىنالى دەپ تانىلدى.

سونىمەن قاتار، مۇندا الماتىلىق مەرگەن رۋسلان قۇلەكباەۆ وتىر. 2016 جىلدىڭ 18 شىلدەسىندە تاڭەرتەڭ ول الماتىداعى المالى ءاىىب، ۇقكد جانە سالىق دەپارتامەنتىنىڭ عيماراتىنا قارۋلى شابۋىل جاسادى. اتىس سالدارىنان 10 ادام قازا تاپقان بولاتىن.

تۇپنۇسقا: Tengrinews.kz

Abai.kz