ەلىمىزدە «جانام دەگەن جۇرەككە وت بەرەتىن»، ونەرلى جاستاردىڭ تالابىن ۇشتاپ، جولىن اشۋعا باعىتتالعان جوبالار از ەمەس. «شىعارماشىل جاستاردى قولداۋ جونىندەگى ءىس-شارالاردى ۇيىمداستىرۋ» الەۋمەتتىك جوباسىنىڭ دا نەگىزگى ماقساتى سول. قىزىلوردالىق سەرىكباي يلياس ەسىمدى جاس كينوگەر سول بىرەگەي جوبانىڭ شاراپاتىن كورگەندەردىڭ ءبىرى بولىپ تابىلادى.

ءبىز تالابى تاۋداۋ جىگىتكە حابارلاسىپ، از-كەم اڭگىمەگە تارتقان ەدىك.

– مەنىڭ ەسىمىم سەرىكباي يلياس. 2003 جىلى قىزىلوردا قالاسىندا دۇنيەگە كەلدىم. بۇگىندە قالتاي مۇحامەدجانوۆ اتىنداعى №1 مەكتەپ-گيمنازيانىڭ 11-سىنىبىندا ءبىلىم الىپ جاتىرمىن. ءوزىم ۆيدەوروليكتەر تۇسىرۋمەن، الەۋمەتتىك جوبالارمەن اينالىسقاندى ۇناتامىن. مەكتەپ ىشىنەن دوستارىمىزبەن «مەيىرىمگە تولى جۇرەگىم» اتتى ەرىكتىلەر ۇيىمىن قۇرىپ، بۇگىندە ايماعىمىزعا كومەك كورسەتىپ كەلەمىز، – دەپ اڭگىمەسىن باستادى ءبىزدىڭ كەيىپكەرىمىز.

بيىلعى جىل سەرىكباي يلياس ءۇشىن جەمىستى بولدى. كينو باعىتىندا Mbff: قازاقستانداعى العاشقى ءموبيلدى فيلمدەر فەستيۆالىندە ءبىر نوميناتسيادا جەڭىمپاز اتاندى. كاسىبي ۆيدەوكامەراعا ەمەس، قاراپايىم ايفونعا تۇسىرگەن دۇنيەسى قازىلار تاراپىنان جوعارى باعالاندى. ودان سوڭ «قازاقستان بالالارى شەكسىز الەمدە» اتتى بالالار كينوفەستيۆالىنىڭ قالالىق، وبلىستىق كەزەڭدەرىنىڭ جەڭىمپازى اتاندى. ونىڭ تۇسىرگەن قىسقا مەتراجلى فيلمدەرىن YouTube جەلىسىنەن تاماشالاۋعا بولاتىنىن دا ايتا كەتەيىك. بايقاۋعا راشيد سۇلەيمەنوۆ، ەردەن تىلەمىسوۆ سىندى تانىمال كينوگەرلەر قازىلىق جاساعانىن دا اتاپ وتكەن ءجون.

– «قازاقستان بالالارى شەكسىز الەمدە» بايقاۋىنىڭ رەسپۋبليكالىق كەزەڭىنە قاتىسۋ ءۇشىن گرانتتار كونكۋرسىنا ءوتىنىم جىبەرگەن بولاتىنمىن. جولىم بولىپ، «شىعارماشىل جاستاردى قولداۋ جونىندەگى ءىس-شارالاردى ۇيىمداستىرۋ» الەۋمەتتىك جوباسىنىڭ گرانتىن ۇتىپ ادىم.  ارينە،  العانىما وتە قۋانىشتىمىن. قازىردە جاستاردى قولداپ، ولاردىڭ ارى قاراي دامۋىنا مۇمكىندىك بەرۋ ماڭىزدى. ەندىگى جوسپارىم حالىقارالىق بايقاۋلاردا باعىمدى سىناپ كورۋ، – دەيدى ونەرلى جىگىت.

كورىپ وتىرعانىمىزداي، يلياس قانا ەمەس، باسقا دا جۇزدەگەن ورەننىڭ جارقىراپ جانۋىنا جاردەمى تيگەن «شىعارماشىل جاستاردى قولداۋ جونىندەگى ءىس-شارالاردى ۇيىمداستىرۋ» الەۋمەتتىك جوباسى دارىندى جاستارعا، ونىڭ ىشىندە حالىقتىڭ الەۋمەتتىك وسال توپتارىنا قولداۋ كورسەتىپ، جاعداي جاساۋ ءۇشىن گرانتتار بەرۋمەن اينالىسادى. الەۋمەتتىك جوبا قر اقپارات جانە قوعامدىق دامۋ مينيسترلىگىنىڭ قولداۋىمەن «ازاماتتىق باستامالاردى قولداۋ ورتالىعى» كەاق مەملەكەتتىك گرانتىنىڭ شەڭبەرىندە «لوگوس-قاراعاندى» مۇگەدەكتەردى وڭالتۋ ورتالىعى تاراپىنان ىسكە اسىرىلىپ جاتقانىن ايتا كەتەيىك.

ءسال كەڭىرەك باياندار بولساق، وسى جوبا اياسىندا 14-29 جاس ارالىعىنداعى دارىندى قازاقستاندىقتارعا رەسپۋبليكالىق بايقاۋلار مەن فەستيۆالدەرگە قاتىسۋعا 200 مىڭ تەڭگە كولەمىندە 30 گرانت، سونىمەن قاتار حالىقارالىق بايقاۋلار مەن فەستيۆالدەرگە باق سىناۋعا جول اشاتىن 700 مىڭ تەڭگە كولەمىندەگى 20 گرانت ۇتىپ الۋعا مۇمكىندىك بەرىلەدى.

Abai.kz