سارسەنبى كۇنى مەملەكەت باسشىسى نۇرسۇلتان نازارباەۆتىڭ جارلىعىمەن قر قورعانىس ءمينيسترى قىزمەتىنە قازاقستان رەسپۋبليكاسىنىڭ رەسەي فەدەراتسياسىنداعى توتەنشە جانە وكىلەتتى ەلشىسى قىزمەتىن اتقارعان ادىلبەك جاقسىبەكوۆ تاعايىندالدى.
ەلباسى نۇرسۇلتان نازارباەۆ قارۋلى كۇشتەر كوماندالىق قۇرامىنا جاڭا قورعانىس ءمينيسترى ادىلبەك جاقسىبەكوۆتى تانىستىرا وتىرىپ، ونىڭ وسى جۇمىس ۋچاسكەسىنە قاجەتتى ادام بولىپ تابىلاتىنىن، ۇلكەن ۇيىمداستىرۋشىلىق جانە ساياسي جۇمىس تاجىريبەسى بار ەكەنىن اتاپ ءوتتى.
قورعانىس مينيسترلىگى باسشىلىعى مەن قارۋلى كۇشتەردىڭ كوماندالىق قۇرامى الدىندا سويلەگەن سوزىندە مەملەكەت باسشىسى نۇرسۇلتان نازارباەۆ ايتىپ وتكەنىندەي، مەملەكەت قارۋلى كۇشتەرگە ءاردايىم ايرىقشا نازار اۋدارىپ كەلەدى. تەك 2009 جىلى قورعانىس ۆەدومستۆوسىنىڭ قاجەتتىلىكتەرى ءۇشىن شامامەن 140 ميلليارد تەڭگە ءبولىندى، 3 مىڭنان استام اسكەري قىزمەتشى جاڭا پاتەر الدى. سوڭعى 10 جىلدا قورعانىس مينيسترلىگىنىڭ 43 وفيتسەرىنە گەنەرال شەنى بەرىلدى، ءتورت اسكەري قىزمەتكەر حالىق قاھارمانى اتاعىنا يە بولدى. قارۋلى كۇشتەر باس قولباسشىسى قورعانىس مينيسترلىگى باسشىلىعى مەن كوماندالىق قۇرامنىڭ الدىنا بىرقاتار ناقتى مىندەتتەر قويدى.
قازاقستان پرەزيدەنتى ونىڭ وزىنە تاپسىرىلعان ءىستى اتقارا الاتىنىنا سەنىم ءبىلدىردى جانە جاڭا قورعانىس مينيسترىنە جۇكتەلگەن مىندەتتەردى ورىنداۋدا تابىستار تىلەدى.
بۇل جولى كەتكەن مينيستر دانيال احمەتوۆكە، جاقسى-جامان اتقارسىن، ادەتتەگىدەي ءبىراۋىز جىلى ءسوز ايتىلماعانعا ۇقسايدى. ەكس-ەلشى ادىلبەك جاقسىبەكوۆ قيۋى قاشقان قورعانىس مينيسترلىگىنە «ءورت ءسوندىرۋشى» ميسسياسىن اتقارۋعا كەلگەن سىقىلدى. يندۋستريا جانە ساۋدا مينيسترلىگىن، استانا قالاسىن، پرەزيدەنت اكىمشىلىگىن باسقارعان، «نۇر وتان» پارتياسى توراعاسىنىڭ ءبىرىنشى ورىنباسارى قىزمەتىن اتقارعان ادىلبەك جاقسىبەكوۆ اۋىر سالماقتاعى ساياساتكەرلەردىڭ بىرىنەن سانالادى. ونىڭ ەلگە قايتا ورالۋى ساياسي كۇشتەردىڭ اراسالماعىن وزگەرىسكە ۇشىراتۋى مۇمكىن. ەلىمىزدىڭ جەتىنشى قورعانىس ءمينيسترى دە – بۇل سالاعا باسشىلىققا كەلگەن ەكىنشى ازاماتتىق تۇلعا. الەمدەگى اسكەري بيۋدجەتى وراسان زور الپاۋىت ەلدەردىڭ قورعانىس مينيسترلەرىن ازاماتتىق تۇلعالاردان تاعايىنداۋ كەيىنگى كەزدەرى ۇردىسكە اينالعان. ماسەلەن، رەسەيدىڭ قازىرگى قورعانىس ءمينيسترى اناتولي سەرديۋكوۆتىڭ ءاۋ باستاعى ماماندىعى – ەكونوميست جانە زاڭگەر. ساۋدا مەن سالىق سالاسىندا جۇمىس ىستەپ ىسىلعان اناتولي سەرديۋكوۆ قورعانىس ۆەدومستۆوسىنىڭ ۇشار باسىنا كوتەرىلدى. ال اقش-تىڭ قورعانىس ءمينيسترى روبەرت گەيتستىڭ ءوزى ونەر ماماندىعىن باكالاۆر دارەجەسىندە بىتىرگەن ەكەن. بۇعان دەيىن اقش-تىڭ بۇرىنعى باس بارلاۋشىسى قىزمەتىن اتقارعان. ازاماتتىق قورعانىس مينيسترلەرىنە باسىمدىق بەرۋدىڭ استارى جوق ەمەس. شاماسى، بۇل ەلدەر تاريحتاعى اسكەري گەنەرالداردىڭ قاۋىپتى قۇپيا كەلىسىمدەرىنەن ساباق العان بولسا كەرەك.
ساراپشىلار پىكىرى:
سەيداحمەت قۇتتىقادام، ساياساتتانۋشى:
– كەزىندە شارۋانى دوڭگەلەتەدى دەپ ماقتالعان دانيال احمەتوۆ اياقاستىنان الىنىپ تاستالدى. مەنىڭ ەستۋىمشە، ول ءبىر جاققا ەلشىلىككە كەتەتىن كورىنەدى. تالاي ءىرى قىزمەتتىڭ باسىن شالعان ادىلبەك جاقسىبەكوۆ بۇل قىزمەتكە ۋاقىتشا كەلگەنگە ۇقسايدى. قورعانىس مينيسترلىگى ول ءۇشىن – وتپەلى قىزمەت، ءبىراز ۋاقىت وتكەن سوڭ باسقا جاققا اۋىسىپ كەتەدى. فينليانديا، شۆەتسيا سياقتى ەلدەردە قورعانىس مينيسترلىكتەرىن ازاماتتىق تۇلعالار باسقارىپ ءجۇر. بىراق جاعداي باسقاشا. ازاماتتىق تۇلعالار قورعانىس سالاسىن باقىلاۋشى ءرولىن اتقارادى. بىزدە قورعانىس ۆەدومستۆوسىنا كەلەتىن باسشى سوعىس ستراتەگياسىن جەتە مەڭگەرگەن كاسىبي ازامات بولۋى كەرەك. بۇل جاعىنان جاڭا ءمينيستردىڭ تاجىريبەسى جوققا ءتان.
راسۋل جۇمالى، ساياساتتانۋشى:
– ادىلبەك جاقسىبەكوۆ بۇعان دەيىن تابىستى كاسىپكەر، شەبەر ۇيىمداستىرۋشى رەتىندە جاقسى قىرىنان كورىنىپ كەلدى. بۇل جاعىنان ونىڭ بىلىكتىلىگىنە سەنىم ارتۋعا بولار. قورعانىس سىندى ستراتەگيالىق سالانى كاسىبي گەنەرالدار باسقارسا، جامان بولماس ەدى. قۇدايعا شۇكىر، ەلدە گەنەرالدار بارشىلىق. باسشى كادرلاردىڭ ءجيى-ءجيى اۋىسۋى جاقسى قۇبىلىس ەمەس. وركەنيەتتى ەلدەردەگىدەي كادر تۇراقتىلىعى قاجەت. ءبىز ءجىو-ءنىڭ ءبىر پايىزىن عانا قورعانىسقا جۇمسايمىز. بۇل وتە از. ماسەلەن، ىرگەدەگى وزبەكستان – قيىندىققا قاراماستان، ءجىو-ءنىڭ 5 پايىزىن، قىتاي 7 پايىزىن قورعانىسقا جۇمسايدى. مەملەكەتتىڭ تۇعىرى – اسكەر، ساربازدىڭ مارتەبەسىن قايتارۋ كەرەك. مەملەكەت اش وتىرسا دا، قورعانىستان بارىن اياماعانى ءجون.
قىسقاشا اقپارات:
ادىلبەك رىسكەلدىۇلى جاقسىبەكوۆ 1954 جىلعى شىلدەنىڭ 26-سىندا قوستاناي وبلىسى قارابالىق اۋدانىنىڭ ءبورلى اۋىلىندا تۋعان. 1977 جىلى ماسكەۋدەگى بۇكىلوداقتىق مەملەكەتتىك كينەماتوگرافيا ينستيتۋتىنىڭ ەكونوميكا فاكۋلتەتىن بىتىرگەن، 1987 جىلى پلەحانوۆ اتىنداعى ماسكەۋ حالىق شارۋاشىلىعى ينستيتۋتىندا «ماتەريالدىق-تەحنيكالىق جابدىقتاۋدى ۇيىمداستىرۋشى» ماماندىعى بويىنشا قايتا دايارلىقتان ءوتتى. ەكونوميكا عىلىمىنىڭ كانديداتى.
ءار جىلدارى پارلامەنت سەناتىنىڭ دەپۋتاتى، اقمولا وبلىسى اكىمىنىڭ ءبىرىنشى ورىنباسارى، استانا قالاسىنىڭ اكىمى، يندۋستريا جانە ساۋدا ءمينيسترى، پرەزيدەنت اكىمشىلىگىنىڭ باسشىسى، «نۇر وتان» حالىقتىق-دەموكراتيالىق پارتياسى توراعاسىنىڭ ءبىرىنشى ورىنباسارى – قر پرەزيدەنتىنىڭ كەڭەسشىسى، قازاقستان رەسپۋبليكاسىنىڭ رەسەي فەدەراتسياسىنداعى توتەنشە جانە وكىلەتتى ەلشىسى قىزمەتىن اتقاردى.
قازاقستان فۋتبول فەدەراتسياسىنىڭ پرەزيدەنتى.

قۇباش ساعيدوللاۇلى
«الاش ايناسى» گازەتى 26 ماۋسىم 2009 جىل