دەنساۋلىق ساقتاۋ مينيسترلىگى ماۋسىم ايىنىڭ سوڭىندا ساتىپ الامىز دەپ ۋادە ەتكەن كوروناۆيرۋستى انىقتايتىن 1,2 ميلليون پتر تەستى ءالى ساتىپ الماعان بولىپ شىقتى.

بۇل بۇگىن ورتالىق كوممۋنيكاتسيالار قىزمەتىندە تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ توراعاسى تيمۋر سۇلتانعازيەۆ بەرگەن بريفينگىدە ءمالىم بولدى. دەنساۋلىق ساقتاۋ مينيسترلىگىنىڭ وكىلى «ونى الداعى ۋاقىتتا ساتىپ الامىز» دەپ ۋادە ەتتى.

«ءتيىستى تەست جۇيەسىن، ونىڭ ىشىندە وتاندىق تاۋار وندىرۋشىلەردىڭ تەست جۇيەسىن ساتىپ الۋعا دايىندىق ءجۇرىپ جاتىر. ۇلتتىق ساراپتاما ورتالىعىندا وتاندىق تەست جۇيەسىن قولدانۋدى جوسپارلاپ وتىرمىز. ۇكىمەت رەزەرۆى اياسىندا 1,2 ميلليون تەست جۇيەسىن ساتىپ الۋ جوسپارلانىپ وتىر. تەست جۇيەسى بۇل جولى وتاندىق وندىرۋشىلەردەن ساتىپ الىناتىنىن ەسكەرسەك، وعان وسى سالااعى بارلىق تاۋار وندىرۋشىلەر قاتىسا الادى»، – دەدى تيمۋر سۇلتانعازيەۆ.

«قازىر ءتيىستى پروتسەدۋرالار ءجۇرىپ جاتىر. جاقىندا تەست جۇيەلەر ساتىپ الىنۋى كەرەك»، – دەپ قايىردى ول.

تيمۋر سۇلتانعازين 1,2 ميلليون پتر تەست جۇيەسى مەن 20 پتر اناليزاتور ساتىپ الۋ ءۇشىن 15,6 ميلليارد تەڭگە بولىنگەنىن ايتتى.

Malim kz پتر تەستەردىڭ تاپشىلىعى ماسەلەسىن 22 ماۋسىم كۇنى كوتەرىپ، دەنساۋلىق ساقتاۋ مينيسترلىگىنە حابارلاسقان. بۇگىن قىزمەتىنەن كەتكەن دەنساۋلىق ساقتاۋ مينيسترلىگىنىڭ رەسمي وكىلى دياس احمەتشارىپ سول تۇستا «كوروناۆيرۋستى انىقتايتىن تەستەردى مينيسترلىك سول اپتانىڭ ىشىندە ساتىپ الاتىنىن» ايتقان. Malim kz بۇل ماسەلە بويىنشا ماۋسىمنىڭ 22-ءسى كۇنى دەنساۋلىق ساقتاۋ مينيسترلىگىنىڭ ءباسپاسوز قىزمەتىنە بىرنەشە سۇراق جولداعان. ءبىز بۇل تەستەر قاشان ساتىپ الىناتىنىن جانە وعان اقشا بولىنگەن-بولىنبەگەنىن سۇراعان ەدىك. ءباسپاسوز قىزمەتىنەن ءالى كۇنگە دەيىن جاۋاپ كەلمەدى، ال مينيسترلىكتىڭ ءباسپاسوز حاتشىسى گاۋحار بيسارينا سۇراعىمىزعا جاۋاپتى كىمنىڭ دايىنداپ جاتقانىن دا ناقتىلاپ ايتپاي، مەسسەندجەردەگى حابارلامالارىمىزعا جاۋاپ بەرمەي وتىر.

18 ماۋسىم كۇنى سول تۇستاعى ءمينيستردىڭ ورىنباسارى لياززات اقتاەۆا 1,2 ميلليون تەستىڭ ساتىپ الىناتىنىن مالىمدەگەن. 30 ماۋسىم كۇنى جاڭادان مينيستر بولىپ تاعايىندالعان الەكسەي تسوي 1,2 ميلليون تەست جاقىن ۋاقىتتا ساتىپ الىنادى دەپ ۋادە بەرگەن.

دەرەككوز: malim.kz

Abai.kz