اكىمنىڭ سوزىنشە، 8 شىلدە كۇنى كەشكە شەكارا بەكەتىندەگى اۆتوۆوكزالعا جينالعان وزبەك ميگرانتتارىنىڭ سانى 3,4 مىڭعا جەتكەن. تۇندە ولاردىڭ 2 مىڭى وزبەكستانعا وتكەن. ودان بولەك بەس ءجۇز ادامعا شەكارا بەكەتىنەن وتكىزۋگە رۇقسات بەرىلگەن.

– بەس ءجۇز ادامدى بەكەتتەن وتكىزۋ باستالدى. وزبەكستاننىڭ قازاقستانداعى ەلشىلىگى بۇگىن (9 شىلدە - رەد.) كەشكە دەيىن بارلىق ازاماتىن ەلىنە وتكىزۋگە ۋادە ەتتى. قازىر شەكارا بەكەتىندەگى اۆتوۆوكزالدا توعىز جۇزدەن اسا ادام قالدى. وزبەك ميگرانتتارى شەكارا ايماعىنا ءالى كەلىپ جاتىر، – دەدى وتارشيەۆ.

شەكارا بەكەتىندە بوگەلىپ قالعان شەتەلدىكتەر قاتارىندا تاجىك ازاماتتارى دا بار. تاجىكستاننىڭ قازاقستانداعى ەلشىلىگى ازاتتىققا "جىبەك جولى" بەكەتىندە ەلۋگە جۋىق تاجىك ازاماتىنىڭ قالعانىن ايتتى. ەلشىلىكتىڭ مالىمەتىنشە، 3 شىلدە كۇنى جەتى جۇزگە جۋىق تاجىك ميگرانتى شەكارا بەكەتىنەن ءوتىپ، وزبەكستان ارقىلى تاجىكستانعا كەتكەن.

شىلدە ايىنىڭ باسىندا قازاق-وزبەك شەكاراسى ماڭىندا ەكى مىڭ تاجىك پەن وزبەك ميگرانتى ەلىنە وتە الماي بوگەلگەن ەدى. وزبەكستان كوروناۆيرۋسقا بايلانىستى شەكارانى جاپقان. ادەتتە تاجىكستان ازاماتتارى ەلىنە اۆتوبۋسپەن وزبەكستان ارقىلى قايتاتىن.

Abai.kz