دۇنيەجۇزىندە تاراعان پاندەمياعا بايلانىستى ەلىمىزدە ەنگىزىلگەن كارانتيندىك رەجيم ەرتەڭىمىز ءۇشىن قاجەت. زىلتەمىرشى ءارى وليمپيادانىڭ كۇمىس جۇلدەگەرى جازيرا جاپپارقۇل جۇرتشىلىقتى سابىرعا شاقىرىپ، كارانتين تارتىبىنە باعىنۋعا ۇندەدى. بۇل تۋرالى قازاقپارات مالىمدەدى.

«بۇكىل الەمدى شارپىعان الاپات دەرت ەلىمىزدى دە اينالىپ وتپەدى. حالقىمىزدىڭ باسىنا تۇسكەن اۋىرتپالىق بىرىگۋدى، اسقان ۇيىمشىلدىق پەن ءتوزىمدى تالاپ ەتۋدە. سان عاسىرلىق عۇمىرىندا قازاق حالقى تالاي ءناۋباتتى باستان كەشىردى. بۇل قيىندىقتىڭ دا وتكىنشى ەكەنى ءسوزسىز. سابىر مەن قاناعاتتىڭ، ءتارتىپ پەن قاناعاتتىڭ سىنالار ءساتى كەلىپ تۇر. قازاق قانداي قيىندىقتا دا بەل الدىرماعان، كەلەر كۇننەن ءۇمىتىن ۇزبەگەن قايسار حالىق. بۇگىنىمىزگە ساقتىقپەن قاراساق، ەرتەڭگى كۇنىمىزدىڭ شۋاقتى بولارى ءسوزسىز. سوندىقتان دا كارانتين تالاپتارىنا تۇسىنىستىك تانىتقانىمىز ابزال. بابالارىمىز دەنساۋلىقتى ءبىرىنشى بايلىققا تەككە تەڭەمەگەن بولار. وزىمىزگە كۇتىممەن قاراۋ ارقىلى وزگەلەردى قاۋىپتەن قورعاي الامىز. ۇلى دالانىڭ قىران تەكتەس ۇرپاعى امان بولسىن!»، - دەيدى جازيرا جاپپارقۇل.

ەسكە سالايىق، قازاقستاندا كوروناۆيرۋسقا قاتىستى ەپيدەميولوگيالىق احۋالدىڭ ورشۋىنە بايلانىستى بيىلعى 5 شىلدەدەن باستاپ ەلىمىزدە 14 كۇنگە قاتاڭ شەكتەۋ شارالارى ەنگىزىلەدى.

Abai.kz