قازاقستاندا بالاباقشا، مەكتەپ، كوللەدج، جوو-لارعا تۇسەتىندەردەن مەديتسينالىق انىقتاما ۋاقىتشا تالاپ ەتىلمەيدى. بۇل تۋرالى ءبىلىم جانە عىلىم مينيسترلىگى مالىمدەدى. 

مەديتسينالىق انىقتامالاردى الۋ بويىنشا تۋىنداپ جاتقان قيىندىقتارعا بايلانىستى ازاماتتارعا ءبىلىم بەرۋ ۇيىمدارىنا قابىلدانۋ ءۇشىن ءتيىستى قۇجاتتاردى تاپسىرۋ بارىسىندا انىقتامالاردى  ۋاقىتشا ۇسىنباۋعا مۇمكىندىك بەرىلەدى.

ازاماتتاردىڭ قاۋىپسىزدىگىن قامتاماسىز ەتۋ ماقساتىندا جانە دەنساۋلىق جاعدايى تۋرالى مەديتسينالىق انىقتامالاردى الۋدا تۋىنداعان قيىندىقتارعا بايلانىستى ءبىلىم جانە عىلىم ءمينيسترى ءبىلىم بەرۋ ۇيىمدارىنا (بالاباقشالارعا، مەكتەپتەرگە، كوللەدجدەر مەن جوو-لارعا) قۇجاتتاردى مەديتسينالىق انىقتامالارسىز قابىلداۋعا ۋاقىتشا رۇقسات بەرۋ تۋرالى بۇيرىققا قول قويدى.

Egov.kz "ەلەكتروندىق ۇكىمەت" پورتالى ارقىلى قۇجاتتاردى جىبەرۋ بارىسىندا مەديتسينالىق انىقتامالاردى وزىنە بايلانىستى ەمەس سەبەپتەر بويىنشا ۇسىنا المايتىن ازاماتتار ءۇشىن اتالعان انىقتامالاردى كەيىن ۇسىنۋعا مۇمكىندىك بەرەتىن فۋنكتسيا ىسكە قوسىلادى. قازىرگى ۋاقىتتا ءبىلىم الۋشىلار مەديتسينالىق تەكسەرۋدەن وتكەنى تۋرالى انىقتامالارسىز شارتتى تۇردە ءبىلىم بەرۋ ۇيىمدارىنا قابىلدانادى.

مەديتسينالىق انىقتامالاردى وقۋ جىلى باستالعانعا دەيىن مۇمكىندىك بولعان كەزدە تاپسىرۋعا بولادى.

Abai.kz